Abamarayika ni ibiremwa bifise ububasha burengeye ubw’abantu. (2 Petero 2:​11) Abamarayika baba mw’ijuru, hakaba ari ahantu kure cane ata muntu ashobora kubona. (1 Abami 8:​27; Yohani 6:​38) Ni co gituma abamarayika bitwa kandi ibiremwa vy’impwemu.​—1 Abami 22:21; Zaburi 18:10.

Abamarayika bavuye hehe?

 Yezu ni we Imana yakoresheje mu kurema abamarayika, Bibiliya ikaba imwita “imfura mu biremwa vyose.” Mu kwerekana ingene Imana yakoresheje Yezu mu kurema, Bibiliya ivuga iti: “Biciye kuri [Yezu ni] ho ibindi bintu vyose vyaremwe mw’ijuru no kw’isi, ibiboneka n’ibitaboneka,” harimwo n’abamarayika. (Abakolosayi 1:13-17) Abamarayika ntibarongora kandi ntibarondoka. (Mariko 12:25) Ahubwo riho, umwumwe wese muri abo “bana b’Imana y’ukuri” yararemwe.​—Yobu 1:6.

 Abamarayika baremwe kera cane, imbere y’uko isi ibaho. Igihe Imana yarema isi, abamarayika baciye “[batangura] gusamiriza impundu.”​—Yobu 38:4-7.

Abamarayika ni bangahe?

 Bibiliya ntivuga igitigiri nyezina, ariko irerekana ko ari benshi cane. Nk’akarorero, mu bintu intumwa Yohani yeretswe, hariho aho yabonye amamiliyoni amajana n’amajana y’abamarayika.—Ivyahishuwe 5:11.

Umumarayika umwumwe wese, yoba afise izina na kameremere?

 Egome. Bibiliya iravuga amazina y’abamarayika babiri: Mikayeli na Gaburiyeli. (Daniyeli 12:1; Luka 1:26) a Hari abandi bamarayika biyemereye ko bafise amazina, mugabo ntibayahishuye.​—Itanguriro 32:29; Abacamanza 13:17, 18.

 Abamarayika bafise kameremere zitandukanye. Barashobora kuyaga hagati yabo. (1 Abakorinto 13:1) Barashobora kwiyumvira kandi barashobora guhimbaza Imana. (Luka 2:13, 14) Kandi barafise uburenganzira bwo kwihitiramwo gukora iciza canke ikibi, mbere hariho abahisemwo ikibi mu kwiyunga kuri Shetani baragarariza Imana.​ —Matayo 25:41; 2 Petero 2:4.

Hoba hariho inzego mu bamarayika?

 Egome. Umumarayika afise ububasha n’ubushobozi bukomeye kuruta abandi bose ni Mikayeli, umumarayika mukuru. (Yuda 9; Ivyahishuwe 12:7) Abaserafi ni bo bamarayika bo ku rwego rwo hejuru bakorera hafi y’intebe y’ubwami ya Yehova. (Yesaya 6:2, 6) Abakerubi na bo nyene ni abamarayika bo ku rwego rwo hejuru barangura ibikorwa bidasanzwe. Nk’akarorero, igihe Adamu na Eva birukanwa mu murima wa Edeni, abakerubi ni bo bagumye bacungereye inzira ija muri uwo murima.​—Itanguriro 3:23, 24.

Abamarayika boba bafasha abantu?

 Egome, muri iki gihe Imana irakoresha abamarayika bayo b’abizigirwa kugira ifashe abantu.

•   Imana irakoresha abamarayika mu kuyobora abasavyi bayo igihe bamamaza ubutumwa bwiza bw’Ubwami bw’Imana. (Ivyahishuwe 14:6, 7) Ivyo birafasha abantu bamamaza ubwo butumwa bwiza hamwe n’ababwumviriza.​—Ivyakozwe 8:26, 27.

•   Abamarayika barafasha mu gutuma abantu babi batanduza ishengero ry’abakirisu.​—Matayo 13:49.

•   Abamarayika barayobora bakongera bagakingira abantu bizeye Imana.​—Zaburi 34:7; 91:10, 11; Abaheburayo 1:7, 14.

•   Vuba, abamarayika bazotuma abantu bahozwa mu gukorana na Yezu Kristu kugira baherengeteze ababisha.​—2 Abatesalonika 1:6-8.

Buri muntu wese yoba afise umumarayika amujejwe?

 Naho abamarayika bitwararika ko abasavyi b’Imana baguma bafitaniye ubucuti bwiza na yo, ivyo ntibisigura ko Imana yahaye buri muntu wese umumarayika amujejwe. b (Matayo 18:10) Abamarayika ntibakingira abasavyi b’Imana mu ngorane zose canke mu bigeragezo vyose. Bibiliya yerekana ko akenshi Imana izoza ‘iracira icanzo’ abantu bari mu bigeragezo mu kubaha ubwenge be n’inkomezi bibafasha kuvyihanganira.​—1 Abakorinto 10:12, 13; Yakobo 1:2-5.

Ivyiyumviro bitari vyo vyerekeye abamarayika

 Iciyumviro kitari co: Turashobora gusenga abamarayika ngo badufashe.

 Ukuri: Yehova Imana ni we wenyene dukwiye gusenga. (Ivyahishuwe 19:10) Dukwiye gusenga Imana yonyene, tukabicisha mw’izina rya Yezu.​—Yohani 14:6.