1-3. (a) Abigiya maatera goofa dagganno gede assinori maati? (b) Aanchine dhagge ikkitannote tenne mancho daafira maa ronseemmo?

ABIGIYA albaseenni uurrinoha baasa jajjarino beetto laˈanni no. Isi togo ikke jajjarinohu dimullaati. Maatensara goofa daggaraati. Hatte saatera, 400 meddi yitanno olanto Abigiya minaanni Naabaali qaera noo labballo baalanka guddara dagganni no. Mayira?

² Konni qarrira kaimu Naabaaliiti. Isi rosinonte gede, manna xone shollishe kaino. Tenne yannara kayinni, isi horo kisa hasiissannosikki mancho kisino; mayira yiniro, isi xonino manchi ammanantinoti qajeeltino olanto noosihonna mannu ayirrisannoho. Hatte farora, Naabaali soqqamaasine giddo mittu (geˈreewosi allaalannoha ikkikki digatino), Abigiya minise manna gatissanno doogo dihoogganno yee konne coye isera kuli. Kayinni mitte mancho qodhitino olanto hiitto assite hoola dandiitanno?

³ Hanni balanxe, tenne dhagge ikkitanno manchore ronso. Abigiya ayeti? Kuni coyi kainohu hiittoonniiti? Abigiya ammanatenni assitinorinni maa ronseemmo?

4. Naabaali hiittoo manchooti?

⁴ Naabaali Abigiyara malino minaanna diˈˈikkino. Isi gobba baala tuqe nafa ise saˈinota afiˈra didandaanno; Abigiya kayinni bushu manchira assidhino. Hige manchu woyite dureessaho. Isi ‘Ane ikkinohu dino’ yee hedanno. Kayi wolootu iso ma garinni laˈanno? Qullaawu Maxaafi giddo isi geya busha suˈma afiˈrinohu wolu manchi dino yaa dandiinanni. Suˈmisi tiro “Gowwa” woy “Balala” yaate. Kuni isira annisinna amasi ilami woyite fushshitinosi suˈmaatinso, ikkitosi laˈne gedensoonni fushshinoonnisiho? Ikkihano ikkiro, isi suˈmisi gedeeti. Naabaali “busha kaajjadohonna doˈnichaho.” Konne dimbaanchonna gibbo baxanno mancho, duuchu manni dibaxanno; qoleno mannu iso waajjanno.—1 Sam. 25:2, 3, 17, 21, 25.

5, 6. (a) Abigiyate dancha akatta giddo roore baxissannoti hiittee labbannohe? (b) Abigiya togoohu yawaawulu manchira assidhinohu mayira ikkara dandaanno?

 ⁵ Abigiya kayinni horo Naabaali gedeeta diˈˈikkitino. Suˈmise tiro, “Anniˈya Isonooto Hagiirsiisi” yaate. Batinye annuwa xuma qaaqqo ilturo hagiidhitanno; hayyichu anni kayinni qaaqqisi dancha akata afiˈrinohanna sirnyaataamo ikkiro roore hagiidhanno. Roore woyite, aana xuˈmino manchira wodancha, hayyo, worbimma, ammananna woleno togoo akatta lossiˈra hasiissannositi dileeltannosi. Abigiya kayi hattoota diˈˈikkitino. Qullaawu Maxaafi ise xuma calla ikkitukkinni xiinxalla ikkitinota kulanno.—1 Saamueeli 25:3 nabbawi.

⁶ Xaa yannara mitu manni, togooti busule beetto konni yawaawulu manchira mayira assidhino yee hedara dandaanno. Ikkollana, hundi waro oosote galte doortannori annuwanna amuuwa ikkitinota qaaga hasiissanno. Hatto ikka hoogiro nafa, annuwunna amuuwu oosonsa doodhitinore haadhara woy gibbara dandiitanno. Abigiya anninna ama Naabaali jironna maccaha ikkasi laˈe, Naabaali ise adhanno gede sumuu yitino ikka woy isinni isira insa uyitino ikka? Woy insa buxima amaddeennansa togoore assino ikka? Ikkihano ikkiro, Naabaali dureessa ikkasi dancha minaanna diassitinosi.

7. (a) Yannankera noo annuwinna amuuwi oosonsara adhanna adhama lainohunni gara ikkitino lao heedhannonsa gede qajeelsa hasidhuro, maa assa dihasiissannonsa? (b) Abigiya maa assate murcidhino?

