No maminsan, pampanunoten ti dadduma nga agserserbi iti Dios no sulit met laeng kadi ti tiempo ken panagregget a mangsurot kadagiti pagalagadan ti Biblia. (Salmo 73:2, 3) Mabalin nga agaramidda pay ketdi kadagiti banag a maikontra kadagiti linteg ni Jehova ken al-allilawenda ti dadduma nga agserserbi iti Dios babaen ti panangilimedda kadagiti dakes nga aramidda.

 Nadisenio daytoy nga artikulo a tumulong kadagidiay doble kara ti panagbiagna ngem kayatdan nga isardeng dayta.

Iti daytoy a panid

•  Ania ti doble kara a panagbiag?

•  Dakesak kadi a tao no doble kara ti panagbiagko?

•  Kasano a maisardengko ti doble kara a panagbiag?

•  Ti kuna dagiti padam nga agtutubo

 Ti doble kara a panagbiag ket ti panangaramid kadagiti ammom a saan a naimbag no kaduam dagiti gagayyemmo a saan nga agserserbi ken Jehova; ngem no kaduamon dagiti matalek a kakabsat iti kongregasion, ipakpakitam a kayatmo ti agserbi ken Jehova. Kasla dua ti katataom, nga agpada a nakamaskara.

 “No doble kara ti panagbiagmo, agpada nga adda ilimlimed dagita a dua a katataom, isu nga awan ti makaammo no asinoka a talaga ken saanka a napudno iti amin.”—Erin.

 Ammom kadi? Ti doble kara a panagbiag ramanenna ti panangaramid kadagiti saan a makaay-ayo ken Jehova no agmaymaysaka.

 “Idi katorse-ak, agbuybuyaak kadagiti immoral a video ken ladawan iti Internet. No adda kakaduak, agpammarangak a kagurgurak ti pornograpia, ngem iti un-unegko, saan met a talaga.”—Nolan.

 Prinsipio ti Biblia: “Awan ti adipen a makapagserbi iti dua nga amo; ta mabalin a guraenna ti maysa ket ayatenna ti sabali, wenno matalek iti maysa ket tallikudanna ti sabali.”—Mateo 6:24.

 Saan a kanayon a kasta. Adda dagiti tattao a saanda a talaga a kayat ti agbiag maitunos kadagiti estandarte ti Biblia. Ngem kastaka kadi? Wenno adda sabali a rason no apay nga ar-aramidem dayta, kas iti:

•   Mabainka a sika laeng ti naidumduma kadagiti kakaduam.

•   Panagriknam, ad-adu ti pagpapadaanyo kadagiti kaeskuelaam ngem kadagiti kakongregasionmo.

•   Panagriknam, saanmo a kaya a tungpalen ti amin a bilin ti Dios.

 “Panagkunak, mas komportable a makikadua dagiti doble kara a tattao kadagiti saanda a kapammatian gapu ta kayatda a maakseptar ken magustuan ida ti amin.”—David.

 Siempre, saan a rason dagita tapno agbiagka a doble kara. Ngem makatulong dagita tapno maawatantayo no apay a mabalin nga agdoble kara uray dagiti nasingpet a tattao. No kasta ti mapaspasamak kenka, ania ti mabalinmo nga aramiden?

1.  1. Kitaem no ania ti klase ti panagbiagmo ita. Isaludsodmo iti bagim: ‘Kastoy kadi a talaga ti kayatko a biag? No agtultuloyak a kastoy, anianto ngata ti pagbanagak?’

    Prinsipio ti Biblia: “Makita ti masirib a tao ti peggad . . . , ngem agdiretso latta ti awanan kapadasan ket agsagaba.”—Proverbio 27:12.

2.  2. Agbalinka a napudno. Ibagam ti situasionmo kadagiti nagannakmo wenno iti maysa a nataengan a gayyem a mangipatpateg kadagiti linteg ni Jehova. Maragsakanda la ketdi ta agpatulongka kadakuada. Ken maipagpannakkeldaka ta kayatmo nga aramiden ti umiso!

    “Ti panangipudno iti sabsabali kadagiti madi nga ar-aramidek ti maysa kadagiti karirigatan nga inaramidko, ngem limmag-an unay ti riknak idi impudnok dagita.”—Nolan.

    Prinsipio ti Biblia: “Saanto nga agballigi ti mangabbong kadagiti basolna, ngem maipakitaanto iti asi ti mangipudno ken mangtallikud kadagita.”—Proverbio 28:13.

3.  3. Akseptarem dagiti maipaay a disiplina. Laglagipem a no adda ilimlimedmo kadagiti nagannakmo ken iti kongregasion, daddadaelem ti panagtalekda kenka. Kas resultana, mabalin nga adda dagiti restriksion nga ipatungpal kenka dagiti nagannakmo wenno dagiti panglakayen iti kongregasion. Akseptarem dagita a disiplina ken ikagumaamon ti agbiag a “mapagtalkan iti amin a banag.”—Hebreo 13:18.

    Prinsipio ti Biblia: “Denggem ti balakad ken awatem ti disiplina, tapno agbalinkanto a masirib.”—Proverbio 19:20.

4.  4. Agtalekka nga ay-ayatennaka ti Dios. Gapu ta ay-ayatennatayo ni Jehova, ammona ti amin nga ar-aramidentayo. No doble kara ti panagbiagmo, ammona dayta isu a maladladingitan. Ngem gapu ‘ta ipatpategnaka,’ magagaran a tumulong kenka a mangilinteg iti biagmo.—1 Pedro 5:7.

    Prinsipio ti Biblia: “Ta sipsiputan dagiti mata ni Jehova ti intero a daga tapno ipakitana ti pigsana kadagidiay naan-anay ti pusoda kenkuana.”—2 Cronicas 16:9.