ບົດຮຽນ 11
ຫຼັກການໃນຄຳພີໄບເບິນເປັນປະໂຫຍດຕໍ່ເຮົາຄືແນວໃດ?
1. ເປັນຫຍັງເຮົາຈຶ່ງຈຳເປັນຕ້ອງໄດ້ຮັບການຊີ້ນຳ?
ພະຜູ້ສ້າງຂອງເຮົາສະຫຼາດສຸຂຸມກວ່າເຮົາ. ເຊັ່ນດຽວກັບພໍ່ທີ່ມີຄວາມຮັກ ພະອົງເປັນຫ່ວງພວກເຮົາ. ອີກຢ່າງໜຶ່ງ ພະອົງກໍບໍ່ໄດ້ສ້າງເຮົາໃຫ້ເປັນເອກະເທດຈາກພະອົງ. (ເຢເຣມີ 10:23) ດັ່ງນັ້ນ ຄືກັບເດັກນ້ອຍໆຈຳເປັນຕ້ອງໄດ້ຮັບການຊີ້ນຳຈາກພໍ່ແມ່ ພວກເຮົາທຸກຄົນກໍຈຳເປັນຕ້ອງໃຫ້ພະເຈົ້າຊີ້ນຳ. (ເອຊາອີ 48:17, 18) ຫຼັກການໃນຄຳພີໄບເບິນເປັນຂອງປະທານທີ່ມາຈາກພະເຈົ້າ.—ອ່ານ 2 ຕີໂມເຕ 3:16
ກົດໝາຍຂອງພະເຢໂຫວາເປັນປະໂຫຍດຕໍ່ພວກເຮົາ. ກົດໝາຍໃນພະຄຳພີສອນແນວທາງທີ່ດີທີ່ສຸດໃຫ້ແກ່ພວກເຮົາໃນຕອນນີ້ ແລະບອກໃຫ້ເຮົາຮູ້ວິທີທີ່ຈະໄດ້ຊີວິດຕະຫຼອດໄປໃນອະນາຄົດ. ເນື່ອງຈາກວ່າພະເຈົ້າໄດ້ສ້າງພວກເຮົາ ຈຶ່ງນັບວ່າເໝາະສົມແລ້ວທີ່ເຮົາຈະເຊື່ອຟັງພະອົງ.—ອ່ານຄຳເພງ 19:7, 11; ຄຳປາກົດ 4:11
2. ຫຼັກການໃນຄຳພີໄບເບິນເປັນແນວໃດ?
ຫຼັກການໃນຄຳພີໄບເບິນແມ່ນຫຼັກພື້ນຖານຂອງຄວາມຈິງ. ສ່ວນກົດໝາຍແມ່ນໃຊ້ໃນສະຖານະການໃດໜຶ່ງທີ່ສະເພາະເຈາະຈົງ. (ພະບັນຍັດ 22:8) ເຮົາຕ້ອງໃຊ້ຄວາມສາມາດໃນການຄິດເພື່ອຈະເຂົ້າໃຈແລະນຳໃຊ້ຫຼັກການຕາມແຕ່ລະສະຖານະການ. (ສຸພາສິດ 2:10-12) ຕົວຢ່າງເຊັ່ນ ຫຼັກການໃນຄຳພີໄບເບິນສອນວ່າ ຊີວິດເປັນຂອງປະທານທີ່ມາຈາກພະເຈົ້າ. ບໍ່ວ່າເຮົາກຳລັງເຮັດວຽກ ຢູ່ເຮືອນ ຫຼືຂະນະທີ່ຂັບຂີ່ລົດ ເຮົາໃຫ້ຫຼັກການນີ້ຊີ້ນຳເຮົາ ຈຶ່ງມີການກຽມການປ້ອງກັນໄພ.—ອ່ານກິດຈະການ 17:28
3. ສອງຫຼັກການທີ່ເປັນພື້ນຖານມີຫຍັງແດ່?
