•  Apay a marigrigatanak nga agpokus?

•  No kasanoka a mas makapagpokus

•  Ti kuna dagiti padam nga agtutubo

 “Managbasaak idi iti libro. Ngem saan itattan, diak kayaten a basaen ti nakaat-atiddog a paragraph.”—Elaine.

 “No ma-boring-ak iti buybuyaek a video, i-fast forward-ko.”—Miranda.

 “Uray no adda ti importante nga ar-aramidek ket naguni ti selponko, panunotek a dagus, ‘Sino ngata diay nagteks?’”—Jane.

 Marigrigatanka kadi nga agpokus gapu iti teknolohia? Wen ti sungbat ti dadduma. “No agkara-internet-tayo, sansanayentayo ti utektayo a saan nga agpokus. Alisto la a sumrek dagiti impormasion iti panunottayo ngem nalakatayo met laeng a malipatan,” insurat ti maysa nga autor ken management consultant a ni Nicholas Carr. a

 Kitaem ti tallo a banag a dadaelen ti teknolohia ti konsentrasionmo.

•   No makitungtungtongka. “Uray no sisasango ti katungtungtongda, agteteks wenno agay-ay-ayam wenno lukluktan ti dadduma ti social media-da iti selponda. Saanda man la a dumdumngeg a naimbag,” imbaga ti agtutubo a ni Maria.

•   No madama ti klase. “Agteteks, agin-internet, wenno agbuybuya ti kaaduan nga estudiante uray madama ti klase,” kuna ti libro a Digital Kids, ken ti pangus-usaranda kadagiti gadyetda ket kadagiti “aktibidad nga awan koneksionna iti panagadalda.”

•   No agad-adalka. “No ag-ring ti selponko kayatkon a kitaen a dagus, marigatanak a mangkontrol iti bagik,” kuna ti 22 anyos a ni Chris. No agar-aramidka iti asaynment ket agkarakitaka iti gadyetmo, imbes a maysa orasmo laeng a malpas, agbalin a tallo nga oras wenno napapaut pay.

 Laglagipem: Marigatanka nga agpokus no ipalubosmo a kontrolennaka ti teknolohia.

•   No makitungtungtongka. Kuna ti Biblia: “Sapulenyo dagiti pagimbagan ti dadduma, saan la a dagiti bukodyo a pagimbagan.” (Filipos 2:4) Dumngegka a naimbag ken kitaem ti kasarsaritam tapno maipariknam nga interesadoka kenkuana. Saanmo pay la a kitkitaen ti gadyetmo.

   “No adda katungtungtongmo, labanam ti riknam a mangkita iti selponmo. Maipakitam a resrespetuem no nakapokuska kenkuana.”—Thomas.

   TIP: No adda kasarsaritam, nasaysayaat no idulinmo ti selponmo. Ibaga dagiti researcher a no makitkitam ti selponmo nalakaka laeng a maistorbo.

•   No madama ti klase. Kuna ti Biblia: “Dumngegkayo a naimbag.” (Lucas 8:18) Maibatay iti dayta a prinsipio, uray adda internet iti classroom-yo, saanka nga ag-check iti message, agay-ayam, wenno maki-chat online tapno makapagpokuska iti ad-adalem.

   “Ikarigatam ti agatension iti klase. Ag-take note-ka. No posible, agtugawka iti sango tapno saanka a maistorbo.”—Karen.

   TIP: Agsuratka imbes nga ag-type-ka iti kompiuter. Ipakita dagiti research a makapagpokuska ken ad-adu ti matandaanam iti inadalyo.

•   No agad-adalka. Kuna ti Biblia: “Gun-odem ti sirib, gun-odem ti pannakaawat.” (Proverbio 4:5) Masapul nga agpanunotka a naimbag imbes nga adalem laeng dagiti impormasion tapno laeng pumasaka iti eksam.

   “No agad-adalak, i-airplane mode-ko ti tablet-ko tapno maka-concentrate-ak iti ad-adalek. Saanak nga ag-check kadagiti notification ken i-takenote-ko dagiti kayatko a tandaanan.”—Chris.

   TIP: Siguraduem a makapagpokuska iti pagad-adalam. Nalinis ken naurnos koma.