Ebanghelio ni Mateo 28:1-20
28 Kalpasan ti Sabbath, idi lumawagen iti umuna nga aldaw ti lawas, napan da Maria Magdalena ken ti sabali pay a Maria iti nakaitaneman ni Jesus.+
2 Pagammuan ta nagginggined iti napigsa, ta bimmaba manipud langit ti anghel ni Jehova* ket intulidna ti naiserra a bato sa nagtugaw iti dayta.+
3 Kasla kimat ti langana ken kas kapuraw ti niebe ti badona.+
4 Nagpigerger dagiti guardia gapu iti butengda kenkuana nga uray la dida nakagunay.
5 Ngem kinuna ti anghel kadagiti babbai: “Dikay agbuteng, ta ammok a sapsapulenyo ni Jesus a nailansa iti kayo.+
6 Awan ditoyen, napagungaren kas iti imbagana.+ Umayyo kitaen ti nakaikabilanna.
7 Kalpasanna, darasenyo, ibagayo kadagiti adalanna a napagungaren. Adtoy! Mapmapanen idiay Galilea+ ket makitayonto sadiay. Adtoy! Imbagakon kadakayo.”+
8 Gapuna, pimmanawda a dagus iti pakalaglagipan a tanem. Mabutbutengda ngem nakaragragsakda a nagtaray a nangipadamag iti dayta kadagiti adalan ni Jesus.+
9 Pagammuan ta sinabat ida ni Jesus ket kinunana: “Naimbag nga aldawyo!” Immasidegda ket iniggamanda dagiti sakana ket nagruknoyda kenkuana.
10 Imbaga ni Jesus: “Dikay agbuteng! Inkay ipadamag daytoy kadagiti kakabsatko tapno mapanda idiay Galilea, ket makitadakto sadiay.”
11 Bayat nga adda dagiti babbai iti dalan, napan iti siudad ti sumagmamano a guardia+ ket impadamagda kadagiti panguluen a papadi ti amin a napasamak.
12 Idi nakisarita dagitoy a papadi kadagiti panglakayen, nangtedda iti adu a pedaso a pirak kadagiti soldado
13 ket imbilinda: “Ibagayo, ‘Immay dagiti adalanna iti rabii ket tinakawda ti bangkayna bayat a matmaturogkami.’+
14 No maammuan daytoy ti gobernador, saankay nga agdanag ta dakaminton ti makisarita* kenkuana.”
15 Gapuna, innalada dagiti pedaso a pirak ket inaramidda ti naibilin kadakuada. Nagdinamag daytoy nga estoria kadagiti Judio agingga ita nga aldaw.
16 Nupay kasta, napan ti 11 nga adalan idiay Galilea,+ iti bantay nga imbaga ni Jesus a pagkikitaanda.+
17 Idi nakitada ni Jesus, nagruknoyda kenkuana, ngem adda sumagmamano a nagduadua.
18 Immasideg ni Jesus ket kinunana: “Naiteden kaniak ti amin nga autoridad idiay langit ken ditoy daga.+
19 Inkayo ngarud kadagiti tattao iti amin a nasion+ ket pagbalinenyo ida nga adalak, ken bautisaranyo ida+ iti nagan ti Ama ken iti nagan ti Anak ken iti nagan ti nasantuan nga espiritu,
20 ken isuroyo a tungpalenda ti amin nga imbilinko kadakayo.+ Ket adtoy! addaak kadakayo iti amin nga al-aldaw agingga iti panungpalan daytoy a sistema ti bambanag.”*+
