•  Apay a makaallukoy?

•  Ania dagiti saludsod nga ikonsiderarmo?

•  Ania dagiti makatulong a prinsipio ti Biblia?

 “Para kaniak, napintas nga aramid ti arte ti dadduma a tattoo,” kuna ti agtutubo a ni Ryan.

 Ti motibom nga agpa-tattoo mabalin nga apektaranna ti tarigagaymo nga agpa-tattoo. Kas pagarigan, kuna ti tin-edyer a ni Jillian: “Idi ubing pay ti maysa a kaeskuelaak a babai, natay ni nanangna. Isu nga idi tin-edyeren, impa-tattoo-na ti nagan ni nanangna iti teltelna. Panagkunak, nagmayat ti kasta a tattoo.”

 Aniaman ti motibo, agpanunotka koma a naimbag sakbay nga agdesisionka nga agpa-tattoo iti permanente! Ania dagiti saludsod a masapul nga ikonsiderarmo no pampanunotem ti agpa-tattoo? Ken ania dagiti prinsipio iti Biblia a makatulong kenka a mangaramid iti kasayaatan a desision?

 Ania dagiti dakes nga epektona iti salun-at? “Masugatan ti kudil no agpa-tattoo-ka, a posible a pakaalaan iti impeksion ti kudil ken dadduma pay a komplikasion,” kuna ti website ti Mayo Clinic. “No dadduma, adda dagiti bumsog iti lawlaw ti tattoo a maawagan iti granuloma. Mabalin met nga agresulta ti panagpa-tattoo iti keloid​—bumsog a paset ti kudil gapu iti sobra a panagdakkel ti piglat.” Kuna pay ti website: “No dagiti nausar iti panagpa-tattoo-m ket kontaminado iti naimpektaran a dara, mabalin a makaalaka iti nagduduma a sakit a mayakar babaen iti dara.”

 Ania ti epekto dayta iti reputasionmo? Kayatmo man wenno saan, adda ibagbaga ti langam. Mabalin nga ibagana a kaslaka nataengan wenno awan nakemna, mapagtalkan wenno saan a responsable. “No makitkitak nga adda tattoo-na ti maysa a tao, dagus nga ibilangko a mangnginum ken pagaayatna ti maki-party,” kuna ti agtutubo nga agnagan Samantha.

 Sabali met ti panangmatmat ti 18 anyos a ni Melanie. Kunana: “Para kaniak, ilemmeng ti tattoo ti agpaypayso a pintasmo. Kasla ibagbaga dagidiay agpa-tattoo a dida kayat nga ipakita no siasinoda a talaga, isu nga ilemmengda ti kinasiasinoda babaen iti tattoo.”

 Kanayonto kadi a kayatmo? Iti panaglabas ti panawen, mabalin a mabennat ken umalas ti tattoo gapu iti panaglukmeg wenno panagmataengan. “Nakakitaakon iti langa ti tattoo kalpasan ti adu a tawen, ket nagmadi a kitaen,” kuna ti agtutubo a ni Joseph.

 “Dagiti tattoo ket masansan nga agpaso,” kuna ti 21 anyos a tin-edyer a ni Allen. “Ti magustuan idi ti maysa a tao ket mabalin a saanen a napateg kalpasan ti sumagmamano a tawen.”

 Nasayaat ti punto ni Allen. Ti agpayso, no agmataengan ti tao, agbaliw ti panangmatmatna, dagiti magustuanna, ken dagiti kaririknana​—ngem saan nga agbaliw dagiti tattoo. “Ti tattoo a mangipalagip laeng iti kinaawan nakemmo ket diak kayat nga iraman iti listaan dagiti banag a pagbabawyakto kalpasan ti adu a tawen,” kuna ti agtutubo a babai a ni Teresa.

 Ti manakem a tao usigenna a naimbag dagiti bambanag sakbay nga agdesision. (Proverbio 21:5; Hebreo 5:​14) Isu nga usigem dagiti sumaganad a prinsipio ti Biblia nga adda pakainaiganna iti tattoo.

•  Colosas 3:​20: “Dakayo nga annak, agtulnogkayo kadagiti nagannakyo iti amin a banag, ta daytoy ket makaay-ayo unay iti Apo.”

    No makipagnanaedka kadagiti nagannakmo ngem dimo raraemen ti ibagbagada, ania ngata dagiti mabalin a mapasaram?

•  1 Pedro 3:​3, 4: “Ti arkosyo saan koma a daydiay makinruar a panangsallapid iti buok ken ti panangikapet kadagiti balitok a pagarkos wenno ti panangikawes kadagiti makinruar a kawes, no di ket isu koma ti nalimed a kinatao ti puso iti di agrupsa a pagan-anay ti naulimek ken naalumamay nga espiritu.”

    Panagkunam, apay ngata nga ipagpaganetget ti Biblia “ti nalimed a kinatao ti puso”?

•  1 Timoteo 2:9: “Dagiti babbai arkosanda ti bagbagida iti . . . kinaemma ken kinasimbeng ti panunot.”

    Ania ti kayat a sawen ti “kinaemma”? Apay a mas makaatrakar ti kinaemma ngem iti arte ti bagi iti panaglabas ti tiempo?

•  Roma 12:1: “Iparangyo ti bagbagiyo a maysa a sakripisio a sibibiag, nasantuan, makaay-ayo iti Dios, maysa a sagrado a panagserbi buyogen ti pannakabalinyo nga agrason.”

    Apay a napateg iti Dios no kasano a tratuem ti bagim?

 Maigapu kadagitoy, inkeddeng ti adu a tattao ti saan nga agpa-tattoo. Kinapudnona, adda nakitada a nasaysayaat ngem iti tattoo. Kuna ni Teresa a nadakamaten: “No adda pagsasao a talaga a magusgustuam wenno adda tao a napateg kenka, tungpalem dayta a pagsasao wenno ibagam iti dayta a tao no kasano ti kinapategna kenka. Imbes nga agpa-tattoo-ka, aramidem ti patpatiem.”