1, 2. (a) Haanna doogo hadhara qixxaabbanni heedhe hagiirraame ikkitinokkihu mayiraati? (b) Haanna xaggenni maa ronseemmo?

HAANNA qarrase cincite doogo hadhara qixxaabbanni no. Wonaatiro tini isera hagiirru yannaati; mayira yiniro, minaannise Hilqaana diru dirunku xaadooshshu dunkaanira Yihowa magansiˈrate maatesi gudise Seelo haaˈre haˈranno. Yihowa togoo yannara mannisi hagiidhara hasiˈranno. (Marro 16:15 nabbawi.) Haannano anjesenni kayisse togoo ayyaanna ayirrissanno woyite lowo geeshsha hagiidhitannoti dihuluullissannote. Muli yanna kawa kayi coyi isera dibashsho gedeeti.

² Maganu, ise baxannose minaanna oye maassiˈrinose. Ikkirono, Hilqaanara Finaana yinanniti wole galteno noosi. Ise Haanna yaadaameette assate mixidhe kaˈinota labbanno. Finaana, aleenni kullite gedeeta ayyaana ayirrinsanni yanna horoonsidhe Haanna wodana madiissate woˈnaaltanno. Hiittoonni? Roorenkanni, Haanna Yihowara noose ammana wolqasera aleenni ikkino coye dandiite heedhanno gede kaaˈlitinosehu hiittoonniiti? Hagiirrikki baˈˈanno gede assanno qarri iillanni nooheha ikkiro, Haanna xagge lowo geeshsha jawaachishshannohe.

3, 4. Haanna amadinohu lamu buutote qarri hiikkonneeti? Lamunku lowo qarraati yineemmohu mayiraati?

³ Qullaawu Maxaafi, Haanna lamu buutote qarri amadinoseta kulanno. Ise umi qarra gargadhate mitore assa dandiitannoha ikkirono, layinkiha hooˈlate kayi assite affannori dino. Umihunni, ise ginase gibbannose. Layinkihunni, ise ila diafidhino. Ila hooga ilte sunqiˈra halchitanno meyate baalantera qarraho; Haanna lophitino budira isinni kuni lowo geeshsha dadillisannoreeti. Hakkawaro, mittu mittunku ayiddi suˈmi gaˈrensa giddonni baˈˈannokkihu ooso ilanturooti. Insa budira, ooso ila hooga mishiishshannotenna saalsiissannote.

⁴ Haanna, Finaana qussa hooggoommesero qarrase cincitara dandiitanno. Ginate ledo heeˈra wonanni halchinannire diˈˈikkino. Togoo maate giddo nyerri yaa, heewonna dadillu dihooganno.  Togoo adhama, Maganu Edeni Gannatete xintino adhama ledo sumuu yitannota diˈˈikkitino; isi fushshino seeri garinni, mittu mittella adhanno. (Kal. 2:24) Konni daafira, Qullaawa Maxaafa nabbambeemmo woyite mitte saˈne adha halchinannire ikkitinokkita huwanteemmo; Hilqaana maate giddo ikkinori tenne leellishanno lawishshaati.

5. Finaana Haanna caacceessa hasidhinohu mayiraati? Ise Haanna caacceessitinohu ma garinniiti?

⁵ Hilqaana Haanna roorse baxanno. Ayihudete xagge yitanno gara ikkiro, Hilqaana umo adhinoti Haannaati; hakkiinni shiimu diri gedensaanni Finaana lexxino. Ikkihano ikkiro, Finaana Haanna hinaasse giddo gooffino daafira, ise duucha doogonni caacceessitanno. Ise Haanna roortinohu ooso ilasenniiti. Finaana ooso aana aanaho iltino; ise iltu kiiro, ‘Ane ikkaahu isi ayi no?’ yite heddanno. Finaana Haanna mararanna sheshifachisha agurte, ila hoogasenni roore xissiisidhanno gede assitino. Qullaawu Maxaafi Finaana Haanna beebba assidhino gara kulanni, “Qussitanni caacceessituse” yaanno. (1 Sam. 1:6) Finaana konne assitannohu affanni heedheeti. Ise mixidhinonte gede, Haanna wodana madiissitino.

