ປະຖົມມະການ 2:1-25
2 ຕອນນີ້ ທຸກສິ່ງທຸກຢ່າງທີ່ພະເຈົ້າສ້າງທີ່ຢູ່ເທິງຟ້າ ແລະທີ່ຢູ່ໃນໂລກກໍແລ້ວໝົດແລ້ວ.+
2 ເມື່ອມາຮອດມື້ທີ 7 ພະເຈົ້າກໍເຮັດວຽກຂອງເພິ່ນແລ້ວໝົດແລ້ວ ແລະມື້ນັ້ນເພິ່ນໄດ້ເລີ່ມຢຸດພັກຈາກວຽກທັງໝົດຂອງເພິ່ນ.+
3 ພະເຈົ້າໄດ້ອວຍພອນໃຫ້ມື້ທີ 7 ນັ້ນ ແລະໄດ້ກັນມື້ນັ້ນໄວ້ເພື່ອຈຸດປະສົງພິເສດຂອງເພິ່ນ ຍ້ອນເພິ່ນເລີ່ມຢຸດພັກຈາກວຽກທັງໝົດ ເພາະທຸກຢ່າງໄດ້ເປັນໄປຕາມທີ່ເພິ່ນຕ້ອງການແລ້ວ.
4 ທັງໝົດນີ້ແມ່ນເລື່ອງກ່ຽວກັບຕອນທີ່ພະເຢໂຫວາ*ໄດ້ສ້າງຟ້າກັບໂລກ.+
5 ຕອນນັ້ນຍັງບໍ່ມີພືດຜັກເກີດຂຶ້ນເທິງໜ້າດິນເທື່ອ ຍ້ອນວ່າພະເຢໂຫວາຍັງບໍ່ທັນໄດ້ໃຫ້ມີຝົນຕົກໃສ່ດິນ ແລະຍັງບໍ່ມີຄົນເຮັດໄຮ່ເຮັດສວນ.
6 ແຕ່ມີອາຍນ້ຳຂຶ້ນມາຈາກໜ້າດິນເຮັດໃຫ້ດິນຊຸ່ມ.
7 ແລ້ວພະເຢໂຫວາພະເຈົ້າໄດ້ສ້າງຄົນຈາກຂີ້ດິນ+ ແລະເປົ່າລົມໃສ່ຮູດັງເຮັດໃຫ້ລາວມີຊີວິດ+ ຄົນນັ້ນຈຶ່ງມີຊີວິດ.+
8 ພະເຢໂຫວາພະເຈົ້າໄດ້ສ້າງສວນໜຶ່ງຊື່ເອເດັນ+ໄວ້ທາງທິດຕາເວັນອອກ ແລະໃຫ້ມະນຸດຢູ່ຫັ້ນ.+
9 ພະເຢໂຫວາພະເຈົ້າເຮັດໃຫ້ມີຕົ້ນໄມ້ທຸກຊະນິດທີ່ສວຍງາມແລະມີໝາກເປັນຕາກິນ ລວມທັງຕົ້ນໄມ້ທີ່ໃຫ້ຊີວິດ+ທີ່ຢູ່ກາງສວນ ແລະຕົ້ນໄມ້ທີ່ໃຫ້ຮູ້ຄວາມດີຄວາມຊົ່ວ.+
10 ມີແມ່ນ້ຳທີ່ໄຫຼອອກມາຈາກສວນເອເດັນເພື່ອເຮັດໃຫ້ສວນນັ້ນຊຸ່ມ. ແມ່ນ້ຳນັ້ນແບ່ງອອກເປັນ 4 ສາຍ.
11 ແມ່ນ້ຳສາຍທຳອິດຊື່ປີໂຊນ. ແມ່ນ້ຳນີ້ໄຫຼອ້ອມຮາວິລາເຊິ່ງເປັນບ່ອນທີ່ມີຄຳຫຼາຍ.
12 ຄຳຢູ່ບ່ອນນັ້ນດີຫຼາຍ ຍັງມີຢາງໄມ້ຫອມແລະຫີນໂອນິກນຳອີກ.
