Saan a detalyado ti panangdakamat ti Biblia iti daytoy a topiko. Ngem saanna nga ibaga a dakes ti panagusar iti makeup, alahas, wenno dadduma pay a pagpapintas. Nupay kasta, saan nga agpokus ti Biblia iti makinruar a langa. Imbes ketdi, iparegtana ti “di agrupsa a pagan-anay [wenno, saan a madadael a pagpapintas] ti naulimek ken naalumamay nga espiritu.”​—1 Pedro 3:​3, 4.

•   Nagusar iti pagpapintas dagiti matalek a babbai iti Biblia. Inusar ni Rebecca ti balitok nga aritos ti agong, dagiti balitok a pulseras, ken dadduma pay a nangingina nga alahas nga inregalo ni Abraham, nga ama ti nagbalin nga asawana a ni Isaac. (Genesis 24:22, 30, 53) Kasta met, inawat ni Ester ti “pannakapapintas” tapno maisagana iti posible a panagbalinna kas reyna ti Imperio ti Persia. (Ester 2:​7, 9, 12) Mabalin a karaman iti dayta a pannakapapintas ti panagusar iti “kosmetiko,” wenno “nagduduma a klase ti makeup.”​—New International Version; Easy-to-Read Version.

•   Iti dadduma nga ilustrasion iti Biblia, naipada ti alahas iti nasayaat a banag. Kas pagarigan, ti tao a nasayaat ti balakadna ket kasla “aritos a balitok . . . iti dumdumngeg.” (Proverbio 25:12) Kasta met, impada ti Dios ti panangtratona iti nasion ti Israel iti panangarkos ti maysa a lalaki iti ikasarna a nobiana kadagiti pulseras, kuentas, ken aritos. Gapu iti dayta, nagbalin ti nasion a “nakaliblibnos [wenno, nakapimpintas] unay.”​—Ezequiel 16:11-​13.

 Di umiso: Ti panangikabil ti dakes a reyna a ni Jezebel iti “nangisit a pinta,” wenno eye shadow, iti matana ket ebidensia a dakes ti agusar iti makeup.—2 Ar-ari 9:30.

 Umiso: Ni Jezebel, a mammapatay ken mangkukulam, ket naukom gapu kadagiti dakes nga aramidna, saan nga iti itsurana.—2 Ar-ari 9:​7, 22, 36, 37.