6, 7. (a) Hilqaana Haanna sheshifachishate woˈnaalinoha ikkirono, ise Finaana assitannosere isira kuˈlitinokkihu mayira ikkara dandaanno? (b) Haanna ila hoogginohu Yihowa hanqinose daafiraati? Xawisi. (Lekkaalliidi qaagiishsha lai.)

⁶ Finaanara Haanna qussate roore dagatannosehu, maatensa ayyaana ayirrisate dirunni mitte higge Seelo hadhanno woyiteeti. Hilqaana Yihowara kakkalo shiqishanno woyite, Finaanate batinye oosora yaano ‘seennunna labballi oosose baalate’ iillannonsa qeecha aannonsa. Haanna kayinni roorse baxannose daafira lame anga asse aannose. Hinaasse giddo gooffinoti Finaana tenne laˈanno woyite, Haanna buseessitanno; hattono ilaweelo ikkase qaagganno gede assitannose. Hakko daafira Haanna wiˈlitanni ita hoogganno. Hilqaana kayinni baxanno minaamasi Haanna dadillite ita hoogginota lae, ise sheshifachishate woˈnaalanno. Isi togo yaannose: “Haanna, mayira wiˈlatta? Mayira ita giwatta? Wodanikki mayira dadillanno? Tonne oosonni ani dirooreemmohe?”—1 Sam. 1:4-8.

⁷ Hilqaana, Haannara qarra ikkinori ooso ila hooga ikkinota huwatino. Qoleno isi baxannoseta afase Haannara loworeeti. * Ikkollana, Hilqaana Finaana bunshere kayise dicoyiˈrino;  Qullaawu Maxaafino Haanna isira Finaana assitinosere kuˈlitino diyaanno. Ise tenne kuˈlitinokkihu, kulturo qarru lexxannoseta affino daafira ikkara dandaanno. Hilqaana afoommero qarrase hoola dandaanno? Tini roorenka Finaana Haanna gibbanno gedenna Finaana oosonna soqqamaasine isera haˈlite Haanna roore caacceessitanno gede diassita ikka? Tini Haanna albinni roore allagginsannise gedella assitanno.

8. Mannu xagarannohe woy miicannohe woyite, Yihowa taashsho baxanno Magano ikkinota afakki sheshifachishshannohehu hiittoonniiti?

⁸ Hilqaana Finaana bunshenna xagarro afinoha ikkirono ikka hoogirono, Maganu Yihowa kayinni baalankare afino. Qaalisi Isi baalankare lainota xawise kulanno daafira, hinaassannorinna bunshe baxxannori tenne affe qoropha hasiissannonsa. Wole widoonni kayinni, Haanna gedeeha fayyaaleessanna keere baxanno manna, taashsho baxanno Magani Yihowa yannasira isi hedino garinni baalankare biddi assannota afansa sheshifachishshannonsa. (Marro 32:4 nabbawi.) Haannano tenne huwatukkinni digattino; mayira yiniro, ise kaaˈlo afiˈrate Yihowa huuccidhino.

9. Haanna ginase bunshe affe heedhenni Seelo haˈrase, ninkera dancha lawishsha ikkitannonkehu hiittoonniiti?

⁹ Maate gutte kaˈe doogo hadhara kachaachantanni no. Qaaqquullu nafa gatikkinni haˈrara qixxaawanni no. Tini lowo maate Seelo iillate, baga batidhannota Efireemi gobba tayisse 30km saˈanno doogo haˈra hasiissannonsa. * Seelo iillannohu lekkatenni mitto woy lame barra haˈreeti. Haanna ginase bunshe affinoha ikkirono, mine gata dihasidhino. Konni garinni, ise Maganu soqqamaasine baalantera kaajja lawishsha ikkitino. Wolu manniti busha ikkito, Yihowa magansiˈneemmota hooltankera wodha dihasiissannonke. Togoori ataawe ikkankera wodhinummoro, cincineemmo gede kaaˈlannonkehu Yihowa atooti gate baˈˈannonke.

