ບົດຮຽນ 7
ລາຊະອານາຈັກຂອງພະເຈົ້າແມ່ນຫຍັງ?
1. ລາຊະອານາຈັກຂອງພະເຈົ້າແມ່ນຫຍັງ?
ມີຫຍັງເຮັດໃຫ້ພະເຍຊູເປັນກະສັດທີ່ເໝາະສົມ?—ມາລະໂກ 1:40-42
ລາຊະອານາຈັກຂອງພະເຈົ້າເປັນລັດຖະບານທາງພາກສະຫວັນ. ລາຊະອານາຈັກນີ້ຈະເຂົ້າມາປົກຄອງແທນການປົກຄອງອື່ນໆທັງໝົດ ແລະຈະເຮັດຕາມໃຈປະສົງຂອງພະເຈົ້າໃນສະຫວັນແລະແຜ່ນດິນໂລກໃຫ້ສຳເລັດ. ຂ່າວກ່ຽວກັບລາຊະອານາຈັກຂອງພະເຈົ້າເປັນຂ່າວດີ. ອີກບໍ່ດົນ ລາຊະອານາຈັກຂອງພະເຈົ້າຈະປົກຄອງໃນແບບທີ່ເຮັດໃຫ້ມະນຸດຊາດເພິ່ງພໍໃຈ ແລະຈະເຮັດໃຫ້ທຸກຄົນໃນໂລກເປັນເອກະພາບກັນ.—ອ່ານດານຽນ 2:44; ມັດທາຍ 6:9, 10; 24:14
ລາຊະອານາຈັກຈະຕ້ອງມີກະສັດ. ພະເຢໂຫວາໄດ້ແຕ່ງຕັ້ງພະເຍຊູຄລິດລູກຊາຍຂອງພະອົງໃຫ້ເປັນກະສັດໃນລາຊະອານາຈັກນັ້ນ.—ອ່ານຄຳປາກົດ 11:15
ເບິ່ງວິດີໂອ ລາຊະອານາຈັກຂອງພະເຈົ້າແມ່ນຫຍັງ?
2. ເປັນຫຍັງພະເຍຊູຈຶ່ງເປັນກະສັດທີ່ເໝາະສົມທີ່ສຸດ?
ລູກຊາຍຂອງພະເຈົ້າເປັນກະສັດທີ່ເໝາະສົມທີ່ສຸດ ເພາະພະອົງເປັນຜູ້ປົກຄອງທີ່ກະລຸນາແລະພະອົງຍຶດໝັ້ນໃນສິ່ງທີ່ຖືກຕ້ອງ. (ມັດທາຍ 11:28-30) ພະອົງຍັງມີອຳນາດເຕັມທີທີ່ຈະຊ່ວຍປະຊາຊົນ ເພາະພະເຍຊູຈະປົກຄອງໂລກຈາກສະຫວັນ. ຫຼັງຈາກພະອົງຖືກປຸກໃຫ້ຄືນຈາກຕາຍ ພະອົງຂຶ້ນໄປສະຫວັນແລ້ວນັ່ງຖ້າຢູ່ເບື້ອງຂວາມືຂອງພະເຢໂຫວາ. (ເຫບເລີ 10:12, 13) ໃນທີ່ສຸດພະເຈົ້າກໍໄດ້ມອບອຳນາດໃຫ້ພະອົງເລີ່ມປົກຄອງ.—ອ່ານດານຽນ 7:13, 14
3. ຜູ້ໃດຈະຮ່ວມປົກຄອງກັບພະເຍຊູ?
ບຸກຄົນກຸ່ມໜຶ່ງທີ່ເອີ້ນວ່າ “ພວກບໍລິສຸດ” ຈະປົກຄອງຮ່ວມກັບພະເຍຊູໃນສະຫວັນ. (ດານຽນ 7:27) ພວກຜູ້ບໍລິສຸດກຸ່ມທຳອິດທີ່ພະເຍຊູເລືອກແມ່ນເຫຼົ່າອັກຄະສາວົກທີ່ສັດຊື່. ພະເຢໂຫວາຍັງຄັດເລືອກຊາຍຍິງທີ່ສັດຊື່ທີ່ເປັນພວກບໍລິສຸດຈົນເຖິງທຸກມື້ນີ້. ເຂົາເຈົ້າຖືກປຸກໃຫ້ເປັນກາຍວິນຍານຄືກັບພະເຍຊູ.—ອ່ານໂຢຮັນ 14:1-3; 1 ໂກລິນໂທ 15:42-44
ຜູ້ທີ່ຈະໄປສະຫວັນມີຈຳນວນເທົ່າໃດ? ມີຈຳນວນ 144.000 ຄົນ. ພະເຍຊູເອີ້ນເຂົາເຈົ້າວ່າ “ຝູງນ້ອຍ.” (ລືກາ 12:32) ເຂົາເຈົ້າຈະປົກຄອງໂລກນີ້ຮ່ວມກັບພະເຍຊູ.—ອ່ານຄຳປາກົດ 14:1
4. ເມື່ອພະເຍຊູເລີ່ມປົກຄອງແລ້ວເກີດຫຍັງຂຶ້ນ?