⁷ Busulu anninna ama, oosonsara adhanna adhama lainohunni gara ikkitino lao heedhannonsa gede rosiissannonsa. Togoo anninna ama oosonsa jirote yite adhantara, woy dirinsa iillikkinni adhamate hedde mitteenni yanna sayissanno gede dixixxiibbannonsa. (1 Qor. 7:36, NW) Abigiya kayi wonanni Naabaalira assidhe kaˈino daafira, xa togoore hedase kaaˈlitannoseri dino. Isira assidhanno gede assinose coyi ikkihano ikkiro, ise xa iseta mitte assidhe qarrase cincite heeˈrate murcidhino.

8. Naabaali aye xonino? Tini lowo soˈrooti yineemmohu mayiraati?

⁸ Naabaali assinori Abigiyara qarru aana qarra ledannoho. Isi ayirrado mancho Daawiti xonino. Daawiti, Saaooli bayicho moohara Maganu doodhinohonna masaalaanchu Saamueeli buurinoho ammanaminoho Yihowa soqqamaanchooti. (1 Sam. 16:1, 2, 11-13) Daawiti, hinaase shaasira hasiˈrinoha Moote Saaooli xooqe, ammanantinote 600 olamaasinesi ledo halalla heeˈranno.

9, 10. (a) Daawitinna mannisi lubbo gargadhate sharrantinohu hiittoo qarri giddo heedheeti? (b) Naabaali, woleteemmero Daawitinna mannisi assinore naada hasiissannosi yineemmohu mayiraati? (Gufo 10te nooha lekkaalliidi qaagiishshano lai.)

⁹ Naabaali heeˈrannohu Maooni katamira ikkirono loosiˈrannohu  kayinni mule noohu Qermeloosi katamiraati; * isinni hakko umisi baatto noosiha ikkikki digatino. Tenne katammara geˈreewoho injiitannoti hayisso woˈmitinoti ilaalaame baatto no; Naabaalirano 3,000 geˈreewi noosi. Qooxeessaho noo gobba kayinni loosiˈnannikkite. Wodiidoonni halaˈladu Faraani halalli no. Soojjaatoonni kayinni, Maxinete Baari (Reyote Baari) geeshsha boonnanna godda batidhinoti moola baatto no. Konni qooxeessira, Daawitinna mannisi lubbo gargadhitannore afiˈrate lowo geeshsha sharrantanno; insa sagale afiˈrate dubbu saada ugaaxxannotinna wole lowo qarra cincite heedhannoti dihuluullissannote. Insa hakko dureessichu Naabaali geˈreewo allaaltanno allaalaasine ledo duucha higge xaaddanno faro noonsa.

¹⁰ Tini chaachaara olanto Naabaali allaalaasine gawajjitinoni? Insa hasidhoommero, geˈreewu giddonni baxxu yannara mitte lame adha dandiitanno; insa kayinni hatto diassitino. Hatteentenni, insa Naabaali geˈreewonna allaalaasine huxxu gede ikkite agartinonsa. (1 Saamueeli 25:15, 16 nabbawi.) Geˈreewonna allaalaasine gawajjannori lowori no. Hakko qooxeessira moyichu batiˈranno; qoleno wodiidihu Israeelete danni mule noo daafira, wole gobbanni dagganno mulqiˈraanonna mooraano duucha woyite siˈannonsa. *

11, 12. (a) Daawiti Naabaaliwa manna soqqi woyite, dancha yanna hede ayirrinyunni soqqinota leellishannori maati? (b) Naabaali Daawiti soqqino sokkara digara qolino yineemmohu mayiraati?

¹¹ Halalla kageeshshi mannira sagale itisa Daawitira lowo qarra ikkitinositi egennantinote. Konni daafira Daawiti mitto barra, sagale aasira Naabaaliwa tonne manna soqqi. Daawiti dancha yanna hede soqqino. Hatti yanna geˈreewoho orda hanxannite; hattee hagiirru yannara jila jilanna woleho ela rosantinote. Qoleno Daawiti buxuqqame ayirrinyunni dhaaˈme soqqino. Isinni isonooto, “beettikki Daawiti” yiino; hatto yiinohu Naabaali diro roorannosi daafira ayirrisannosita leellishate ikkikki digatino. Naabaali mayyee qoliyya?—1 Sam. 25:5-8.

