Adda kadi am-ammom nga agtutubo nga adda nakaro a problemana iti salun-at? Adda kadi sakitmo wenno depekto ti bagim a makalapped iti pannakiramanmo kadagiti aktibidad a tagtagiragsaken dagiti kataebmo?

 No wen, natural laeng a maupayka no dadduma. Ngem adda dua a makaliwliwa unay a mensahe ti Biblia.

•   Ti Namarsua kenka a ni Jehova a Dios ammona ti kasasaadmo. Saan la a dayta, isu ket “maseknan” kenka.—1 Pedro 5:7.

•   Panggep ni Jehova a Dios nga agasan ti amin a sakit! Mabasam iti Biblia ti maipapan iti dayta iti Isaias 33:24 ken Apocalipsis 21:1-4.

 Napaneknekan ti adu nga agtutubo a ti pammati iti Dios ken kadagiti karina ti mangpappapigsa kadakuada. Usigem ti uppat a pagarigan.

•  YEIMY

•  MATTEO

•  BRUNA

•  ANDRÉ

 Idi agtawenak iti 11, kasapulakon ti wheelchair tapno makapanak iti sadinoman. Diak maaramid dagiti simple a trabaho, kas ti panangbagkat uray kadagiti nalag-an laeng a banag.

 Idi lima ti tawenko, nadayagnos nga addaanak iti muscular dystrophy, maysa a kumarkaro a sakit a manglimitar unay kaniak. No dadduma, maupayak ta diak maaramid dagiti kabaelan ti dadduma a katawenak. Ngem impaayandak dagiti nagannakko ken karelihionak iti pisikal, emosional, ken naespirituan a tulong. Kada bulan, agarup 70 nga oras a mangisursuroak maipapan iti Biblia kadagiti interesado ket masansan a kuykuyogendak dagiti kapammatiak.

 Kinuna ni Jesus a tunggal aldaw adda bukodna a pakaringgoran. (Mateo 6:34) Isu a ti la agdama ti ikagkagumaak a panunoten ken diak pakasikoran ti sumaganad nga aldaw. Mangar-aramidak met kadagiti kalat a kabaelak a ragpaten. Segseggaak ti baro a lubong ti Dios inton matagiragsakkon “ti pudpudno a biag,” nga awanan iti kastoy a makapakapsut a sakit.—1 Timoteo 6:19.

 Panunotem: Nakatulong ken Yeimy ti panangaramid kadagiti ‘kalat a kabaelanna a ragpaten.’ Kasano a maaramidmo ti kasta?—1 Corinto 9:26.

 Nangrugi a simmakit ti bukotko idi innem ti tawenko. Idi damo, kinuna dagiti doktor a maigapu dayta iti idadakkelko. Ngem makatawen kalpasanna, naduktalanda nga adda tumor a nagtubo iti durik.

 Naoperaak, ngem agarup 40% laeng iti tumor ti naikkat ti doktor. Ket kalpasan ti dua la a bulan, nagsubli ti tumor iti dati a kadakkelna! Sipud idin, namin-adu a nagpaeksamen, nagpaagas, ken naupayak.

 Adda dagiti tiempo a ti tumorko ket kasla kutsilio a dumuyduyok iti intero a bagik, ngem kaaduanna, iti bukot ken barukongko. Kaskasdi nga ikagkagumaak ti di unay masikoran iti kasasaadko. Panunotek no kua nga adda met dagiti agib-ibtur kadagiti nakaro a situasion ngem positiboda latta. Ti kangrunaan a tumultulong kaniak nga agtalinaed a positibo ket ti panagtalekko nga addanto aldaw a tungpalen ni Jehova a Dios ti karina a pagpatinggaen ti amin a panagsagaba.—Apocalipsis 21:4.

 Panunotem: Kas ken Matteo, kasano a makatulong kenka nga agibtur ti panangpanunot iti kari ti Dios a pagpatinggaenna ti panagsagaba?—Isaias 65:17.

 Gapu ta saan a madlaw nga adda sakitko, ipagarup ti dadduma a sadutak. Ngem kinaagpaysuanna, marigatanak a mangaramid iti amin a banag agraman kadagiti trabaho iti balay, panagadal, wenno uray ti ibabangonko iti iddak.

 Idi 16 ti tawenko, nadayagnos nga adda sakitko a multiple sclerosis, maysa a makapakapsut ken kumarkaro a sakit a mangap-apektar saan la nga iti kayatko a kasansan koma ti panangaramidko kadagiti trabahok no di ket uray iti pannakipasetko kadagiti Nakristianuan nga aktibidad. Masansan a basaek ti 1 Pedro 5:7 a kunana: “Iyallatiwyo [iti Dios] ti isuamin a pakaringgoranyo, agsipud ta isu maseknan kadakayo.” Pumigpigsa ti pakinakemko gapu iti panangpanunotko a maseknan ni Jehova iti tunggal maysa kadatayo. Dayta ti tumultulong kaniak agingga ita.

 Panunotem: Kas ken Bruna, kasano a makatulong kenka ti panangikararagmo ken Jehova iti amin a problemam?—Salmo 55:22.

 Adda dagiti mangtrato kaniak a kas man la agtawenak iti 10. Diak mababalaw ida ta kaslaak ngamin aglanglanga a kasta.

 Idi dua ti tawenko, nadayagnos nga addaanak iti manmano a kita ti kanser a nangrugi iti durik sa nagwaras iti utekko. Nakontrol met ketdi dagiti doktor dayta a sakit ngem natiltilak gapu kadagiti agas isu a naapektaran ti idadakkelko. Ita, 1.37 la a metro (4’ 6’’) ti katayagko. Ipagarup ti adu nga agul-ulbodak no ibagak kadakuada a 18 anyosakon!

 Raraemendak dagiti karelihionak. Didak pagaangawan a kas iti ar-aramiden dagiti kaeskuelaak. Ikagkagumaak ti agbalin a positibo uray kastoyak. Kinapudnona, tagtagiragsakek ti kasayaatan a matagiragsak ti maysa a tao—ti pannakaam-ammok ken Jehova! Aniaman ti nasken nga ibturak, siguradoak nga aywanannak ni Jehova. Ti panangpanunotko iti nagsayaat a baro a lubong nga inkari ni Jehova a Dios ti tumultulong kaniak nga agbalin a positibo.—Isaias 33:24.

 Panunotem: Apay a ti pannakaam-ammo ken Jehova “ti kasayaatan a matagiragsak ti maysa a tao,” kas iti kinuna ni André?—Juan 17:3.