ບົດຮຽນ 5
ພະເຈົ້າມີຈຸດປະສົງແນວໃດຕໍ່ແຜ່ນດິນໂລກ?
1. ເປັນຫຍັງພະເຈົ້າຈຶ່ງສ້າງແຜ່ນດິນໂລກ?
ພະເຢໂຫວາປະທານແຜ່ນດິນໂລກໃຫ້ທັງຊາຍແລະຍິງ. ໂລກນີ້ຈຶ່ງເປັນບ່ອນອາໄສຂອງເຮົາ. ຢ່າງໃດກໍຕາມ ອາດາມແລະເອວາມະນຸດຄູ່ທຳອິດບໍ່ໄດ້ຖືກສ້າງໃຫ້ຢູ່ໃນສະຫວັນ—ພະເຈົ້າໄດ້ສ້າງທູດສະຫວັນເພື່ອໃຫ້ຢູ່ໃນສະຫວັນຢູ່ແລ້ວ. (ໂຢບ 38:4, 7) ແທ້ຈິງ ພະເຈົ້າໄດ້ໃຫ້ມະນຸດຄູ່ທຳອິດຢູ່ໃນສວນເອເດນທີ່ສວຍງາມ. (ຕົ້ນເດີມ 2:15-17) ພະເຢໂຫວາໃຫ້ໂອກາດເຂົາເຈົ້າແລະລູກຫຼານທີ່ຈະເກີດມາພາຍຫຼັງມີຄວາມສຸກຢ່າງບໍ່ສິ້ນສຸດເທິງໂລກ.—ອ່ານຄຳເພງ 37:29; 115:16
ແຕ່ກົກແຕ່ເຄົ້າ ມີແຕ່ສວນເອເດນເທົ່ານັ້ນທີ່ເປັນອຸທິຍານ. ມະນຸດຄູ່ທຳອິດຕ້ອງໃຫ້ກຳເນີດລູກຫຼານຈົນເຕັມໂລກ. ໃນທີ່ສຸດ ເຂົາເຈົ້າຈະຕ້ອງເຮັດໃຫ້ທົ່ວໂລກເປັນອຸດທິຍານ. (ຕົ້ນເດີມ 1:28) ໂລກນີ້ຈະບໍ່ຖືກທຳລາຍຈັກເທື່ອ. ໂລກນີ້ຈະເປັນທີ່ຢູ່ອາໄສຂອງມະນຸດຕະຫຼອດໄປ.—ອ່ານຄຳເພງ 104:5
ເບິ່ງວິດີໂອ ເປັນຫຍັງພະເຈົ້າຈຶ່ງສ້າງໂລກ?
2. ເປັນຫຍັງຕອນນີ້ໂລກບໍ່ໄດ້ເປັນອຸທິຍານ?
ອາດາມແລະເອວາບໍ່ເຊື່ອຟັງພະເຈົ້າ ດັ່ງນັ້ນ ພະເຈົ້າຈຶ່ງໄດ້ໄລ່ເຂົາເຈົ້າອອກຈາກສວນ. ອຸທິຍານຈຶ່ງສູນເສຍໄປ ບໍ່ມີມະນຸດຄົນໃດກອບກູ້ອຸທິຍານຄືນມາໄດ້. ຄຳພີໄບເບິນກ່າວວ່າ “ແຜ່ນດິນໂລກກໍມອບໄວ້ແລ້ວໃນມືຄົນຮ້າຍ.”—ໂຢບ 9:24—ອ່ານຕົ້ນເດີມ 3:23, 24
ພະເຢໂຫວາລົ້ມເລີກຈຸດປະສົງເດີມທີ່ມີຕໍ່ມະນຸດຊາດບໍ? ບໍ່! ພະອົງເປັນພະເຈົ້າມີລິດເດດຫຼາຍທີ່ສຸດ. ພະອົງບໍ່ເຄີຍຫຼົມແຫຼວ. (ເອຊາອີ 45:18) ພະອົງຈະເຮັດໃຫ້ມະນຸດຊາດກັບສູ່ແນວທາງຕາມທີ່ພະອົງໄດ້ມຸ່ງໝາຍໄວ້.—ອ່ານຄຳເພງ 37:11, 34
3. ອຸທິຍານຈະໄດ້ຮັບການຟື້ນຟູຄືແນວໃດ?