10, 11. (a) Haanna bayichonko xaadooshshu dunkaaniwa hadhinohu mayiraati? (b) Haanna giddoseta huuccattotenni iimi Annisera hasaaphitinohu hiittoonniiti?

¹⁰ Tini jawa maate barra woˈma ilaalaame doogo hadhanni hosse, Seelo iilla rakkuti, wole ilaalla dukkisseenna noohu mittu ilaalira fooliishshidhu. Insa iilla rahita, Haanna Yihowara huuccattotenni hasaaphitannore seekkite heddukki digattino. Insa Seelo iilliti, sagale itara ofolli. Hakkiinni Haanna bayichonko maatetewiinni baxxite, Yihowahu xaadooshshu dunkaaniwa martu. Hakkawote Kakkalaanote Biili Eeli waalchu mule ofolle no. Haanna huuccattose calla heddanni noo daafira, Eeli noonta diaffino. Ise xaadooshshu dunkaaniwa  noo daafira, Yihowa huuccattose macciishshannota dihuluullantino. Qarrise mannaho leella hoogirono, iimi Annisera leellannosi. Ise lowo geeshsha xissiisidhino daafira, hururante wiˈla hanaffu.

¹¹ Wiˈlitanni noo daafira bisise huxiˈranna, wodanisenni Yihowa huuccidhu. Wodanise xisso isira kuˈlate hinciiccantanno woyite, suumese huxidhanni no. Ise giddoseta fushshite Yihowara hasaaphitanni, seeda yanna huuccidhino. Ikkollana, ise huuccidhinohu Maganu ila aannose gede calla diˈˈikkino. Haanna Maganu atoote afiˈra calla ikkikkinni, iseno wolqase assitu deerrinni isira aateno lowo geeshsha hasidhino. Konni daafira, ise Yihowa labbaa qaaqqo uyisero heeshshosi diro baala Maganoho soqqamanno gede uyitara xano xaˈnitino.—1 Sam. 1:9-11.

12. Haanna lawishshi leellishannonte gede, huuccatto assiˈneemmo woyite maa qaaga hasiissannonke?

¹² Haanna lawishshinni huuccattote daafira lowore ronseemmo. Mittu qaaqqi shaqqado annasi addaxxe dhiwinosire baala kuˈlannonte gede, Yihowano mittoreno huxuxxi yinummokki giddonketa fushshine isira hasaaphinammora koyisinonke. (Faarso 62:8 nna 1 Teselonqe 5:17 nabbawi.) Soqqamaasinchu Pheexiroosi Yihowa huucciˈrate daafira ayyaanunni togo yee jawaachishannore borreessino: “Kiˈnere malannohu isootina, qarrisannoˈnere baala isi aana tuqqe.”—1 Phe. 5:7.

13, 14. (a) Eeli muddame Haanna mayino? Mayira? (b) Haanna Eeli coyishiishshino gari jawaata ammana nooseta leellishannohu hiittoonniiti?

¹³ Ikkollana, qarrinke Yihowara leellanno gede mannaho dileellanno. Haanna wiˈlitanni huuccidhanni heedheenna, mitte huuro masissuse! Ada kakkalaasinete biili Eeli wonaanku laˈˈanni noose! Isi togo yiise: “Tini dimbakki aanikkinni mamoote hoˈlitanno? Dimbakki agurte garaho higi.” Eeli hatto yiinohu bisisenna suumese huxidhanna laino daafiraati. Isi ma ikkitinoro xaˈma agure, muddame dimbootta yiinose!—1 Sam. 1:12-14.

