လီၣ်ဖျါ ၁၆:၁-၂၁
-
ကစၢ်ယွၤ အတၢ်သးဒိၣ်ထီၣ် အလီခီဖျၢၣ် နွံဖျၢၣ် (၁-၂၁)
၁၆ ဒီးယနၢ်ဟူတၢ်ကလုၢ်ဖးဒိၣ် သီၣ်ထီၣ်လၢ တၢ်စီဆှံအလီၢ်+ ဒီးတဲဘၣ် မူခိၣ်ကလူးနွံဂၤလၢ “လဲၤလူလီၤ ကစၢ်ယွၤ အတၢ်သးဒိၣ်ထီၣ် အလီခီဖျၢၣ် နွံဖျၢၣ်လၢ ဟီၣ်ခိၣ်ချၢတက့ၢ်.”+
၂ မူခိၣ်ကလူး အဆိကတၢၢ်တဂၤန့ၣ် ဟးထီၣ်ဒီး လူလီၤအလီခီဖျၢၣ်လၢ ဟီၣ်ခိၣ်ချၢလီၤ.+ ဒီးတၢ်ပူၤလီၢ်လၢ အလီၤပျံၤလီၤဖုး+ ဒီးအနးမးန့ၣ် အိၣ်ထီၣ်ဝဲလၢ ပှၤလၢအအိၣ်ဒီးတၢ်ပနီၣ်လၢ အဘၣ်ဃးဒီး ဆၣ်ဖိကီၢ်ဖိလၢအအၢ+ ဒီးအဘူၣ်ထီၣ်ဘါထီၣ် အဂီၤန့ၣ် အလိၤလီၤ.+
၃ မူခိၣ်ကလူး ခံဂၤတဂၤန့ၣ် လူလီၤအလီခီဖျၢၣ်လၢ ပီၣ်လဲၣ်ပူၤလီၤ.+ ဒီးပီၣ်လဲၣ် ကဲထီၣ်ဝဲတၢ်သွံၣ်+ ဒ်ပှၤလၢအသံတဂၤအသွံၣ်လီၤ. ဒီးတၢ်သးသမူခဲလၢာ်လၢ ပီၣ်လဲၣ်ပူၤန့ၣ်+ သံကွံာ်ဝဲလီၤ.
၄ မူခိၣ်ကလူး သၢဂၤတဂၤန့ၣ် လူလီၤအလီခီဖျၢၣ်လၢ ထံကျိတဖၣ် ဒီးထံထီၣ်ပၢၢ်တဖၣ်အပူၤလီၤ.+ ဒီးတၢ်သ့ၣ်တဖၣ်န့ၣ် ကဲထီၣ်ဝဲတၢ်သွံၣ်လီၤ.+
၅ ယနၢ်ဟူမူခိၣ်ကလူးလၢ အအိၣ်ဒီးတၢ်စိတၢ်ကမီၤလၢ ထံအဖီခိၣ်တဂၤန့ၣ် တဲဝဲလၢ “ကစၢ်ယွၤဧၢ, နမ့ၢ်ယွၤလၢအအိၣ်ဝဲ ဒီးလၢအအိၣ်ပာ်စၢၤဝဲ,+ နမ့ၢ်ယွၤလၢအသးတီဒီး+ နအိၣ်ဒီးတၢ်တီတၢ်လိၤ မ့ၢ်လၢနဟ့ၣ်လီၤ တၢ်စံၣ်ညီၣ်တဖၣ်အံၤအဃိလီၤ.+
၆ အဝဲသ့ၣ်လူလီၤ ပှၤစီဆှံဒီးဝံတဖၣ်+ အသွံၣ်အဃိ နဟ့ၣ်ဒုးအီအဝဲသ့ၣ်လၢ တၢ်သွံၣ်န့ၣ်+ မ့ၢ်တၢ်လၢ အကြၢးဒီးအဝဲသ့ၣ်လီၤ.”+
၇ ဒီးယနၢ်ဟူ တၢ်ကလုၢ်သီၣ်ထီၣ်လၢ တၢ်လုၢ်လီၢ် လၢအတဲဝဲလၢ “မ့ၢ်လံ, သ့တၢ်လၢာ်+ ယဟိဝၤယွၤဧၢ,* နတၢ်စံၣ်ညီၣ်တဖၣ်န့ၣ်+ မ့ၢ်ဝဲတီဝဲ ဒီးတီဝဲလိၤဝဲလီၤ.”