ລາຊະອານາຈັກຂອງພະເຈົ້າເລີ່ມປົກຄອງໃນປີ 1914. * ສິ່ງທຳອິດທີ່ກະສັດເຍຊູເຮັດແມ່ນຂັບໄລ່ຊາຕານແລະພວກຜີປີສາດຂອງມັນໃຫ້ລົງມາໂລກນີ້. ຊາຕານຈຶ່ງຄຽດຮ້າຍຫຼາຍແລະກໍ່ບັນຫາຂຶ້ນທົ່ວໂລກ. (ຄຳປາກົດ 12:7-10, 12) ຕັ້ງແຕ່ນັ້ນ ມະນຸດກໍປະສົບໄພວິບັດເພີ່ມຂຶ້ນເລື້ອຍໆ. ສົງຄາມ ການຂາດແຄນອາຫານ ໂລກລະບາດ ແລະແຜ່ນດິນໄຫວໃຫຍ່ ທັງໝົດນີ້ເປັນສ່ວນໜຶ່ງຂອງໝາຍ “ສຳຄັນ” ທີ່ບົ່ງບອກວ່າອີກບໍ່ດົນລາຊະອານາຈັກຈະຄວບຄຸມຈັດການເລື່ອງຕ່າງໆໃນໂລກນີ້ຢ່າງເຕັມທີ.—ອ່ານລືກາ 21:7, 10, 11, 31
5. ລາຊະອານາຈັກຂອງພະເຈົ້າຈະເຮັດຫຍັງໃຫ້ສຳເລັດ?
ໂດຍການປະກາດໄປທົ່ວໂລກ ລາຊະອານາຈັກຂອງພະເຈົ້າກຳລັງທ້ອນໂຮມຄົນຈາກທຸກຊາດໃຫ້ເປັນກຸ່ມໃຫຍ່ທີ່ມີເອກະພາບ. ຫຼາຍລ້ານຄົນທີ່ຖ່ອມໃຈໄດ້ມາຢູ່ໃຕ້ການປົກຄອງຂອງພະເຍຊູ. ລາຊະອານາຈັກຈະປົກປ້ອງເຂົາເຈົ້າຕອນທີ່ລະບົບຊົ່ວຂອງໂລກນີ້ຖືກທຳລາຍ. ດັ່ງນັ້ນ ຜູ້ທີ່ຢາກໄດ້ຮັບປະໂຫຍດຈາກການປົກຄອງຂອງພະເຈົ້າຄວນຈະຮຽນຮູ້ທີ່ຈະເຊື່ອຟັງພະເຍຊູ.—ອ່ານຄຳປາກົດ 7:9, 14, 16, 17
ໃນລະຫວ່າງ 1.000 ປີ ລາຊະອານາຈັກຂອງພະເຈົ້າຈະເຮັດໃຫ້ຈຸດປະສົງດັ້ງເດີມຂອງພະອົງສຳລັບມະນຸດຊາດສຳເລັດ. ທົ່ວໂລກຈະເປັນອຸທິຍານ. ໃນທີ່ສຸດ ພະເຍຊູຈະມອບລາຊະອານາຈັກນີ້ຄືນໃຫ້ພະບິດາ. (1 ໂກລິນໂທ 15:24-26) ທ່ານຢາກບອກຄົນທີ່ທ່ານຮູ້ຈັກໃຫ້ຮູ້ເລື່ອງລາຊະອານາຈັກບໍ?—ອ່ານຄຳເພງ 37:10, 11, 29
^ ຂໍ້ 6 ສຳລັບລາຍລະອຽດທີ່ຄຳພະຍາກອນໃນຄຳພີໄບເບິນບອກໄວ້ລ່ວງໜ້າເຖິງປີ 1914 ແນວໃດ ເຊີນອ່ານໜ້າທີ 215-218 ຂອງປຶ້ມ ຄຳພີໄບເບິນສອນແນວໃດແທ້ໆ?
