ຈົດໝາຍເຖິງຄລິດສະຕຽນໃນເມືອງໂກໂລຊາຍ 3:1-25
3 ໃນເມື່ອພະເຈົ້າເຮັດໃຫ້ພວກເຈົ້າມີຊີວິດຮ່ວມກັບພະຄລິດແລ້ວ+ ພວກເຈົ້າຕ້ອງໃຫ້ຄວາມສຳຄັນກັບສິ່ງຕ່າງໆທີ່ຢູ່ໃນສະຫວັນສະເໝີ ເຊິ່ງເປັນບ່ອນທີ່ພະຄລິດນັ່ງຢູ່ເບື້ອງຂວາມືຂອງພະເຈົ້າ.+
2 ໃຫ້ພວກເຈົ້າຄິດເຖິງແຕ່ສິ່ງທີ່ຢູ່ໃນສະຫວັນສະເໝີ+ ບໍ່ແມ່ນຄິດເຖິງສິ່ງທີ່ຢູ່ໃນໂລກນີ້.+
3 ພວກເຈົ້າຕາຍແລ້ວ ແລະຊີວິດຂອງພວກເຈົ້າຝາກໄວ້ກັບພະຄລິດຕາມທີ່ພະເຈົ້າຕ້ອງການ.
4 ເມື່ອພະຄລິດຜູ້ເປັນຊີວິດຂອງພວກເຮົາ+ມາສະແດງລິດເດດຂອງເພິ່ນ ພວກເຈົ້າກໍຈະມາພ້ອມກັບກຽດຂອງເພິ່ນ.+
5 ໃຫ້ພວກເຈົ້າກຳຈັດຄວາມຕ້ອງການຂອງອະໄວຍະວະຕ່າງໆໃນຮ່າງກາຍ+ເຊິ່ງແມ່ນການເຮັດຜິດສິນລະທຳທາງເພດ* ການກະທຳທີ່ບໍ່ສະອາດ ຕັນຫາແບບທີ່ບໍ່ມີການຄວບຄຸມ+ ຄວາມຕ້ອງການທີ່ສ້າງຄວາມເສຍຫາຍ ແລະຄວາມໂລບທີ່ເປັນຮູບແບບໜຶ່ງຂອງການຂາບໄຫວ້ຮູບບູຊາ.
6 ພະເຈົ້າຈະສະແດງຄວາມໃຈຮ້າຍຕໍ່ຄົນທີ່ເຮັດສິ່ງເຫຼົ່ານັ້ນ.
7 ແຕ່ກີ້ ພວກເຈົ້າກໍເຄີຍເຮັດສິ່ງເຫຼົ່ານີ້ຕອນທີ່ໃຊ້ຊີວິດແບບເກົ່າ.+
8 ແຕ່ຕອນນີ້ ພວກເຈົ້າຕ້ອງກຳຈັດຄວາມໃຈຮ້າຍ ການຮ້າຍໃສ່ຄົນອື່ນ ຄວາມຊົ່ວ+ ແລະການເວົ້າດູຖູກໃຫ້ໝົດໄປຈາກພວກເຈົ້າ.+ ຢ່າໃຫ້ຄຳເວົ້າລາມົກ+ອອກມາຈາກປາກພວກເຈົ້າ.