ໃນລະຫວ່າງທີ່ພະເຈົ້າມອບອຳນາດໃຫ້ພະເຍຊູປົກຄອງ ໂລກຈະຖືກຟື້ນຟູໃຫ້ເປັນອຸທິຍານ. ໃນສົງຄາມອະລະມະເຄໂດນ ພະເຍຊູຈະນຳໜ້າເຫຼົ່າທູດສະຫວັນເພື່ອທຳລາຍຜູ້ທີ່ຕໍ່ຕ້ານພະເຈົ້າ. ຈາກນັ້ນ ພະເຍຊູຈະກັກຂັງຊາຕານໄວ້ເປັນເວລາ 1.000 ປີ. ຜູ້ທີ່ຮັບໃຊ້ພະເຈົ້າຈະລອດພົ້ນຈາກການທຳລາຍລ້າງ ເພາະພະເຍຊູຈະທຳການປົກປ້ອງເຂົາເຈົ້າ. ເຂົາເຈົ້າຈະມີຊີວິດຕະຫຼອດໄປຢ່າງມີຄວາມສຸກໃນອຸທິຍານເທິງໂລກນີ້.—ອ່ານຄຳປາກົດ 20:1-3; 21:3, 4
4. ເມື່ອໃດຄວາມທຸກລຳບາກຈະສິ້ນສຸດ?
ພະເຈົ້າຈະເຮັດໃຫ້ຄວາມຊົ່ວຮ້າຍໃນໂລກສິ້ນສຸດລົງເມື່ອໃດ? ພະເຍຊູເວົ້າເຖິງໝາຍ “ສຳຄັນ” ທີ່ຊີ້ບອກວ່າເມື່ອໃດອະວະສານຈະມາເຖິງ. ສະພາບ ການຂອງໂລກປັດຈຸບັນນີ້ເປັນໄພຕໍ່ຄວາມເປັນຢູ່ຂອງມະນຸດ ນັ້ນຈຶ່ງສະແດງວ່າຕອນນີ້ເຮົາຢູ່ໃນ “ທີ່ສຸດແຫ່ງໂລກນີ້.”—ອ່ານມັດທາຍ 24:3, 7-14, 21, 22
ລະຫວ່າງ 1.000 ປີທີ່ພະເຍຊູປົກຄອງໂລກນີ້ຈາກສະຫວັນ ພະອົງຈະໃຫ້ຄວາມທຸກລຳບາກທັງໝົດຈົບສິ້ນໄປ. (ເອຊາອີ 9:6, 7; 11:9) ໃນຖານະເປັນກະສັດ ພະເຍຊູຈະເຮັດໜ້າທີ່ເປັນມະຫາປະໂລຫິດໃຫຍ່ທີ່ຈະລົບລ້າງຄວາມຜິດບາບຂອງຜູ້ທີ່ຮັກພະເຈົ້າ. ດັ່ງນັ້ນ ພະເຈົ້າຈະກຳຈັດຄວາມເຈັບປ່ວຍ ຄວາມເຖົ້າແກ່ ແລະຄວາມຕາຍ ໂດຍທາງພະເຍຊູຄລິດ.—ອ່ານເອຊາອີ 25:8; 33:24
5. ໃຜຈະຢູ່ອຸທິຍານເຊິ່ງຈະມາໃນພາຍພາກໜ້າ?
ຢູ່ທີ່ຫໍປະຊຸມລາຊະອານາຈັກ ທ່ານຈະພົບຄົນທີ່ຮັກພະເຈົ້າແລະຕ້ອງການຮູ້ວິທີທີ່ຈະເຮັດໃຫ້ພະອົງພໍໃຈ
ຜູ້ຄົນທີ່ເຊື່ອຟັງພະເຈົ້າຈະຢູ່ໃນອຸທິຍານ. (1 ໂຢຮັນ 2:17) ພະເຍຊູໄດ້ສົ່ງລູກສິດຂອງພະອົງໃຫ້ໄປຊອກຫາຄົນທີ່ມີໃຈຖ່ອມ ແລະສອນເຂົາເຈົ້າໃຫ້ຮູ້ເຮັດສິ່ງທີ່ພະເຈົ້າຍອມຮັບ. ໃນປັດຈຸບັນນີ້ ພະເຢໂຫວາກຳລັງຈັດຕຽມຫຼາຍລ້ານຄົນເພື່ອຈະໄດ້ຢູ່ອຸທິຍານໃນໂລກນີ້ເຊິ່ງພວມຈະມາເຖິງ. (ໂຊໂຟນີ 2:3) ທີ່ຫໍປະຊຸມລາຊະອານາຈັກຂອງພະຍານພະເຢໂຫວາ ຫຼາຍຄົນໄດ້ຮຽນຮູ້ທີ່ຈະເປັນຜົວແລະພໍ່ທີ່ດີຂຶ້ນ ເປັນເມຍແລະແມ່ທີ່ດີຂຶ້ນ. ພໍ່ແມ່ແລະລູກນະມັດສະການນຳກັນ ແລະຮຽນຮູ້ວິທີທີ່ຈະໄດ້ຮັບປະໂຫຍດຈາກຂ່າວດີ.—ອ່ານມີເກ 4:1-4
