Матай 20:1—34
20 Көк Патшалығы таң сәріде жұмысшылар жалдау үшін шыққан жүзімдік иесіне ұқсайды+.
2 Ол жұмысшылармен күніне бір динар* төлейтін болып келісіп, оларды жүзімдігіне жібереді.
3 Үшінші сағатта* ол тағы шығып, базар алаңында жұмыссыз тұрған басқа да адамдарды көреді де,
4 оларға: —Сендер де жүзімдігіме барыңдар. Тиісті ақыларыңды төлеймін,— дейді.
5 Олар сонда барады. Ол алтыншы сағат* және тоғызыншы сағат* шамасында да солай етеді.
6 Он бірінші сағат* шамасында тағы барып, жұмыссыз тұрған басқаларды көреді де: —Неге күні бойы бос тұрсыңдар?— деп сұрайды.
7 Олар: —Бізді ешкім жалдаған жоқ,— дейді. Сонда ол: —Сендер де жүзімдігіме барыңдар,— дейді.
8 Кеш түскенде жүзімдік иесі іс басқарушысына: —Жұмысшыларды шақырып, жалақыларын бер+. Соңғыларынан бастап, біріншілерімен аяқта,— деп тапсырды.
9 Содан он бірінші сағаттан бастап жалданғандар келіп, әрқайсысы бір-бір динардан алады.
10 Сондықтан бірінші болып жалданғандар көбірек алармыз деп ойлайды, бірақ оларға да бір динардан беріледі.
11 Ақыларын алған соң, олар жүзімдік иесіне күңкілдеп:
12 —Мына соңғылар бір-ақ сағат жұмыс істеді, сөйтсе де сіз оларды күні бойы аптап ыстықта ауыр еңбек еткен бізбен тең қойдыңыз,— дейді.
13 Бірақ ол біреуіне: —Достым, саған әділетсіздік жасаған жоқпын ғой. Біз бір динарға келіспеп пе едік+?
14 Ендеше, ақыңды ал да, кете бер. Мен саған қанша төлесем, соңғы жалданғандарға да сонша бергім келіп тұр.
15 Әлде ақшамды өз қалауымша жұмсауға қақым жоқ па? Жоқ әлде менің жомарттығымды* көре алмайсың ба+?— деді.
16 Осылайша соңғылар бірінші, ал біріншілер соңғы болады+”.
17 Иерусалимге өрлеп бара жатқан жолда Иса 12 шәкіртін былайырақ шығарып+:
18 “Міне, Иерусалимге өрлеп келеміз. Сол жерде Адам Ұлы жоғарғы діни қызметкерлер мен дін мұғалімдерінің қолына ұсталып беріледі. Олар оны өлімге кесіп+,
19 басқа ұлт адамдарының қолына тапсырады. Ал олар болса оны мазақ етіп, қамшымен сабап, бағанаға іліп өлтіреді+, бірақ ол үшінші күні қайта тіріледі+”,— деді.
20 Сонда Зебедейдің+ әйелі екі ұлымен Исаның қасына келді де, тағзым етіп, өтінішін білдірмек болды+.
21 Иса одан: “Не қалайсыз?”— деп сұрады. Ол: “Патшалығыңда екі ұлымның бірін оң, екіншісін сол жағыңа отырғызсаң екен+”,— деді.
22 Сонда ол ағайынды екеуіне: “Не сұрап тұрғандарыңды өздерің білмейсіңдер. Мен ішетін тостағаннан* іше аласыңдар ма+?”— деді. Олар: “Іше аламыз”,— деп жауап бергенде,
23 Иса: “Мен ішетін тостағаннан ішесіңдер+, бірақ менің оң не сол жағыма кім отыратынын мен шешпеймін. Бұл орындарды Әкем кімге дайындаса, солар отырады+”,— деді.
24 Қалған 10 елші мұны естігенде, ағайынды екеуіне ашуланды+.
25 Бірақ Иса оларды шақырып алып, былай деді: “Билеушілер қол астындағы халықтарды билеп-төстейтінін, ұлықтары да оларға қатаң әмір жүргізетінін білесіңдер+.
26 Ал сендердің араларыңда бұлай болмау керек+, қайта, кім ұлы болғысы келсе, сол сендерге қызметші болуы тиіс+.
27 Кім бастыларың болғысы келсе, сол сендерге құл болу керек+.
28 Осы сияқты, Адам Ұлы да өзіне қызмет еткізуге емес, өзі қызмет етіп+, көптеген адамдар үшін жанын төлем ретінде беруге келді+”.
29 Олар Иерихоннан шығып бара жатқанда, Исаның соңынан қалың жұрт ілесті.
30 Сол кезде жол бойында екі зағип кісі отыр еді. Исаның өтіп бара жатқанын естіп, олар: “Ием, Дәуіт Ұлы, бізге рақым ете көріңіз!”— деп айқайлады+.
31 Бірақ жұрт оларға үндемеуді бұйырды. Алайда олар одан бетер айғайлап: “Ием, Дәуіт Ұлы, бізге рақым ете көріңіз!”— деді.
32 Сонда Иса тоқтап, оларды шақырып алып: “Сендерге не істегенімді қалайсыңдар?”— деп сұрағанда,
33 екеуі: “Ием, көзімізді аша көріңіз”,— деп өтінді.
34 Иса оларды аяп кетіп, екеуінің көзіне қолын тигізді+. Сол сәтте көздері көретін болып, олар оның соңынан ерді.
Сілтемелер
^ Ә14 қосымшасын қараңыз.
^ Шамамен таңғы 9:00. Түсіндірмені қараңыз.
^ Шамамен күндізгі 12:00.
^ Шамамен түскі 15:00.
^ Шамамен түстен кейінгі 17:00.
^ Немесе “ізгі екенімді”.
^ “Тостаған” Исаға жалған айып тағылып, өлтірілетініне қатысты Құдайдың еркін білдіреді.