Матай 5:1—48
-
ТАУДАҒЫ УАҒЫЗ (1—48)
5 Қалың жұртты көрген Иса тауға көтерілді. Ол жайғасып отырған соң, шәкірттері қасына келді.
2 Иса оларға былай деп тәлім бере бастады:
3 “Құдайды танып-білгісі келетіндер* бақытты+, өйткені Көк Патшалығы соларға тиесілі.
4 Қайғырғандар бақытты, өйткені олар жұбаныш табады+.
5 Момындар*+ бақытты, өйткені олар жерді мұра етеді+.
6 Әділдікті аңсағандар* бақытты+, өйткені олар толықтай қанағаттандырылады+.
7 Мейірімділер бақытты+, өйткені оларға мейірім көрсетіледі.
8 Ақжүректілер бақытты+, өйткені олар Құдайды көреді.
9 Татуластырушылар+ бақытты, өйткені олар Құдайдың балалары деп аталады.
10 Әділдік үшін қудаланып жүргендер бақытты+, өйткені Көк Патшалығы соларға тиесілі.
11 Маған бола жұрт сендерді қорлап+, қудалап+ не түрлі жала жауып жамандаса, бақыттысыңдар+.
12 Қуанып, шаттаныңдар+, өйткені көкте сендерді зор сый күтіп тұр+. Жұрт сендерден бұрынғы пайғамбарларды да солай қудалаған+.
13 Сендер жердің тұзысыңдар+. Ал тұз күшінен айырылса, оның қасиетін қалай қалпына келтіруге болады? Еш нәрсеге жарамсыз болып қалғандықтан, оны көшеге лақтырып, аяқ астына тастау ғана қалады+.
14 Сендер дүниенің жарығысыңдар+. Тау басында орналасқан қала көзден таса қала алмайды.
15 Шам жаққан адам оны ыдыспен бүркеп қоймайды, қайта, шамдалға қояды. Сонда оның жарығы үйдегілердің бәріне түседі+.
16 Сол сияқты, сендердегі жарық адамдар алдында жарқырап тұрсын+. Осылайша олар игі істеріңді көріп+, көктегі Әкелеріңді мадақтасын+.
17 Мені Мұса Заңын не пайғамбарлардың сөздерін жоққа шығаруға келді деп ойламаңдар. Мен оларды жоққа шығару үшін емес, қайта, орындау үшін келдім+.
18 Сендерге шындығын айтамын, аспан мен жер құрып жоқ болып кетсе де, Мұса Заңының ең кішкентай әрпі, тіпті бір сызығы да жоқ болып кетпейді, онда жазылғандардың бәрі орындалады+.
19 Сондықтан ондағы заңдардың ең кішкентай дегенін бұзып, басқаларды да соған үйрететін адам Көк Патшалығында ең кішкентай болып есептеледі*. Ал заңдарды орындап, соларды басқаларға да үйрететін адам Көк Патшалығында ұлы болып есептеледі*.
20 Сендерге былай деймін: әділдіктерің дін мұғалімдері мен парызшылдардікінен артық болмаса+, Көк Патшалығына кірмейсіңдер+.
21 Ежелгі замандағы адамдарға “Кісі өлтірме+! Кім кісі өлтірсе, сот алдында жауап береді+” делінгенін естігенсіңдер.
22 Ал мен сендерге былай деймін: бауырласына ашулануын қоймайтын+ адам сот алдында жауап береді; бауырласына тіл тигізетін адам болса Жоғарғы сот* алдында жауап береді. Ал кімде-кім бауырласына: “Оңбаған неме!”— десе, отты жаһаннамға* тасталады+.
23 Егер құрбандық ошағына сый-тартуыңды алып келгенде+, бауырласыңның саған реніші бар екені сол жерде есіңе түссе,
24 сыйыңды сонда қалдыр да, барып, алдымен онымен татулас. Содан кейін ғана қайтып келіп, сый-тартуыңды ұсын+.
25 Сотқа бара жатқан жолда айыптаушыңмен мәселеңді тезірек шеш, әйтпесе айыптаушың сені сотқа, ал ол сот орындаушысына тапсырады, сот орындаушысы болса сені түрмеге тастайды+.
26 Саған шындығын айтамын, берешегіңді соңғы тиынына* дейін төлемейінше, сол жерден шықпайсың!
27 Сендер “Неке адалдығын бұзба!”+ дегенді естігенсіңдер.