13 ແມ່ນ້ຳສາຍທີ 2 ຊື່ກີໂຮນ. ແມ່ນ້ຳນີ້ໄຫຼອ້ອມກູເຊ.*
14 ແມ່ນ້ຳສາຍທີ 3 ຊື່ຕິກຣິດ.+ ແມ່ນ້ຳນີ້ໄຫຼໄປທາງທິດຕາເວັນອອກຂອງອັດຊີເຣຍ.+ ແມ່ນ້ຳສາຍທີ 4 ຊື່ເອິຟາຣາດ.+
15 ພະເຢໂຫວາພະເຈົ້າໃຫ້ຜູ້ຊາຍຄົນນັ້ນຢູ່ໃນສວນເອເດັນ. ເພິ່ນໃຫ້ລາວເບິ່ງແຍງແລະຂະຫຍາຍສວນນັ້ນ.+
16 ພະເຢໂຫວາພະເຈົ້າບອກຜູ້ຊາຍຄົນນັ້ນວ່າ: “ເຈົ້າກິນໝາກໄມ້ທຸກຊະນິດໃນສວນໄດ້ຢ່າງເຕັມທີໂລດ.+
17 ແຕ່ຫ້າມເຈົ້າກິນໝາກໄມ້ທີ່ໃຫ້ຮູ້ຄວາມດີຄວາມຊົ່ວນັ້ນ ຖ້າເຈົ້າກິນມື້ໃດເຈົ້າກໍຈະຕາຍມື້ນັ້ນ.”+
18 ຈາກນັ້ນ ພະເຢໂຫວາພະເຈົ້າບອກວ່າ: “ຖ້າຈະໃຫ້ຜູ້ຊາຍຄົນນັ້ນຢູ່ຜູ້ດຽວມັນກໍບໍ່ດີ ເຮົາຈະສ້າງຜູ້ຊ່ວຍເພື່ອໃຫ້ເປັນຄູ່ຂອງລາວ.”+
19 ພະເຢໂຫວາພະເຈົ້າໄດ້ພາສັດທີ່ເພິ່ນສ້າງຈາກຂີ້ດິນ ທັງສັດປ່າແລະສັດທີ່ບິນໄດ້ທຸກຊະນິດມາຫາມະນຸດ ເພື່ອເບິ່ງວ່າລາວຈະເອີ້ນສັດເຫຼົ່ານັ້ນແນວໃດ. ບໍ່ວ່າລາວຈະເອີ້ນພວກມັນແນວໃດ ພວກມັນກໍມີຊື່ຕາມນັ້ນ.+
20 ຜູ້ຊາຍຄົນນັ້ນໄດ້ຕັ້ງຊື່ໃຫ້ສັດທັງໝົດ ທັງສັດບ້ານ ສັດປ່າ ແລະສັດທີ່ບິນໄດ້ທຸກຊະນິດຢູ່ເທິງຟ້າ. ແຕ່ລາວຍັງບໍ່ທັນມີຜູ້ຊ່ວຍທີ່ຈະມາເປັນຄູ່ຂອງລາວເທື່ອ.
21 ພະເຢໂຫວາພະເຈົ້າເລີຍເຮັດໃຫ້ຜູ້ຊາຍຄົນນັ້ນນອນຫຼັບແບບບໍ່ຮູ້ສຶກໂຕ. ໃນຕອນທີ່ລາວນອນຫຼັບຢູ່ ເພິ່ນໄດ້ເອົາກະດູກຂ້າງອັນໜຶ່ງຂອງລາວອອກ ແລະເຮັດໃຫ້ໜັງຈອດຕິດກັນຄືເກົ່າ.
22 ພະເຢໂຫວາພະເຈົ້າເອົາກະດູກຂ້າງຂອງຜູ້ຊາຍຄົນນັ້ນສ້າງເປັນຜູ້ຍິງ ແລະເອົາຜູ້ຍິງຄົນນັ້ນໃຫ້ລາວ.+
23 ຜູ້ຊາຍຄົນນັ້ນເລີຍເວົ້າວ່າ:
“ກະດູກຂອງລາວກໍມາຈາກກະດູກຂ້ອຍເຮົາຕົ໋ວນິແລະເນື້ອໜັງຂອງລາວກໍແມ່ນເນື້ອໜັງຂ້ອຍເຮົາຕົ໋ວນິ.
ຄັນຊັ້ນ ຂ້ອຍຊິເອີ້ນລາວວ່າຜູ້ຍິງເພາະວ່າລາວຖືກສ້າງຈາກຜູ້ຊາຍ.”+
24 ດັ່ງນັ້ນ ຜູ້ຊາຍຈະຈາກພໍ່ແມ່ໄປຢູ່ກັບເມຍ ແລະເຂົາເຈົ້າກໍຈະເປັນອັນໜຶ່ງອັນດຽວກັນ.*+
25 ຜູ້ຊາຍຄົນນັ້ນກັບເມຍປະເປືອຍຢູ່+ ແຕ່ກໍບໍ່ອາຍເລີຍ.
ຂໍ ຄວາມ ໄຂ ເງື່ອນ
^ ນີ້ເປັນເທື່ອທຳອິດທີ່ມີຊື່ຂອງພະເຈົ້າ. ໃນພາສາເຮັບເຣີແມ່ນ יהוה (ຍຫວຫ). ເບິ່ງພາກຜະໜວກ ກ4.
^ ຫຼື “ເອທິໂອເປຍ”
^ ຫຼື “ເປັນຄືກັບຄົນໆດຽວກັນ”