ဗျာဒိတ်ကျမ်းကို ဂရိစကားနဲ့ အပေါကလစ် လို့ခေါ်တယ်။ အပေါကလစ် ဆိုတာ ဖော်ထုတ် ဒါမှမဟုတ် ဖွင့်ချပြောပြတယ်ဆိုတဲ့ အဓိပ္ပာယ်ရှိတယ်။ အဲဒီနာမည်အတိုင်းပဲ ဗျာဒိတ်ကျမ်းက ဖုံးကွယ်နေတဲ့အရာတွေကို ဖော်ထုတ်ပြတယ်။ နှစ်ပေါင်းများစွာကြာမှ ဖြစ်ပျက်လာမယ့်အကြောင်းအရာတွေကို ဖွင့်ချပြောပြထားတယ်။ ဒီကျမ်းမှာပါတဲ့ ကြိုဟောချက်အတော်များများဟာ ပြည့်စုံဖို့ ကျန်နေပါသေးတယ်။

ဗျာဒိတ်ကျမ်း အကျဉ်းချုပ်

•   နိဒါန်း။—ဗျာဒိတ် ၁:၁–၉။

•   အသင်းတော်ခုနစ်ခုကို ပေးပို့တဲ့ ယေရှုရဲ့ မှာကြားချက်များ။—ဗျာဒိတ် ၁:၁၀–၃:၂၂။

•   ကောင်းကင်ပလ္လင်ပေါ် ထိုင်နေတဲ့ ဘုရားသခင်ကို မြင်တွေ့ရတဲ့ ရူပါရုံ။—ဗျာဒိတ် ၄:၁–၁၁။

•   တစ်ခုပြီးတစ်ခု ဆက်တိုက်တွေ့မြင်ရတဲ့ ရူပါရုံများ–

  •   တံဆိပ်ခုနစ်ခု။—ဗျာဒိတ် ၅:၁–၈:၆။

  •   တံပိုးခုနစ်ခု။ နောက်ဆုံးတံပိုးသုံးခုကို မှုတ်တဲ့အခါ အမင်္ဂလာသုံးခု ဖြစ်ပေါ်လာ။—ဗျာဒိတ် ၈:၇–၁၄:၂၀။

  •   ဖလားခုနစ်လုံး။ တစ်လုံးစီထဲမှာ ဘုရားသခင့် တရားစီရင်မှုကို ကိုယ်စားပြုတဲ့ ကပ်ဘေးတစ်ခုစီပါရှိ။ အဲဒါတွေကို ကမ္ဘာပေါ် သွန်းလောင်းချမှာဖြစ်။—ဗျာဒိတ် ၁၅:၁–၁၆:၂၁။

  •   ဘုရားသခင့်ရန်သူတွေ ဖျက်ဆီးခံရမယ့်အကြောင်း ဖော်ပြထားတဲ့ ရူပါရုံများ။—ဗျာဒိတ် ၁၇:၁–၂၀:၁၀။

  •   ကောင်းကင်နဲ့ မြေကြီးအတွက် ဘုရားသခင့်ကောင်းချီးတွေကို ဖော်ပြထားတဲ့ ရူပါရုံများ။—ဗျာဒိတ် ၂၀:၁၁–၂၂:၅။

•   နိဂုံး။—ဗျာဒိတ် ၂၂:၆–၂၁။

ဗျာဒိတ်ကျမ်းကို နားလည်စေတဲ့ အဓိကအချက်များ

1.  ၁။ ဗျာဒိတ်ကျမ်းမှာ ဖော်ပြထားရာတွေရဲ့ အဓိပ္ပာယ်က ဘုရားသခင့်လူမျိုးအတွက် ကြောက်စရာမဟုတ်ဘဲ ဝမ်းသာစရာဖြစ်ပါတယ်။ “အပေါကလစ်” ဆိုတဲ့စကားလုံးက ကပ်ဘေးဆိုးကြီးကို ဆိုလိုတယ်လို့ တချို့ ထင်ကြတယ်။ ဒါပေမဲ့ ဗျာဒိတ်ကျမ်းကို ဖတ်ရှု၊ နားလည်ပြီး လိုက်နာကျင့်သုံးသူတွေဟာ ပျော်ရွှင်လိမ့်မယ်လို့ ဒီကျမ်းရဲ့အစမှာရော အဆုံးမှာပါ ဖော်ပြထားပါတယ်။—ဗျာဒိတ် ၁:၃; ၂၂:၇။

2.  ၂။ ဗျာဒိတ်ကျမ်းမှာ “အမှတ်သင်္ကေတ” တွေ၊ နိမိတ်လက္ခဏာတွေ အများကြီး အသုံးပြုထားတယ်။ အဲဒါတွေကို စာသားအတိုင်း ယူလို့မရဘူး။—ဗျာဒိတ် ၁:၁။