¹² Isi hanqe gobba gudino! Hanafote kulli beetti Abigiyara tenne kulanni, Naabaali “xonatenni amade” aalle haaˈrinota coyiˈrino. Honqooqichu Naabaali, sagaleˈya, waaˈyanna gorriˈroommo maala diuyiˈreemmo yee boolaqiˈrino. Isi Daawiti tidhinokki manchi gede asse hedino, hattono mootichisiwiinni xooqanni noo borojjichi gede asse kiirino. Naabaalira Daawitira noosi lao, Saaoolitenni dibaxxitinote yaa dandiineemmo. Lamunku Daawiti Yihowa laˈˈanno garinni dilaˈino. Maganu Daawiti baxannosi; qoleno iso finqilu borojjichi gede ikkikkinni, albillitte Israeelete moohannohu gede asse laˈˈannosi.—1 Sam. 25:10, 11, 14.

13. (a) Daawiti Naabaali xoninosita macciishshiti umi qara ma assino? (b) Yaiqoobi 1:20 noohu xintu seeri, Daawiti hanqi daafira maa huwanteemmo gede assannonke?

 ¹³ Daawiti soqqino manni daye Naabaali yiinore kulisita, isi lowo geeshsha hanqi. Isi, “Baalunku bagadoˈne adhitine kaˈe” yee hajaji. Isino bagadosi qodhe, 400 manna adhe Naabaali qasara haˈri. Daawiti, Naabaali mine noo labballo baala feye gudeemmo yee xaarino. (1 Sam. 25:12, 13, 21, 22) Hige Daawiti mayira hanqi yinanniha diˈˈikkino; hanqe assara hedinori kayinni digaraho. Qullaawu Maxaafi togo yaanno: “Mannu hanqi Maganu keeraanchimma afiˈnanni gede diassanno.” (Yai. 1:20) Ikkina Abigiya minise manna tenne goofanni gatisa dandiitannohu hiittoonniiti?

14. (a) Abigiya Naabaali soˈro taashshate umo maa assitino? (b) Naabaalinna Abigiya mereero noo badooshshinni maa ronseemmo? (Lekkaalliidi qaagiishshano lai.)

¹⁴ Aleenni laˈnummonte gede, Abigiya, Naabaali loosino soˈro taashshate hasiisannoha umi coye assitino yaa dandiineemmo. Ise minaannise Naabaali gede coyiˈnannire macciishsha digibbino. Wedellichu soqqamaanchi Naabaali daafira coyiˈranni, “Isi woyite wodana shota ikkino daafira coyiˈnannire dimacciishshanno” yiino. * (1 Sam. 25:17) Naabaali ‘Ane ikkinohu dino’ yee hedanno daafira, mannu yaannore dimacciishshanno. Xaa yannarano hatto booˈnanno manni batiˈrino. Wedellichu beetti, Abigiya hattoota ikkitinokkita afino; kalaqamino coye isera kulinohu hakko daafira ikkikki digatino.

15, 16. (a) Abigiya Lawishshu maxaafira kulloonnite maanaame galte gedeeta ikkitinota leellishshinohu hiittoonniiti? (b) Abigiya assitinori minaanniseta umimmate silxaane ayirrissannokkita leellishannore diˈˈikkino yineemmohu mayiraati?

¹⁵ Abigiya coye macciishshituhu gedensaanni, assa hasiissannosere hedde bayichonko assitino. Qullaawu Maxaafi tenne kulanni, ‘Abigiya rakkino’ yaanno. Tenne xagge giddo calla, ise daafira kulannohu “rakke” yaanno qaali shoole basera no. Ise halaˈlado anganni Daawitiranna mannisira sagale qixxeessitino. Ise timma, woyinete xajje, geˈreewu maala, xoxxoo, mooshshinoonnita woyinete laalo, hattono balasete qeeqqa qixxeessitino. Tennenni huwata dandiineemmonte gede, Abigiya minese noo jajja seekkite affinotenna dancha gede assite amaxxitannote; hakko daafira, ise gedensoonni Lawishshu maxaafira kulloonnite  maanaame galte gedeeti. (Law. 31:10-31) Ise qixxeessitino sagale balaxxe sokke, hoodete hadhino. Qullaawu Maxaafi, “Ayiddaannisera kayinni mittoreno dikultino” yaanno.—1 Sam. 25:18, 19.