¹⁴ Haanna wonanni xissiisidhe giddo gooffe noota, lowo geeshsha ayirrinsanni manchi beebbate dimbootta yiiseta mageeshshi geeshsha xissiisidhinoro hanni hedi! Ikkirono, ise xaano jawaata ammana nooseta leellishshino. Haanna, mannunniti guuntete xeˈne Yihowa magansidhannokki gede ataawe ikkitasera diwodhitino. Ise Eeli ayirrinyunni coyishiishshino; hattono qarrase kultinosi. Hatte farora isi coyiˈrinorira gaabbikki digatino; hakko daafira shaqqillunni, “Israeelete Magani huucciˈroottare oohena, keerunni haˈri” yiinose.—1 Sam. 1:15-17.

15, 16. (a) Haanna giddoseta Yihowara hasaaphasenna xaadooshshu dunkaanira iso magansiˈrase kaaˈlitinosehu hiittoonniiti? (b) Hexxo mudhineemmo woyite Haanna lawishsha harunsa dandiineemmohu hiittoonniiti?

¹⁵ Haanna giddoseta Yihowara hasaaphasenna xaadooshshu  dunkaanira iso magansiˈrase kaaˈlitinosehu hiittoonniiti? Maganu Qaali togo yaanno: “Hakkiinni kaˈe hadhe sagaleno ittu. Hakkunni gedensaanni albisera dadillu dileellino.” (1 Sam. 1:18) Haanna xa fooliishsho afidhino. Ise duha ikkitinoseta wodanise xisso, lowo geeshsha wolqaataamo ikkinohu iimi Annise aana tuqqitino. (Faarso 55:22 nabbawi.) Yihowa wolqara aleenni ikkino qarri nooni? Horonta dino!

¹⁶ Buutote qarri amadannonke woyite, woy hexxo mudhineemmo woyite, Haanna lawishsha harunsanna ‘huuccatto macciishshanno’ Maganira ruxxi yinummokkinni giddonketa hasaapha hasiissannonke. (Far. 65:2) Ammanatenni konne assineemmoha ikkiro, dadillinke baeenna “mannu hedora aleenni ikkinohu Maganu keeri” heeˈrannonke.—Fil. 4:6, 7.

17, 18. (a) Hilqaana Haanna xaˈnitino xano giwinokkita leellishinohu hiittoonniiti? (b) Finaana xaate Haanna maa assa dandiitannokkita huwattino?

¹⁷ Layinki soodo, Haanna Hilqaana ledo wirro xaadooshshu dunkaana martino. Ise Yihowa mayite huuccidhinoronna xanose Hilqaanara kultukki digattino; mayira yiniro, Muse Seeri garinni minaanni sumuu yaa hoogiro minaamasi xano hoolara dandaanno. (Kir. 30:10-15) Kuni ammanamino manchi kayi xanose dihoolino. Hatteentenni, isinna Haanna qaensa higara albaanni Yihowa xaadooshshu dunkaanira mitteenni magansiˈrino.

¹⁸ Ikkina Finaana xaate Haanna caacceessa dandiitannokkita affinohu mamooteeti? Qullaawu Maxaafi tenne bade dikulanno; ikkirono, “Hakkunni gedensaanni albisera dadillu dileellino” yitanno yaatto, Haanna hakkuyi gedensaanni sheshifattinotanna hagiirraame ikkitinota leellishshanno. Ikkihano ikkiro, Finaana xagarrosenni Haanna qoha dandiitannokkita mulenni huwattino. Qullaawu Maxaafi giddo ise suˈma layinkita dikulloonni.

19. Haanna afidhino atooti maati? Ise konne atoote uyinosehu ayetiro habbinokkita leellishshinohu hiittoonniiti?

¹⁹ Haammatu agani saita, Haanna sheshifattinoha calla ikkikkinni hagiidhite ikkitaata hooggu! Ise ada godowii no! Ikkollana, ise hagiidhite konne atoote uyinosehu ayetiro horo dihabbino. Ise iltuhu gedensaanni, qaaqqoho suˈma Saamueeli yite fushshitino; hatto yaa “Maganu Suˈma” yaate. Tini, Haanna assitannonte gede Maganu suˈma gana kultannota ikkitukki digattino. Hakko diro Hilqaana maatensa haaˈre Seelo haˈri woyite, Haanna insa ledo dihadhino. Ise qaaqqu unuuna agura geeshsha sase diro, qaetenni dihadhino. Hakkiinni ise baxxanno qaaqqisewiinni baxxitanno barrira qixxaabbino.