9 ຢ່າເວົ້າຕົວະກັນ.+ ໃຫ້ຖິ້ມ*ນິດໄສເກົ່າ+ກັບສິ່ງຕ່າງໆທີ່ເຄີຍເຮັດ
10 ແລ້ວໃຫ້ປ່ຽນ*ນິດໄສໃໝ່+ທີ່ມາຈາກພະເຈົ້າໂດຍໃຊ້ຄວາມຮູ້ທີ່ຖືກຕ້ອງ ເຊິ່ງເປັນນິດໄສທີ່ຄ່ອຍໆຖືກສ້າງຂຶ້ນຕາມແບບເພິ່ນ.+
11 ເມື່ອມີນິດໄສແບບນັ້ນກໍຈະບໍ່ມີການແບ່ງແຍກລະຫວ່າງຄົນກຣີກກັບຄົນຢິວ ຄົນທີ່ຮັບສິນຕັດ*ກັບຄົນທີ່ບໍ່ຮັບສິນຕັດ ຄົນຕ່າງຊາດ ຄົນຊີເທຍ* ທາດຫຼືຄົນທີ່ມີອິດສະຫຼະ. ພະຄລິດກ່ຽວຂ້ອງກັບທຸກດ້ານຂອງນິດໄສນີ້ ແລະພວກເຮົາກໍເປັນອັນໜຶ່ງອັນດຽວກັບເພິ່ນ.+
12 ເມື່ອພວກເຈົ້າເປັນຄົນທີ່ພະເຈົ້າເລືອກແລ້ວ+ ເປັນຄົນບໍລິສຸດແລະເປັນຄົນທີ່ເພິ່ນຮັກ ກໍໃຫ້ປູກຝັງ*ຄວາມເຫັນອົກເຫັນໃຈ+ ຄວາມເມດຕາ ຄວາມຖ່ອມ+ ຄວາມອ່ອນໂຍນ+ ແລະຄວາມອົດທົນ.+
13 ແຕ່ຖ້າຜູ້ໃດມີສາເຫດຈະຈົ່ມໃຫ້ຄົນອື່ນ+ ກໍຂໍໃຫ້ອົດທົນຕໍ່ກັນແລະກັນ ແລະໃຫ້ອະໄພກັນຢ່າງໃຈກວ້າງຕໍ່ໆໄປ.+ ພວກເຈົ້າຕ້ອງເຕັມໃຈໃຫ້ອະໄພໃຫ້ກັນຄືກັບທີ່ພະເຢໂຫວາ*ເຕັມໃຈໃຫ້ອະໄພໃຫ້ພວກເຈົ້າ.+
14 ນອກຈາກນັ້ນ ໃຫ້ປູກຝັງຄວາມຮັກ+ ຍ້ອນຄວາມຮັກຜູກພັນຄົນເຮົາໃຫ້ເປັນນ້ຳໜຶ່ງໃຈດຽວກັນ.+
15 ຂໍໃຫ້ສັນຕິສຸກຈາກພະຄລິດເປັນພະລັງຄວບຄຸມໃຈພວກເຈົ້າ+ ຍ້ອນພວກເຈົ້າຖືກເລືອກເພື່ອໃຫ້ເປັນອະໄວຍະວະໃນຮ່າງກາຍດຽວທີ່ມີສັນຕິສຸກ ແລະໃຫ້ພວກເຈົ້າສະແດງຄວາມຂອບໃຈ.
16 ໃຫ້ຄຳສອນຂອງພະຄລິດມີຜົນຕໍ່ພວກເຈົ້າຢ່າງເຕັມທີແລະເຮັດໃຫ້ພວກເຈົ້າມີສະຕິປັນຍາທຸກຢ່າງ. ໃຫ້ພວກເຈົ້າສອນແລະໃຫ້ກຳລັງໃຈກັນ*ສະເໝີດ້ວຍເພງສັນລະເສີນ+ ເພງຍ້ອງຍໍພະເຈົ້າ ແລະເພງນະມັດສະການພະເຈົ້າທີ່ຮ້ອງດ້ວຍຄວາມສຳນຶກບຸນຄຸນ. ໃຫ້ຮ້ອງເພງຈາກໃຈໃຫ້ພະເຢໂຫວາ*ສະເໝີ.+
17 ບໍ່ວ່າພວກເຈົ້າຈະເວົ້າຫຼືເຮັດຫຍັງ ກໍໃຫ້ເຮັດທຸກສິ່ງໃນນາມພະເຢຊູຜູ້ເປັນນາຍ ແລະຂອບໃຈພະເຈົ້າຜູ້ເປັນພໍ່ຂອງພວກເຮົາໃນນາມພະເຢຊູ.+
18 ຜູ້ທີ່ເປັນເມຍ ໃຫ້ເຊື່ອຟັງຜົວ+ ຍ້ອນເປັນສິ່ງທີ່ລູກສິດຂອງພະຄລິດຄວນເຮັດ.
