ບົດຮຽນ 9
ຄອບຄົວຂອງທ່ານຈະມີຄວາມສຸກໄດ້ແນວໃດ?
1. ເປັນຫຍັງການແຕ່ງດອງຈຶ່ງເປັນປັດໄຈສຳຄັນເຊິ່ງພາໃຫ້ຄອບຄົວມີຄວາມສຸກ?
ຂ່າວດີມາຈາກພະເຢໂຫວາພະເຈົ້າຜູ້ມີຄວາມສຸກ ພະອົງຕ້ອງການໃຫ້ຄອບຄົວມີຄວາມສຸກ. (1 ຕີໂມເຕ 1:11) ພະອົງເປັນຜູ້ລິເລີ່ມໃຫ້ມີການແຕ່ງດອງ. ການແຕ່ງດອງທີ່ຖືກຕ້ອງຕາມກົດໝາຍເປັນສິ່ງທີ່ກໍ່ໃຫ້ຄອບຄົວມີຄວາມສຸກ ເພາະວ່ານັ້ນຈັດໃຫ້ມີສະພາບແວດລ້ອມທີ່ປອດໄພເພື່ອຈະລ້ຽງດູລູກ. ຄລິດສະຕຽນຄວນຈະປະຕິບັດຕາມກົດໝາຍທ້ອງຖິ່ນເພື່ອຈົດທະບຽນແຕ່ງດອງ.—ອ່ານລືກາ 2:1, 4, 5
ພະເຈົ້າຄິດແນວໃດຕໍ່ການແຕ່ງດອງ? ພະອົງຕ້ອງການໃຫ້ເປັນສິ່ງທີ່ຜູກພັນຊາຍແລະຍິງຢ່າງຖາວອນ. ພະເຢໂຫວາຕ້ອງການໃຫ້ຜົວແລະເມຍສັດຊື່ຕໍ່ກັນ. (ເຫບເລີ 13:4) ພະອົງກຽດຊັງການຢ່າຮ້າງ. (ມາລາກີ 2:16) ແຕ່ພະອົງອະນຸຍາດໃຫ້ຢ່າຮ້າງກັນໄດ້ ຫາກວ່າຝ່າຍໃດຝ່າຍໜຶ່ງເຮັດຜິດປະເວນີ.—ອ່ານມັດທາຍ 19:3-6, 9
2. ຜົວແລະເມຍຄວນປະຕິບັດຕໍ່ກັນແນວໃດ?
ພະເຢໂຫວາສ້າງຊາຍແລະຍິງໃຫ້ມີບົດບາດທີ່ຊ່ວຍເສີມກັນແລະກັນໃນຊີວິດແຕ່ງດອງ. (ຕົ້ນເດີມ 2:18) ໃນຖານະທີ່ເປັນຫົວໜ້າຄອບຄົວ ຜົວຄວນຈະຈັດຫາສິ່ງຝ່າຍວັດຖຸ ແລະສອນເລື່ອງພະເຈົ້າໃຫ້ແກ່ຄອບຄົວ. ລາວຄວນພ້ອມຈະເສຍສະລະຕົນເອງເພື່ອເມຍ. ຜົວແລະເມຍຄວນຈະຮັກແລະເຄົາລົບກັນແລະກັນ. ເນື່ອງຈາກວ່າຜົວແລະເມຍເປັນຄົນບໍ່ສົມບູນແບບ ການຮຽນຮູ້ທີ່ຈະໃຫ້ອະໄພເຊິ່ງກັນແລະກັນກໍ່ໃຫ້ເກີດຄວາມສຸກພາຍໃນຄອບຄົວ.—ອ່ານເອເຟດ 4:31, 32; 5:22-25, 33; 1 ເປໂຕ 3:7
3. ເມື່ອຜົວເມຍມີບັນຫາ ຄວນຈະແຍກທາງກັນໂລດບໍ?
ຖ້າເກີດບັນຫາໃນຊີວິດແຕ່ງດອງ ຜົວແລະເມຍຄວນປະຕິບັດຕໍ່ກັນດ້ວຍຄວາມຮັກ. (1 ໂກລິນໂທ 13:4, 5) ພະຄຳຂອງພະເຈົ້າບໍ່ໄດ້ແນະນຳໃຫ້ແຍກກັນຢູ່ເພື່ອແກ້ໄຂບັນຫາທີ່ທຳມະດາໃນຊີວິດຄູ່.—ອ່ານ 1 ໂກລິນໂທ 7:10-13
4. ລູກເອີຍ ພະເຈົ້າຕ້ອງການຫຍັງຈາກພວກເຈົ້າ?
