ຈົດໝາຍສະບັບທຳອິດເຖິງຄລິດສະຕຽນໃນເມືອງໂກຣິນໂທ 7:1-40
7 ໃນເລື່ອງທີ່ພວກເຈົ້າຂຽນມາຖາມນັ້ນ ຂ້ອຍຂໍຕອບວ່າ ຖ້າຜູ້ຊາຍບໍ່ມີເພດສຳພັນກັບຜູ້ຍິງກໍດີກວ່າ.
2 ແຕ່ຍ້ອນການເຮັດຜິດສິນລະທຳທາງເພດ*ມີຫຼາຍ ໃຫ້ຜູ້ຊາຍແຕ່ລະຄົນມີເມຍ+ ແລະໃຫ້ຜູ້ຍິງແຕ່ລະຄົນມີຜົວ.+
3 ຜົວຄວນໃຫ້ເມຍຕາມທີ່ເມຍຄວນໄດ້ຮັບ* ແລະເມຍກໍຄວນໃຫ້ຜົວຕາມທີ່ຜົວຄວນໄດ້ຮັບ.+
4 ເມຍບໍ່ໄດ້ເປັນເຈົ້າຂອງຮ່າງກາຍໂຕເອງ ແຕ່ຜົວເປັນເຈົ້າຂອງ. ຜົວກໍຄືກັນ ບໍ່ໄດ້ເປັນເຈົ້າຂອງຮ່າງກາຍໂຕເອງ ແຕ່ເມຍເປັນເຈົ້າຂອງ.
5 ຢ່າກີດກັນສິດຂອງອີກຝ່າຍໜຶ່ງ ນອກຈາກທັງສອງຄົນຈະຕົກລົງກັນແບບນັ້ນໄລຍະໜຶ່ງເພື່ອທຸ່ມເທໂຕໃນການອະທິດຖານ. ຫຼັງຈາກນັ້ນກໍໃຫ້ກັບມາຢູ່ນຳກັນອີກ ເພື່ອຈະບໍ່ຖືກຊາຕານລໍ້ໃຈຈົນຄວບຄຸມໂຕເອງບໍ່ໄດ້.
6 ຖ້າພວກເຈົ້າເຮັດໄດ້ຕາມທີ່ຂ້ອຍເວົ້າກໍດີ ແຕ່ນີ້ບໍ່ແມ່ນຄຳສັ່ງ.
7 ໃຈຂ້ອຍຢາກໃຫ້ທຸກຄົນຢູ່ເປັນໂສດຄືຂ້ອຍ ແຕ່ວ່າແຕ່ລະຄົນໄດ້ຮັບພອນ*+ຈາກພະເຈົ້າບໍ່ຄືກັນ. ບາງຄົນຢູ່ເປັນໂສດ ສ່ວນບາງຄົນກໍແຕ່ງດອງ.
8 ຕອນນີ້ ຂ້ອຍຂໍເວົ້າກັບຄົນທີ່ຍັງບໍ່ແຕ່ງດອງແລະແມ່ໝ້າຍວ່າ ຖ້າພວກເຈົ້າຢູ່ແບບນີ້ໄດ້ຄືຂ້ອຍຕໍ່ໄປກໍດີ.+
9 ແຕ່ຖ້າຄວບຄຸມໂຕເອງບໍ່ໄດ້ກໍໃຫ້ແຕ່ງດອງໂລດ ເພາະເຮັດແບບນັ້ນກໍດີກວ່າມີໃຈເຜົາຮ້ອນດ້ວຍຕັນຫາ.+
10 ຂ້ອຍຂໍສັ່ງຄົນທີ່ແຕ່ງດອງແລ້ວ ບໍ່ແມ່ນຄຳສັ່ງຂອງຂ້ອຍເອງ ແຕ່ເປັນຄຳສັ່ງຂອງຜູ້ເປັນນາຍວ່າ ຢ່າໃຫ້ເມຍໄປຈາກຜົວ.+
11 ແຕ່ຖ້າລາວໄປຈາກຜົວ ກໍຢ່າແຕ່ງດອງໃໝ່. ຄັນບໍ່ຊັ້ນກໍໃຫ້ລາວກັບໄປຄືນດີກັບຜົວ. ສ່ວນຜົວກໍຢ່າໄປຈາກເມຍ.+
12 ຂ້ອຍຂໍເວົ້າກັບຄົນອື່ນໆຄືກັນ ແຕ່ນີ້ແມ່ນຂ້ອຍເວົ້າເອງ ບໍ່ແມ່ນຜູ້ເປັນນາຍຂອງພວກເຮົາເວົ້າ.+ ຂ້ອຍຂໍບອກວ່າ ຖ້າພີ່ນ້ອງຄົນໃດມີເມຍທີ່ບໍ່ມີຄວາມເຊື່ອແລະເມຍພໍໃຈຈະຢູ່ກັບຜົວ ກໍຢ່າໃຫ້ຜົວຖິ້ມເມຍ.