¹⁶ Hatto yaa kayinni Abigiya minaanniseta umimmate silxaane diayirrissanno yaate? Deeˈni, hatto yaa diˈˈikkino. Naabaali buuraminoha Yihowa soqqamaancho xoninota qaagi; tini ikkitosi, minesi noohu beebbaataamu manni goofanno gede assitannote. Abigiya sammi yite agurtoommero, minaannise cubbira digutanta ikka? Ise tenne yannara, minaannisera maahoyye yite galatenni roore Maganisera maahoyye yite gala roorsiˈrase garankolla.

17, 18. (a) Abigiya Daawitinni xaaddu woyite hiitto ikkitino? Ise mayite eeggifattino? (b) Daawiti ise yitinore macciishshanno gede assinosiri maati?

¹⁷ Shiima yanna gedensaanni, Abigiya Daawitinna mannisinni xaaddu. Hakkiinni ise rakke harrichote aaninni dirrite, Daawiti albaanni kumbuultu. (1 Sam. 25:20, 23) Ise Daawiti minaanniseranna maatesera maaranno gede eeggifatte, giddoseta gudisse hasaaphitinosi. Daawiti ise yitinore macciishshanno gede assinosiri maati?

¹⁸ Abigiya minaannise soˈro ise umise loossino soˈro gede assite adhite, Daawiti maarie yitino. Ise minaannise suˈmisinte gede gowwa ikkinota coyidhino; ise xawisse hatto yitinohu, togooha gowwa mancho qorichisha Daawitira ayirrinyesi xeissannota qummi assate ikkikki digatino. Abigiya Daawiti “Kaaliiqi ola” olamanni noota coyidhe, isi Yihowa riqiwaancho ikkinota ammantannota leellishshino. Qoleno ise “Kaaliiqi . . . Israeelete aana moohisannohe” yaase, Yihowa Daawitinna mootummate daafira uyino hexxo affinota leellishshanno. Hakkiinni saeno, Abigiya Daawiti mundeete shede abbannosire woy gedensaanni ‘gaabbisannosire’ assannokki gede huuccidhino. (1 Saamueeli 25:24-31 nabbawi.) Addanko, ise horo mararsidhe coyidhino!

19. Daawiti Abigiya coyidhinore macciishshe mayyii? Isi ise galatinohu mayiraati?

¹⁹ Daawiti mayyiiyya? Isi Abigiya abbitinore adhe kae togo yii: “Ate techo anewa soyinohehu, Israeelete Magani Kaaliiqi galataminoha ikko. Mannu mundee duneemmokki gedenna umiˈya rabbisiˈreemmokki gede assattaera tenne hayyo uyinohe Magani galatamo; aterano Maganu ikkohe.” Daawiti ise waajjitukkinni isinni xaaddara daggino daafira galatinose; qoleno mannu mundee dune shedu giddora eannota gatissinosita coyiˈrino. Isi “[Yoottare] adhoommona, keerunni haˈri” yiinose; qoleno shaqqillunni, “Coyiˈroottare macciishshoommo” yiino.—1 Sam. 25:32-35.

20, 21. (a) Abigiya minaannisewa higase dhagge ikkitannote yineemmohu mayiraati? (b) Abigiya Naabaalira coye kulate maltino yanna doodhase ise worbanna xiinxalla ikkitinota leellishshannohu hiittoonniiti?

²⁰ Abigiya Daawitiwiinni baxxite hadhanni heedhe, isi ledo xaaddu woyitita hedase digattanno; ise hakkawote konni ammanaminohu,  shaqqadu manchinna gibbo baxanno minaannise mereero mageeshshi badooshshi nooro wodanchitukki digattino. Ikkirono ise togoo coye heddanni dikeeshshitino. Qullaawu Maxaafi, “Abigiya minira [Naabaaliwa] iillitu” yaanno. Addanko, ise wolqase assitu deerrinni dancha minaama ikkite heeˈrate murcidhe minaannisewa higgino. Kayi ise Daawitiranna mannisira sagale uyitinota minaannisera kula hasiissinose. Mayira yiniro, isira tenne afate qoosso noosi. Qoleno ise isonna maatesi assite gatissino gara isira kula hasiissinose; isi tenne wolu manniwiinni macciishshe roore saalfatante minaamasi kultusiro woyyannosi! Kayinni hakko hashsha tenne kula didandiitanno. Isi hakkawote moote jiltanno gedee jili aana no; qoleno lowo geeshsha dimbe noo daafira isonoo diafino.—1 Sam. 25:36.