19 ຜູ້ທີ່ເປັນຜົວ ໃຫ້ຮັກເມຍສະເໝີ+ແລະຢ່າຮຸນແຮງຕໍ່ເມຍ.+
20 ຜູ້ທີ່ເປັນລູກ ໃຫ້ເຊື່ອຟັງພໍ່ແມ່ສະເໝີ+ ຍ້ອນການເຮັດແນວນັ້ນເຮັດໃຫ້ພະຄລິດພໍໃຈ.
21 ຜູ້ທີ່ເປັນພໍ່ ຢ່າຍົວະລູກໃຫ້ໃຈຮ້າຍ*+ເພື່ອລູກຈະບໍ່ທໍ້ໃຈ.
22 ຜູ້ທີ່ເປັນທາດ ໃຫ້ເຊື່ອຟັງນາຍທີ່ເປັນມະນຸດສະເໝີ+ ບໍ່ແມ່ນເຊື່ອຟັງແຕ່ຕອນທີ່ນາຍເຫັນເພື່ອເອົາໃຈລາວເທົ່ານັ້ນ ແຕ່ໃຫ້ເຊື່ອຟັງຈາກໃຈດ້ວຍຄວາມຢ້ານຢຳພະເຢໂຫວາ.*
23 ບໍ່ວ່າພວກເຈົ້າຈະເຮັດຫຍັງ ກໍໃຫ້ເຮັດສຸດຄວາມສາມາດຄືກັບເຮັດໃຫ້ພະເຢໂຫວາ*+ ບໍ່ແມ່ນເຮັດໃຫ້ມະນຸດ.
24 ພວກເຈົ້າຮູ້ແລ້ວວ່າຈະໄດ້ຮັບລາງວັນ*ຈາກພະເຢໂຫວາ.*+ ໃຫ້ເຮັດວຽກແບບທາດເພື່ອພະຄລິດຜູ້ເປັນນາຍ.
25 ສ່ວນຄົນທີ່ເຮັດຜິດກໍຈະໄດ້ຮັບຜົນຕາມຄວາມຜິດຂອງໂຕເອງແນ່ນອນ+ ຍ້ອນພະເຈົ້າບໍ່ລຳອຽງ.+
ຂໍ ຄວາມ ໄຂ ເງື່ອນ
^ ຄຳພາສາກຣີກແມ່ນພໍເນຍ. ເບິ່ງຄຳວ່າ “ພໍເນຍ” ໃນສ່ວນອະທິບາຍຄຳສັບ.
^ ແປຕາມໂຕວ່າ “ແກ້”
^ ແປຕາມໂຕວ່າ “ນຸ່ງ.” ໝາຍເຖິງການນຸ່ງເຄື່ອງໂຕໃໝ່.
^ ຕັດໜັງຫຸ້ມປາຍອະໄວຍະວະເພດຊາຍ
^ ໝາຍເຖິງຄົນປ່າເຖື່ອນ
^ ແປຕາມໂຕວ່າ “ນຸ່ງ”
^ ເບິ່ງພາກຜະໜວກ ກ5
^ ຫຼື “ເຕືອນສະຕິກັນ”
^ ເບິ່ງພາກຜະໜວກ ກ5
^ ຫຼື “ໃຫ້ຫງຸດຫງິດ”
^ ເບິ່ງພາກຜະໜວກ ກ5
^ ເບິ່ງພາກຜະໜວກ ກ5
^ ແປຕາມໂຕວ່າ “ໄດ້ຮັບມໍລະດົກເປັນລາງວັນ”
^ ເບິ່ງພາກຜະໜວກ ກ5