၈ မူခိၣ်ကလူး လွံၢ်ဂၤတဂၤန့ၣ် လူလီၤအလီခီဖျၢၣ်လၢ မုၢ်အလိၤလီၤ.+ ဒီးမုၢ်န့ၣ် ဒိးန့ၢ်ဘၣ်အခွဲးလၢ ကအူအီၣ်ပှၤဟီၣ်ခိၣ်ဖိလီၤ.
၉ ဒီးပှၤဟီၣ်ခိၣ်ဖိတဖၣ်န့ၣ် အူအီၣ်ဝဲလၢ တၢ်ကိၢ်ဖးဒိၣ်အံၤအဃိလီၤ. ဘၣ်ဆၣ် အဝဲသ့ၣ်ကတိၤထီဒါ ကစၢ်ယွၤလၢအအိၣ်ဒီး တၢ်စိတၢ်ကမီၤလၢ တၢ်နးတၢ်ဖှီၣ်တဖၣ်အံၤ အဖီခိၣ်တဂၤန့ၣ် အမံၤလီၤ. ဒီးအဝဲသ့ၣ် တပီၢ်ယၢ်လီၤက့ၤအသးဘၣ် ဒီးတဟ့ၣ်တၢ်လၤကပီၤလၢ ကစၢ်ယွၤအအိၣ်ဘၣ်.
၁၀ မူခိၣ်ကလူး ယဲၢ်ဂၤတဂၤန့ၣ် လူလီၤအလီခီဖျၢၣ်လၢ ဆၣ်ဖိကီၢ်ဖိလၢအအၢတဒု အလီၢ်ပစိာ်အလိၤလီၤ. ဒီးတၢ်လၢအပၢဝဲခဲလၢာ်န့ၣ်* ခံးလီၤဝဲ+ ဒီးပှၤဟီၣ်ခိၣ်ဖိတဖၣ် အ့ၣ်တံၢ်အပျ့ၤ ခီဖျိလၢ အဝဲသ့ၣ် တူၢ်ဘၣ်တၢ် ဆါဝဲနးမးအဃိလီၤ.
၁၁ ဘၣ်ဆၣ် အဝဲသ့ၣ်ကတိၤထီဒါ မူခိၣ်အကစၢ်ယွၤ ခီဖျိလၢ အဝဲသ့ၣ်တူၢ်ဘၣ်တၢ် ဆါဝဲနးမး ဒီးအဝဲသ့ၣ် အပူၤလီၢ်တဖၣ်အဃိလီၤ. ဒီးအဝဲသ့ၣ် တပီၢ်ယၢ်လီၤက့ၤအသးလၢ အတၢ်မၤတဖၣ်ဘၣ်.
၁၂ မူခိၣ်ကလူး ဃုဂၤတဂၤန့ၣ် လူလီၤအလီခီဖျၢၣ်လၢ ထံကျိဖးဒိၣ် ဖရၤသးအဖီခိၣ်+ ဒီးအထံတဖၣ်ဃ့ထီကွံာ်ဝဲ+ ဒ်သိးကကတဲာ်ကတီၤန့ၢ်ဝဲ စီၤပၤတဖၣ်လၢ+ အအိၣ်လၢမုၢ်ထီၣ်န့ၣ် အကျဲအဂီၢ်လီၤ.
၁၃ ဒီးယထံၣ် တၢ်ကတိၤလၢ အတကဆှီဘၣ်သၢခါ လၢအလီၤဂာ်ဒီးဒ့ၣ်တဖၣ်န့ၣ် ဟဲထီၣ်ဝဲလၢ ပယိၤအကိာ်ပူၤ,+ လၢဆၣ်ဖိကီၢ်ဖိလၢအအၢတဒု အကိာ်ပူၤ ဒီးလၢဝံအဘျၣ်တဂၤ အကိာ်ပူၤလီၤ.