13 ຖ້າຜູ້ຍິງຄົນໃດມີຜົວທີ່ບໍ່ມີຄວາມເຊື່ອ ແລະຜົວພໍໃຈຈະຢູ່ກັບເມຍ ກໍຢ່າໃຫ້ເມຍຖິ້ມຜົວ.
14 ຜົວທີ່ບໍ່ມີຄວາມເຊື່ອໄດ້ປະໂຫຍດຍ້ອນຢູ່ນຳເມຍ ແລະເມຍທີ່ບໍ່ມີຄວາມເຊື່ອໄດ້ປະໂຫຍດຍ້ອນຢູ່ນຳຜົວ. ຖ້າເຂົາເຈົ້າບໍ່ຢູ່ນຳກັນ ພະເຈົ້າກໍຈະຖືວ່າລູກຂອງເຂົາເຈົ້າບໍ່ສະອາດ ແຕ່ຕອນນີ້ ລູກຂອງເຂົາເຈົ້າບໍລິສຸດແລ້ວ.
15 ແຕ່ຖ້າຝ່າຍທີ່ບໍ່ມີຄວາມເຊື່ອຢາກຈະແຍກໄປກໍໃຫ້ລາວໄປໂລດ. ເມື່ອເປັນແນວນັ້ນ ຝ່າຍທີ່ມີຄວາມເຊື່ອກໍບໍ່ມີຂໍ້ຜູກມັດທີ່ຈະຢູ່ກັບລາວຕໍ່ໄປ ຍ້ອນພະເຈົ້າເອີ້ນພວກເຈົ້າມາໃຫ້ຢູ່ຢ່າງສະຫງົບສຸກ.+
16 ເຈົ້າທີ່ເປັນເມຍ ຖ້າເຈົ້າຢູ່ກັບຜົວຕໍ່ໄປ ເຈົ້າອາດຈະຊ່ວຍຜົວໃຫ້ລອດກໍໄດ້.+ ເຈົ້າທີ່ເປັນຜົວ ຖ້າເຈົ້າຢູ່ກັບເມຍຕໍ່ໄປ ເຈົ້າອາດຈະຊ່ວຍເມຍໃຫ້ລອດກໍໄດ້.
17 ຕອນທີ່ພະເຢໂຫວາ*ເລືອກເຈົ້າໃຫ້ມາເຊື່ອເພິ່ນ ບໍ່ວ່າເພິ່ນຍອມໃຫ້ເຈົ້າຢູ່ໃນສະພາບໃດກໍໃຫ້ໃຊ້ຊີວິດແບບນັ້ນຕໍ່ໄປ.+ ຂ້ອຍຂໍສັ່ງແບບນີ້ກັບທຸກປະຊາຄົມຄືກັນ.
18 ຖ້າຜູ້ຊາຍຄົນໃດຮັບສິນຕັດ*ກ່ອນທີ່ລາວຈະມາເຊື່ອພະເຈົ້າ+ ກໍໃຫ້ລາວຢູ່ແບບນັ້ນຕໍ່ໄປ. ແຕ່ຖ້າຜູ້ຊາຍຄົນໃດບໍ່ໄດ້ຮັບສິນຕັດກ່ອນທີ່ຈະມາເຊື່ອພະເຈົ້າ ກໍຢ່າໃຫ້ລາວຮັບສິນຕັດ.+
19 ຊິຮັບສິນຕັດຫຼືບໍ່ຮັບກໍບໍ່ສຳຄັນດອກ.+ ສິ່ງທີ່ສຳຄັນແມ່ນການເຮັດຕາມຄຳສັ່ງຂອງພະເຈົ້າ.+
20 ຕອນທີ່ພະເຈົ້າເລືອກ ແຕ່ລະຄົນຢູ່ໃນສະພາບໃດກໍໃຫ້ຢູ່ໃນສະພາບນັ້ນຕໍ່ໄປ.+
21 ຖ້າພະເຈົ້າເລືອກເຈົ້າຕອນທີ່ເປັນທາດຢູ່ກໍບໍ່ຕ້ອງອຸກໃຈ+ ແຕ່ຖ້າມີໂອກາດເປັນອິດສະຫຼະໄດ້ກໍໃຫ້ເຮັດໂລດ.