ພະເຍຊູເວົ້າເຖິງຫຼັກການສອງຢ່າງທີ່ສຳຄັນທີ່ສຸດ. ຫຼັກການຢ່າງທຳອິດ ບອກໃຫ້ຮູ້ຈຸດມຸ່ງໝາຍຂອງຊີວິດ—ຮູ້ຈັກຮັກແລະຮັບໃຊ້ພະເຈົ້າຢ່າງສັດຊື່. ເຮົາຄວນໃຫ້ຫຼັກການທຳອິດນີ້ຊີ້ນຳເຮົາໃນການຕັດສິນໃຈທຸກເລື່ອງ. (ສຸພາສິດ 3:6) ຄົນທີ່ໃສ່ໃຈກັບຫຼັກການນີ້ຈະມີສາຍ ສຳພັນທີ່ດີກັບພະເຈົ້າ ມີຄວາມສຸກແທ້ ແລະມີຊີວິດຕະຫຼອດໄປ.—ອ່ານມັດທາຍ 22:36-38
ຫຼັກການຢ່າງທີສອງຊີ້ນຳເຮົາໃຫ້ສ້າງສາຍສຳພັນທີ່ເປັນມິດໄມຕີກັບຄົນອື່ນ. (1 ໂກລິນໂທ 13:4-7) ການນຳໃຊ້ຫຼັກການຢ່າງທີສອງນີ້ແມ່ນກ່ຽວຂ້ອງກັບການຮຽນແບບພະເຈົ້າໃນການປະຕິບັດຕໍ່ຄົນອື່ນ.—ອ່ານມັດທາຍ 7:12; 22:39, 40
4. ຫຼັກການໃນຄຳພີໄບເບິນເປັນປະໂຫຍດຕໍ່ເຮົາຄືແນວໃດ?
ຫຼັກການໃນຄຳພີໄບເບິນສອນໃຫ້ຄອບຄົວສາມັກຄີຮັກແພງກັນບົນພື້ນຖານຂອງຄວາມຮັກ. (ໂກໂລດ 3:12-14) ພະຄຳຂອງພະເຈົ້າຍັງປົກປ້ອງຄອບຄົວໂດຍສອນຫຼັກການອີກຢ່າງໜຶ່ງນັ້ນຄື ຊີວິດແຕ່ງດອງເປັນການຜູກພັນທີ່ຖາວອນ.—ອ່ານຕົ້ນເດີມ 2:24
ໂດຍການປະຕິບັດຕາມຫຼັກຄຳສອນໃນຄຳພີໄບເບິນພວກເຮົາຈຶ່ງໄດ້ການປົກປ້ອງທາງດ້ານວັດຖຸແລະທາງອາລົມ. ຕົວຢ່າງເຊັ່ນ ນາຍຈ້າງຕ້ອງການຄົນງານທີ່ໃຊ້ຫຼັກການໃນຄຳພີໄບເບິນເຊິ່ງເປັນຄົນສັດຊື່ແລະດຸໝັ່ນ. (ສຸພາສິດ 10:4, 26; ເຫບເລີ 13:18) ພະຄຳຂອງພະເຈົ້າກໍຍັງສອນພວກເຮົາໃຫ້ອີ່ມໃຈກັບສິ່ງທີ່ຈຳເປັນແລະຖືວ່າສາຍສຳພັນກັບພະເຈົ້າມີຄ່າກວ່າສິ່ງວັດຖຸໃດໆ.—ອ່ານມັດທາຍ 6:24, 25, 33; 1 ຕີໂມເຕ 6:8-10
ການເຮັດຕາມຫຼັກການໃນຄຳພີໄບເບິນເຮັດໃຫ້ເຮົາມີສຸຂະພາບທີ່ແຂງແຮງ. (ສຸພາສິດ 14:30; 22:24, 25) ຕົວຢ່າງເຊັ່ນ ກົດໝາຍຂອງພະເຈົ້າຫ້າມການເມົາເຫຼົ້າເຊິ່ງປ້ອງກັນເຮົາຈາກພະຍາດທີ່ເຖິງແກ່ຄວາມຕາຍ ແລະອຸບັດຕິເຫດ. (ສຸພາສິດ 23:20) ພະເຢໂຫວາອະນຸຍາດໃຫ້ເຮົາດື່ມເຄື່ອງດື່ມປະເພດມຶນເມົາຢ່າງພໍປະມານ. (ຄຳເພງ 104:15; 1 ໂກລິນໂທ 6:10) ຫຼັກການຂອງພະເຈົ້າເປັນປະໂຫຍດແກ່ເຮົາເພາະໃຫ້ການຊີ້ນຳທັງການກະທຳແລະຄວາມຄິດຂອງເຮົາ. (ຄຳເພງ 119:97-100) ແຕ່ຄລິດສະຕຽນແທ້ບໍ່ໄດ້ເຊື່ອຟັງເພາະເຫັນແກ່ຜົນປະໂຫຍດສ່ວນຕົວ. ເຂົາເຈົ້າເຊື່ອຟັງເພາະຕ້ອງການໃຫ້ກຽດພະເຢໂຫວາ.—ອ່ານມັດທາຍ 5:14-16