28 Ал мен сендерге былай деймін: кімде-кім бір әйелге құмарта қараса+, өз жүрегінде сол әйелмен неке адалдығын бұзғаны+.
29 Егер оң көзің күнәға азғырса*, оны ойып алып, лақтырып таста+. Себебі бүкіл денеңнің жаһаннамға тасталғанынан гөрі бір мүшеңнен айырылғаның артық+.
30 Егер оң қолың күнәға азғырса, оны шауып алып, лақтырып таста+. Себебі бүкіл денеңнің жаһаннамға түскенінен гөрі бір мүшеңнен айырылғаның артық+.
31 “Кімде-кім әйелімен ажыраспақ болса, оған талақ қағазын берсін+” деген сөз де бар.
32 Ал мен сендерге былай деймін: азғындық* жасамаған әйелімен ажырасқан адам оның неке адалдығын бұзуына түрткі болады. Осылай ажырасқан әйелге үйленген адам да неке адалдығын бұзады+.
33 Ежелгі замандағы адамдарға “Антыңды бұзба+, Ехобаға берген сертіңді орында+!” делінгенін де естігенсіңдер.
34 Ал мен сендерге былай деймін: мүлдем ант беруші болма+! Көкпен ант берме, өйткені ол — Құдайдың тағы;
35 жермен де ант берме, өйткені ол — оның табан тіреніші+; Иерусалиммен де ант берме, өйткені ол — ұлы Патшаның қаласы+.
36 Өз басыңмен де ант етпе, өйткені тіпті бір тал шашыңды ағарта не қарайта алмайсың.
37 Сендердің “иә” дегендерің “иә”, ал “жоқ” дегендерің “жоқ” болсын+. Бұдан артық айтылғандар Зұлымнан*+.
38 Сендер “көз үшін көз, тіс үшін тіс”+ дегенді естігенсіңдер.
39 Ал мен сендерге былай деймін: зұлым адамға қарсыласпа. Біреу оң жағыңнан салып жіберсе, оған сол жағыңды да тос+.
40 Егер біреу сенімен соттасып, көйлегіңді алғысы келсе, сырт киіміңді қоса бер+.
41 Егер билігі бар біреу бір шақырым* жерге еріп жүруге мәжбүрлесе, онымен екі шақырым жүр.
42 Сұрағанға керегін бер, қарыз* алғысы келгеннен теріс айналма+.
43 Сендер “бауырласыңды* сүй+, жауыңды жек көр” дегенді естігенсіңдер.
44 Ал мен сендерге былай деймін: жауларыңды ұдайы жақсы көріңдер+ және өздеріңді қудалағандар үшін дұға ете беріңдер+.
45 Осылайша көктегі Әкелеріңнің балалары боласыңдар+, себебі ол жамандарға да, жақсыларға да күн сәулесін төккізіп, әділдерге де, әділетсіздерге де жаңбыр жаудырады+.
46 Егер өздеріңді жақсы көретіндерді ғана жақсы көрсеңдер, қандай сый күтесіңдер+? Салықшылар да солай етеді емес пе?
47 Ал бауырластарыңмен ғана амандасар болсаңдар*, қандай ерекше іс істейсіңдер? Басқа ұлт адамдары да солай етеді емес пе?
48 Көктегі Әкелерің кемелді, сондықтан сендер де кемелді болыңдар+.
Сілтемелер
^ Немесе “рухани мұқтаждығын мойындайтындар”.
^ Немесе “жұмсақ адамдар”.
^ Сөзбе-сөз “ашығып, сусағандар”.
^ Яғни Көк Патшалығына кіруге лайықсыз болады.
^ Яғни Көк Патшалығына кіруге лайық болады.
^ Бұл — Иерусалимнің сыртындағы қоқыс өртейтін орын. Түсіндірмені қараңыз.
^ Яғни яһудилердің Жоғарғы кеңесі.
^ Сөзбе-сөз “кодрант”. Ә14 қосымшасын қараңыз.
^ Сөзбе-сөз “сүріндірсе”. 30-тармақта да осы сөз қолданылған.
^ Грекше “порниа”. Түсіндірмені қараңыз.
^ Яғни Шайтаннан.
^ Сөзбе-сөз “миль”. Түсіндірмені қараңыз.
^ Яғни өсімсіз қарыз.
^ Немесе “өзге адамды”.
^ Немесе “амандық тілесеңдер”.