22 ຄົນທີ່ເປັນທາດຕອນທີ່ຖືກເລືອກໃຫ້ມາເປັນລູກສິດຂອງຜູ້ເປັນນາຍ ກໍກາຍເປັນຄົນທີ່ໄດ້ຮັບອິດສະຫຼະແລະເປັນຄົນຂອງຜູ້ເປັນນາຍ.+ ສ່ວນຄົນທີ່ມີອິດສະຫຼະຕອນທີ່ຖືກເລືອກ ກໍກາຍເປັນທາດຂອງພະຄລິດ.
23 ເຈົ້າຖືກຊື້ໄວ້ແລ້ວດ້ວຍລາຄາສູງ+ ຢ່າເປັນທາດຂອງມະນຸດເລີຍ.
24 ພີ່ນ້ອງເອີ້ຍ ຕອນທີ່ພະເຈົ້າເລືອກເຈົ້າໃຫ້ມາເຊື່ອເພິ່ນ ຜູ້ໃດຢູ່ໃນສະພາບໃດກໍໃຫ້ຢູ່ໃນສະພາບນັ້ນ ແລະໃຫ້ຮັກສາສາຍສຳພັນກັບພະເຈົ້າຕໍ່ໄປ.
25 ຕອນນີ້ ຂ້ອຍຂໍເວົ້າກັບຄົນໂສດ*ຄືກັນ. ຂ້ອຍບໍ່ໄດ້ຮັບຄຳສັ່ງຫຍັງຈາກຜູ້ເປັນນາຍ ແຕ່ຂ້ອຍຂໍໃຫ້ຄວາມເຫັນ+ໃນຖານະຜູ້ສັດຊື່ຄົນໜຶ່ງທີ່ໄດ້ຮັບຄວາມເມດຕາຈາກຜູ້ເປັນນາຍ.
26 ເມື່ອຄິດເຖິງສະໄໝນີ້ທີ່ມີແຕ່ຄວາມຍາກລຳບາກ ຂ້ອຍຈຶ່ງເຫັນວ່າດີແລ້ວທີ່ເຈົ້າຈະເປັນແບບທີ່ເປັນຢູ່ໃນຕອນນີ້ຕໍ່ໄປ.
27 ຖ້າເຈົ້າມີເມຍ ຢ່າຫາເລື່ອງຖິ້ມເມຍ.+ ຖ້າຕອນນີ້ເຈົ້າບໍ່ມີເມຍແລ້ວ ກໍຢ່າຄິດຊອກຫາເມຍໃໝ່.
28 ຖ້າເຈົ້າຈະແຕ່ງດອງ ເຈົ້າກໍບໍ່ໄດ້ເຮັດຫຍັງຜິດ ແລະຖ້າຄົນໂສດຈະແຕ່ງດອງ ລາວກໍບໍ່ໄດ້ເຮັດຫຍັງຜິດ. ແຕ່ຂໍໃຫ້ຮູ້ວ່າຄົນທີ່ແຕ່ງດອງຈະມີຄວາມຫຍຸ້ງຍາກໃນຊີວິດ ແລະຂ້ອຍບໍ່ຢາກໃຫ້ພວກເຈົ້າເຈິກັບສິ່ງເຫຼົ່ານັ້ນ.
29 ພີ່ນ້ອງເອີ້ຍ ຂ້ອຍຂໍບອກພວກເຈົ້າວ່າເວລາເຫຼືອໜ້ອຍແລ້ວ.+ ຕັ້ງແຕ່ນີ້ໄປ ໃຫ້ຄົນທີ່ມີເມຍເປັນຄືກັບຄົນທີ່ບໍ່ມີເມຍ
30 ໃຫ້ຄົນທີ່ໂສກເສົ້າເປັນຄືກັບຄົນທີ່ບໍ່ໂສກເສົ້າ ໃຫ້ຄົນທີ່ດີໃຈເປັນຄືກັບຄົນທີ່ບໍ່ດີໃຈ ໃຫ້ຄົນທີ່ຊື້ສິ່ງຂອງເປັນຄືກັບຄົນທີ່ບໍ່ໄດ້ເປັນເຈົ້າຂອງສິ່ງເຫຼົ່ານັ້ນ
31 ແລະໃຫ້ຄົນທີ່ໃຊ້ປະໂຫຍດຈາກໂລກນີ້ເປັນຄືກັບຄົນທີ່ບໍ່ໄດ້ໃຊ້ຢ່າງເຕັມທີ ຍ້ອນໂລກນີ້ກຳລັງປ່ຽນໄປຄືກັບລະຄອນປ່ຽນສາກ.
32 ທີ່ຈິງ ຂ້ອຍບໍ່ຢາກໃຫ້ມີຫຍັງມາເຮັດໃຫ້ພວກເຈົ້າຕ້ອງກັງວົນ. ຄົນທີ່ບໍ່ແຕ່ງດອງກໍຈະສົນໃຈແຕ່ເລື່ອງຂອງຜູ້ເປັນນາຍເພື່ອເອົາໃຈເພິ່ນ.