3.  ၃။ ဗျာဒိတ်ကျမ်းမှာပါတဲ့ အဓိကဖော်ပြချက်တွေ၊ အမှတ်သင်္ကေတတွေဟာ ကျမ်းစာရဲ့ ရှေ့ကျမ်းစောင်တွေမှာ ဖော်ပြထားပြီးသားတွေဖြစ်တယ်။ ဥပမာ၊ ဗျာဒိတ်ကျမ်းမှာပါတဲ့ ဒီအချက်တွေကို တခြားကျမ်းတွေမှာပါ တွေ့နိုင်တယ်–

   •   “အထက်ကောင်းကင်ပေါ် အောက်အရပ်မြေကြီးပေါ်မှာ ဘုရားသခင် ဖြစ်တော်မူ” ပြီး အရာခပ်သိမ်းကို ဖန်ဆင်းတဲ့အရှင် ယေဟောဝါ။—တရားဟောရာ ၄:၃၉; ဆာလံ ၁၀၃:၁၉; ဗျာဒိတ် ၄:၁၁; ၁၅:၃။

   •   “ဘုရားသခင်၏ သိုးသငယ်” ယေရှုခရစ်။—ယောဟန် ၁:၂၉; ဗျာဒိတ် ၅:၆; ၁၄:၁။

   •   ဘုရားသခင့်ရန်သူ မာရ်နတ်စာတန်။—ကမ္ဘာဦး ၃:၁၄၊ ၁၅; ယောဟန် ၈:၄၄; ဗျာဒိတ် ၁၂:၉။

   •   ရှေးခေတ်ဗာဗုလုန်မြို့ (ဘေဘဲလ်) လိုပဲ ဘုရားသခင်နဲ့ ကိုယ်တော့်လူမျိုးရဲ့ရန်သူ၊ ဘာသာရေးလိမ်ညာမှုတွေရဲ့ ရင်းမြစ်ဖြစ်တဲ့ မဟာဗာဗုလုန်။—ကမ္ဘာဦး ၁၁:၂–၉; ဟေရှာယ ၁၃:၁၊ ၁၁; ဗျာဒိတ် ၁၇:၄–၆; ၁၈:၄၊ ၂၀။

   •   ဘုရားသခင်ကို ပုန်ကန်ပြီး ဆိုးသွမ်းတဲ့လူသားတွေဖြစ်တဲ့ “ပင်လယ်”။—ဟေရှာယ ၅၇:၂၀; ဗျာဒိတ် ၁၃:၁; ၂၁:၁။

   •   ဘုရားကိုဝတ်ပြုတဲ့ ရှေးတုန်းကတဲတော်မှာ အသုံးပြုခဲ့တဲ့ ပဋိညာဉ်သေတ္တာ၊ ဖန်ရေကန် (လက်၊ ခြေဆေးစရာ ရေထည့်ဖို့ အင်တုံ)၊ မီးခွက်၊ မီးရှို့ဖို့ နံ့သာပေါင်း၊ ယဇ်ပူဇော်ရာ ယဇ်ပလ္လင်။—ထွက်မြောက်ရာ ၂၅:၁၀၊ ၁၇၊ ၁၈; ၄၀:၂၄–၃၂; ဗျာဒိတ် ၄:၅၊ ၆; ၅:၈; ၈:၃; ၁၁:၁၉။

   •   လူ့အစိုးရတွေကို တင်စားဖော်ပြတဲ့ သားရဲ။—ဒံယေလ ၇:၁–၈၊ ၁၇–၂၆; ဗျာဒိတ် ၁၃:၂၊ ၁၁; ၁၇:၃။

   •   တင်စားချက်အဖြစ် အသုံးပြုထားတဲ့ နံပါတ်များ။—ဗျာဒိတ် ၁:၂၀; ၈:၁၃; ၁၃:၁၈; ၂၁:၁၆။

4.  ၄။ ဗျာဒိတ်ကျမ်းပါ ရူပါရုံတွေက “သခင့်နေ့တော်” နဲ့ သက်ဆိုင်ပါတယ်။ “သခင့်နေ့တော်” က ဘုရားသခင့်နိုင်ငံတော် စတင်တည်ထောင်ပြီး ယေရှုခရစ် ဘုရင်ဖြစ်လာတဲ့ ၁၉၁၄ မှာစတင်တယ်။ (ဗျာဒိတ် ၁:၁၀) ဒါကြောင့် ဗျာဒိတ်ကျမ်းဟာ ကျွန်ုပ်တို့အချိန်မှာ အဓိကပြည့်စုံမယ်လို့ မျှော်လင့်နိုင်ပါတယ်။

5.  ၅။ တခြားကျမ်းစောင်တွေလိုပဲ ဗျာဒိတ်ကျမ်းကိုလည်း နားလည်နိုင်ဖို့ ဘုရားသခင်ဆီက ဉာဏ်ပညာနဲ့ ကျမ်းစာ နားလည်ထားသူတွေဆီက အကူအညီ လိုအပ်ပါတယ်။—တမန်တော် ၈:၂၆–၃၉; ယာကုပ် ၁:၅။