²¹ Konnira, Abigiya xaano worbanna xiinxalla ikkitino daafira, soodeenna Naabaalira dimbu higa geeshsha agartino. Isira soodo dimbu higinosiha ikkirono, miteekke tenne kultannosi woyite hanqe gawajjasera dandaanno. Ikkirono, ise waajjitukkinni baalankare kultinosi. Ise hatte farora Naabaali hanqe shaannoe yite heddukki digattino. Isi kayinni ofollinowa jalli yee gatino.—1 Sam. 25:37.

22. Naabaali ma ikkino? Mininsa manna gadadissannorinna beebba assidhannori daafira tenne xaggenni maa ronseemmo?

²² Manchu ofollinowa jalli yee gatinohu ma ikkeeti? Qullaawu Maxaafi, Naabaali “mase qiide” kinchu gede ikkinota kulanno. Isira surrete giddo mundee duˈnantinosiha ikkara dandaanno. Isi mitu tonnu barri gedensaanni reyino; reyinohu kayinni dhiwamino daafira calla diˈˈikkino. Qullaawu Maxaafi xagge, “Kaaliiqi Naabaali haaˈre hooli” yitanno. (1 Sam. 25:38) Yihowa Naabaali konni garinni qorichisheenna, Abigiya konni bushu manchira assiˈrasenni iillannose qarrinni fooliishsho afidhino. Xaa yannara Yihowa bushuulle togo maalaletenni qorichishannokkiha ikkirono, tini xagge mininsa manna gadadissannorinna beebba assidhannori goˈlite gata dandiitannokkita qaagiissitannonke. Yihowa yannasira, halaale fushshikki horo diaguranno.—Luqaasi 8:17 nabbawi.

23. Abigiya afidhinohu wolu atooti maati? Ise Daawiti minaama ikkitanno daafira naaxxitinokkita leellishannori maati?

²³ Abigiya bushu minaannisewiinni gatte fooliishsho afidhinoha calla ikkikkinni, wole atooteno afidhino. Daawiti Naabaali reyinota macciishshiti, Abigiya galtesi assiˈrara hede isewa manna soqqi. Hakkiinni ise, “Ani soqqamaanchosiiti; soqqamaanosi lekka nafa hayishshate qixxaawate” yite qoltino. Ise Daawiti minaama ikkammaraati yite dinaaxxitino; ise wole agurina soqqamaanosi lekka nafa hayishsheemma  yitino! Qullaawu Maxaafi, ise xaano rakke kaˈe, Daawitiwa hadhara qixxaabbinota kulanno.—1 Sam. 25:39-42.

24. Abigiya Daawitira assidhuhu gedensaanni, mayi qarri iillinose? Ikkirono minaannisenna Maganise ise ma garinni laˈanno?

²⁴ Abigiya Daawitira assidhuhu gedensaanni, mittoreno diqarrantino yaa diˈˈikkino. Hakkawote Daawitira wonanni Akinahoomi yinanni galte noosi. Hatte yannara Maganu mitte saˈne adhinannita fajjinoha ikkirono, tini hakkawaro noohu ammanamino meentira lowo qarra abbitanno. Qoleno Daawiti hakkawote moote diˈˈikkino; hakko daafira isi moote ikke Yihowara soqqama geeshsha addi addi qarrinna guficho ikkannori heeˈranno. Ikkollana, Abigiya Daawiti ledo heedhino diro baalanka iso ammanante kaaˈlitinosi; gedensoonni ise isira labbaa qaaqqo iltino; hattono baxannosenna gawajjannorinni agarannose minaanni nooseta huwattino. Mitte hige Daawiti ise qafadde adhite hadhinori anganni nafa gatisinose! (1 Sam. 30:1-19) Konni garinni Daawiti, togooha xiinxalla, worbuullenna ammanamino meento baxannonna ayirrisanno Maganiha Yihowa lawishsha harunsino.