“Kasla boring ti agbasa iti Biblia,” kuna ti tin-edyer a ni Will, “no dimo ammo ti husto a pamay-an a mangaramid iti dayta.”

 Kayatmo kadi a maammuan ti sekreto tapno makaparagsak ti panagbasam iti Biblia? Matulongannaka daytoy nga artikulo.

•  Pagbalinem a nabiag dagiti salaysay ti Biblia

•  Ag-research-ka!

•  Ti kuna dagiti padam nga agtutubo

 Iramanmo ti bagim iti basbasaem. Mabalinmo nga aramiden dagitoy:

1.   Mangpili iti salaysay ti Biblia a kayatmo nga adalen. Mabalinmo a pilien ti maysa a pasamak wenno paset ti maysa nga Ebanghelio, wenno maysa a salaysay kadagiti koleksion ti dramatiko a pannakaibasa ti Biblia nga adda iti jw.org/ilo.

2.   Basaen ti salaysay. Mabalinmo a basaen dayta a siksika, wenno basaem a kadua dagiti gagayyem ken kapamiliam. Adda agakem kas narrator ken adda met mangakem iti dadduma a karakter.

3.   Padasem ti maysa wenno ad-adu pay kadagitoy:

   •   Idrowingmo ti salaysay wenno mangaramidka iti storyboard​—agaabay a picture a mangipakita iti panagsasaruno dagiti pasamak. Ikkam iti caption a mangilawlawag iti mapaspasamak iti tunggal eksena.

   •   Mangaramidka iti diagram. Kas pagarigan, bayat a basbasaem ti maipapan iti maysa a matalek a karakter, ikonektarmo dagiti ugali ken ar-aramidna kadagiti bendision a naawatna.

   •   Pagbalinem ti salaysay a kasla damdamag. Isalaysaymo ti napasamak iti nagduduma nga anggulo ken interbiuem dagiti kangrunaan a karakter ken dagiti nakasaksi.

   •   No kamali ti desision ti maysa kadagiti karakter, mangpanunotka iti sabali a nagtungpalan ti estoria. Kas pagarigan, adalem ti salaysay maipapan iti panangibaga ni Pedro a saanna nga am-ammo ni Jesus. (Marcos 14:66-72) Ania koma ti nasaysayaat nga inaramid ni Pedro?

   •   No kayatmo ti naidumduma, padasem nga iyaramidan iti drama ti maysa a salaysay ti Biblia. Iramanmo dagiti leksion a maadal iti salaysay.​—Roma 15:4.

 No adalem a naimbag dagiti detalye, adda dagiti makalim a nakalemmeng a gameng iti dayta a salaysay. Ti agpayso, napateg no dadduma ti uray maysa wenno dua laeng a sao iti salaysay.

 Kas pagarigan, ikomparam ti Mateo 28:7 iti Marcos 16:7.

•    Apay nga espesipiko nga imbaga ni Marcos nga agparang ni Jesus ken Pedro ken kadagiti adalanna?

•  Clue: Saan a nasaksian ni Marcos daytoy a pasamak; nalawag a naammuanna laeng daytoy ken Pedro.

•  Ti nakalemmeng a gameng: Apay a nabang-aran ni Pedro idi naammuanna a kayat ni Jesus a makita isuna? (Marcos 14:66-72) Kasano nga impakita ni Jesus nga isu ket pudno a gayyem ni Pedro? Kasanom a matulad ni Jesus ket agbalinka a pudno a gayyem?

 No pagbalinem a nabiag dagiti salaysay ti Biblia ken ag-research-ka, agbalin a mas makaparagsak ti panagbasam iti Biblia!