33 ແຕ່ຜູ້ຊາຍທີ່ແຕ່ງດອງແລ້ວກໍຈະກັງວົນເລື່ອງສິ່ງຈຳເປັນຂອງຄອບຄົວ+ເພື່ອເຮັດໃຫ້ເມຍພໍໃຈ
34 ແລະໃຈຂອງລາວກໍຖືກແບ່ງແຍກ. ສ່ວນຜູ້ຍິງທີ່ບໍ່ແຕ່ງດອງຫຼືສາວບໍລິສຸດກໍສົນໃຈແຕ່ເລື່ອງຂອງຜູ້ເປັນນາຍ+ວ່າຈະເຮັດແນວໃດໃຫ້ໂຕເອງບໍລິສຸດທັງຮ່າງກາຍແລະຈິດໃຈ. ແຕ່ຜູ້ຍິງທີ່ແຕ່ງດອງແລ້ວກໍຈະກັງວົນເລື່ອງສິ່ງຈຳເປັນຂອງຄອບຄົວເພື່ອເຮັດໃຫ້ຜົວພໍໃຈ.
35 ຂ້ອຍເວົ້າແບບນີ້ກໍເພື່ອປະໂຫຍດຂອງພວກເຈົ້າ ບໍ່ແມ່ນເພື່ອຈະບັງຄັບພວກເຈົ້າ ແຕ່ເພື່ອໃຫ້ພວກເຈົ້າເຮັດສິ່ງທີ່ເໝາະສົມ ແລະເພື່ອໃຫ້ພວກເຈົ້າຮັບໃຊ້ຜູ້ເປັນນາຍດ້ວຍສຸດຫົວໃຈສະເໝີໂດຍບໍ່ມີສິ່ງໃດມາຂັດຂວາງ.
36 ແຕ່ຖ້າຜູ້ໃດຄິດວ່າຈະຄວບຄຸມໂຕເອງບໍ່ໄດ້ຖ້າຍັງເປັນໂສດຕໍ່ໄປ ແລະລາວກາຍໄວໜຸ່ມສາວໄປແລ້ວ ກໍໃຫ້ລາວແຕ່ງດອງຕາມທີ່ລາວຕ້ອງການ.+ ຖ້າເຮັດແບບນັ້ນລາວກໍບໍ່ໄດ້ເຮັດຜິດ.
37 ແຕ່ຜູ້ໃດທີ່ຕັ້ງໃຈແທ້ໆແລ້ວວ່າຈະຢູ່ເປັນໂສດແລະຄິດວ່າບໍ່ຈຳເປັນຕ້ອງແຕ່ງດອງ ຖ້າລາວຄວບຄຸມໂຕເອງໄດ້ແລະຍຶດໝັ້ນກັບການຕັດສິນໃຈນັ້ນ ລາວກໍເຮັດດີແລ້ວ.+
38 ຄົນທີ່ແຕ່ງດອງກໍເຮັດດີຄືກັນ ແຕ່ຄົນທີ່ຢູ່ເປັນໂສດກໍເຮັດດີກວ່າ.+
39 ເມຍຕ້ອງຢູ່ກັບຜົວໄປຕະຫຼອດຊີວິດ+ ແຕ່ຖ້າຜົວຕາຍແລ້ວ ເມຍກໍມີອິດສະຫຼະທີ່ຈະແຕ່ງດອງກັບໃຜກໍໄດ້ທີ່ລາວຕ້ອງການ ຖ້າຜູ້ນັ້ນເຊື່ອໃນຜູ້ເປັນນາຍ.+
40 ແຕ່ຂ້ອຍຄິດວ່າຖ້າລາວຢູ່ຄົນດຽວຕໍ່ໄປກໍຈະມີຄວາມສຸກຫຼາຍກວ່າ ແລະຂ້ອຍໝັ້ນໃຈວ່າພະລັງຂອງພະເຈົ້າຊີ້ນຳຂ້ອຍໃຫ້ແນະນຳແບບນີ້.
ຂໍ
^ ຄຳພາສາກຣີກແມ່ນພໍເນຍ. ເບິ່ງຄຳວ່າ “ພໍເນຍ” ໃນສ່ວນອະທິບາຍຄຳສັບ.
^ ໝາຍເຖິງຄວາມສຳພັນທາງເພດ
^ ແປຕາມໂຕວ່າ “ຂອງຂວັນ”
^ ເບິ່ງພາກຜະໜວກ ກ5
^ ຕັດໜັງຫຸ້ມປາຍອະໄວຍະວະເພດຊາຍ
^ ຫຼື “ຄົນທີ່ບໍ່ເຄີຍແຕ່ງດອງ”