20. Haannanna Hilqaana Yihowara eino qaale wonshinohu hiittoonniiti?

 ²⁰ Ise qaaqqisewiinni baxxitu woyite, godowu shafaminoseti dihuluullissannote. Hige Seelo soqqamannohu mitu meenti Saamueeli dancha gede asse towaatara dandaannota Haanna affino. Ikkirono, isi xaara daaimaho. Qoleno qaaqqisewiinni baxxa hasidhanno ama nooni? Ikkollana, Haannanna Hilqaana qaaqqonsa baxisidhinokki giddonni ikkikkinni hagiirrunni masse uyino. Insa Maganu mine kakkalo kakkale kae, alba Haanna xaˈnitino xano Eelira qaagiissihu gedensaanni qaaqqo isira uyino.

21. Haanna huuccidhino huuccatto ammanase mageeshshitero leellishshannohu hiittoonniiti? (“ Lame Dhagge Ikkitanno Huuccatto” yitanno saaxineno lai.)

²¹ Haanna hakkuyi gedensaanni huuccidhino huuccatto Yihowa Qaalisi giddo borreessinanni gede assino. Umi Saamueeli 2:1-10 noota ise coyidhinota mitte mittenta hedo nabbawatto woyite, ammanase mageeshshi geeshsha kaajjado ikkitinoro huwatatto. Ise Yihowa taalle nookki wolqasinni booˈnitannore shollishanno daafira, gadadaamma maassiˈrannohura, hattono heeshshote woranna shaa dandaannoha ikkino daafira guwissinosi. Qoleno iimi Annise gedeehu qullaawu, taashsho baxannohunna ammanaminohu wolu nookki daafira Iso gotti gotti assidhinosi. Haanna “Ate Maganinke gedeehu golu dino” yitinohu dimullaati. Yihowa addaxxinannihonna soorramannokki Maganooti. Isi, isiwa higge raartanno gadadaammiranna miicantinorira baalaho golonsaati.

22, 23. (a) Saamueeli naggi yii woyite annisinna amasi baxxannosita afino yineemmohu mayiraati? (b) Yihowa Haanna lede maassiˈrinosehu hiittoonniiti?

²² Qaaqqu Saamueeli, Yihowa togo addaxxitanno ama noosi daafira baˈraaˈrinoho. Isi amasi qalli yiinoha ikkirono, tunge agurroonnie yee dihedino. Haanna diru dirunku Seelo martanno woyite, xaadooshshu dunkaanira  soqqamanno woyite aanaanni uddiˈranno uddano gante massitannosi. Haanna qaaqqisera angasenni uddano gante massitannohu baxxannosita leellishateeti. (1 Saamueeli 2:19 nabbawi.) Ise massitinosita haaro uddano uddisiisse, biddi biddi assitanni, jawaachishannosire coyidhanni, shaqqillunni hasaawissannosi gara heda dandiineemmo. Saamueeli togoo ama afiˈrasinni maassaminoho. Isino lophe annisiranna amasira calla ikkikkinni Israeelete daga baalate atoote ikkino.

²³ Haannano hawante digattino. Yihowa maassiˈreennase Hilqaanara wole onte ooso iltino. (1 Sam. 2:21) Ikkirono, isera atoote baala roorino atooti iimi Annise Yihowa ledo noose jaaloomaati yaa dandiineemmo; kuni jaaloomise yannate kiiro lexxanni haˈrino. Atino ammanatenni Haanna faale hadhe, togoo atoote afiˈratto gede halchineemmo.