ພະເຢໂຫວາຕ້ອງການໃຫ້ພວກເຈົ້າມີຄວາມສຸກ. ພະອົງໃຫ້ຄຳແນະນຳທີ່ດີທີ່ສຸດເພື່ອພວກເຈົ້າຈະມີຄວາມຍິນດີໃນຊີວິດໄວໝຸ່ມ. ພະອົງຕ້ອງການໃຫ້ເຈົ້າຮັບປະໂຫຍດຈາກການສອນທີ່ສຸຂຸມແລະປະສົບການທີ່ດີຂອງພໍ່ແມ່. (ໂກໂລດ 3:20) ພະເຢໂຫວາຍັງຕ້ອງການໃຫ້ເຈົ້າປະສົບຄວາມຍິນດີໃນການຮັບໃຊ້ຜູ້ສ້າງແລະພະບຸດຂອງພະອົງ.—ອ່ານຜູ້ເທດສະໜາປ່າວປະກາດ 11:9–12:1; ມັດທາຍ 19:13-15; 21:15, 16
5. ພໍ່ແມ່ເອີຍ ລູກຂອງທ່ານຈະມີຄວາມສຸກໄດ້ແນວໃດ?
ທ່ານຕ້ອງເຮັດວຽກຢ່າງໜັກເພື່ອສະໜອງອາຫານ ທີ່ຢູ່ອາໄສ ແລະເຄື່ອງນຸ່ງຫົ່ມໃຫ້ພວກລູກ. (1 ຕີໂມເຕ 5:8) ແຕ່ວ່າເພື່ອໃຫ້ພວກລູກມີຄວາມສຸກ ທ່ານຈຳເປັນຕ້ອງສອນລູກໃຫ້ຮັກແລະຮຽນຮູ້ຈາກພະເຈົ້າ. (ເອເຟດ 6:4) ການທີ່ທ່ານສະແດງຄວາມຮັກຕໍ່ພະເຈົ້າກໍເປັນແບບຢ່າງທີ່ມີແຮງຊັກຈູງຕໍ່ລູກ. ເມື່ອທ່ານສອນລູກຕາມຫຼັກການໃນພະຄຳພີ ນັ້ນຈະເປັນການຫຼໍ່ຫຼອມຄວາມຄິດຂອງລູກໃຫ້ໄປໃນທາງທີ່ດີ.—ອ່ານພະບັນຍັດ 6:4-7; ສຸພາສິດ 22:6
ລູກຈະໄດ້ຮັບປະໂຫຍດ ເມື່ອທ່ານໃຫ້ຄຳຊົມເຊີຍແລະໃຫ້ກຳລັງໃຈເຂົາເຈົ້າ ແລະຍັງຈຳເປັນຕ້ອງໄດ້ດັດປັບແລະສັ່ງສອນເຂົາເຈົ້າ. ການອົບຮົມແບບນີ້ຍັງປ້ອງກັນເຂົາເຈົ້າຈາກການປະພຶດທີ່ຈະທຳລາຍຄວາມສຸກຂອງເຂົາເຈົ້າ. (ສຸພາສິດ 22:15) ແຕ່ການສັ່ງສອນບໍ່ຄວນເຮັດແບບຮຸນແຮງແລະໂຫດຮ້າຍ.—ອ່ານໂກໂລດ 3:21
ພະຍານພະເຢໂຫວາມີສັບພະໜັງສືຕ່າງໆທີ່ຈັດພິມຂຶ້ນເພື່ອຊ່ວຍພໍ່ແມ່ແລະລູກ. ໜັງສືເຫຼົ່ານີ້ອາໄສຄຳພີໄບເບິນເປັນຫຼັກ.—ອ່ານຄຳເພງ 19:7, 11
ເລື່ອງທີ່ເຈົ້າອາດຈະມັກ
ຄອບຄົວຂອງທ່ານຈະມີຄວາມສຸກໄດ້ແນວໃດ
ຄອບຄົວຈະມີຄວາມສຸກເມື່ອໝາຍເພິ່ງພະເຈົ້າ
ໃຊ້ພຽງສອງຄຳຖາມທີ່ງ່າຍໆແຕ່ສາມາດເຮັດໃຫ້ຊີວິດຄູ່ຂອງທ່ານດີຂຶ້ນໄດ້
ຄອບຄົວຂອງທ່ານຈະມີຄວາມສຸກໄດ້ແນວໃດ
ຈະຮັບມືກັບບັນຫາຕ່າງໆໄດ້ແນວໃດ
ຄອບຄົວຈະມີຄວາມສຸກ ຫຼືຈະແຕກແຍກ ແມ່ນຂຶ້ນກັບວ່າໄດ້ໃຊ້ຄຳແນະນຳທີ່ຖືກຕ້ອງຫຼືບໍ