၁၄ နီၢ်ကီၢ်န့ၣ် တၢ်သ့ၣ်တဖၣ်အံၤ မ့ၢ်ဝဲတၢ်ကတိၤတဖၣ်လၢ အဟဲလၢ တၢ်ဝံတၢ်နါအအိၣ်လီၤ. တၢ်သ့ၣ်တဖၣ်အံၤမၤ တၢ်ပနီၣ်လီၤလးတဖၣ်+ ဒီးလဲၤဝဲလၢ စီၤပၤတဖၣ်လၢ အအိၣ်လၢဟီၣ်ခိၣ်ဒီဘ့ၣ် ဒ်သိး ကပာ်ဖှိၣ်ထီၣ်အဝဲသ့ၣ်လၢ တၢ်ဒုးလၢ+ အကမၤအသး ဖဲသ့တၢ်လၢာ်ကစၢ်ယွၤ+ အမုၢ်နံၤဖးဒိၣ်အခါလီၤ.
၁၅ “ပလီၢ်သးတက့ၢ်. ယကဟဲဒ် တၢ်ဘျၣ်အသိးလီၤ.+ ပှၤလၢအစီၣ်မဲာ်စီၣ်နါ+ ဒီးကၤဝဲအတၢ်ကူတၢ်ကၤ ဒ်သိး အသုတဟးဘ့ၣ်ဆ့ ဒီးပှၤသုတထံၣ်ဘၣ် အတၢ်မဲာ်ဆှးအလီၢ်+ တဂ့ၤအဂီၢ်န့ၣ် ကသးခုဝဲလီၤ.”
၁၆ ဒီးတၢ်သ့ၣ်တဖၣ်အံၤ* ဒုးအိၣ်ဖှိၣ်ဝဲ စီၤပၤတဖၣ်လၢ တၢ်လီၢ်လၢ အဘၣ်တၢ်ကိးအီၤလၢ ဧ့ၤဘြံၤကျိာ်လၢ အၢ်မက့းဒိၣ်လီၤ.*+
၁၇ မူခိၣ်ကလူး နွံဂၤတဂၤန့ၣ် လူလီၤအလီခီဖျၢၣ်လၢ ကလံၤအကျါလီၤ. ဒီးတၢ်ကလုၢ်ဖးဒိၣ် သီၣ်ထီၣ်လၢတၢ်စီဆှံအလီၢ်+ လၢလီၢ်ပစိာ်အအိၣ် ဒီးတဲဝဲလၢ “ဝံၤလံ.”
၁၈ ဒီးလီဝၢ်ဒံးကပီၤထီၣ်, တၢ်အကလုၢ်တဖၣ်သီၣ်ထီၣ်, လီသီၣ်ထီၣ်ဝဲ ဒီးဟီၣ်ခိၣ်ဟူးဖးဒိၣ်လီၤ. စးထီၣ်လၢ ပှၤဟီၣ်ခိၣ်ဖိအိၣ်ထီၣ်လၢ ဟီၣ်ခိၣ်ချၢလံၤလံၤန့ၣ်+ ဟီၣ်ခိၣ်တဟူးဒ်အံၤ နီတဘျီဘၣ်. ဟီၣ်ခိၣ်ဟူးတခါအံၤ ဟူးဝဲဖးဒိၣ် ဒီးဖးဆူၣ်ညါလီၤ.
၁၉ ဝ့ၢ်ဖးဒိၣ်န့ၣ်+ သ့ၣ်ဖးဝဲသၢက့ ဒီးပှၤကလုာ်အဝ့ၢ်တဖၣ်န့ၣ် လီၤပှီၢ်ဝဲလီၤ. ဒီးကစၢ်ယွၤ သ့ၣ်နီၣ်ထီၣ်က့ၤ ဝ့ၢ်ဘၤဘူၤလိၣ်ဖးဒိၣ်+ ဒ်သိး အကဒုးအီအီၤလၢ ခွးလၢအပှဲၤဒီး အတၢ်သးဒိၣ်ထီၣ်+ စပံးထံအဂီၢ်လီၤ.
၂၀ ဒီးကီးကိးဖျၢၣ်ဒဲးန့ၣ် ဃ့ၢ်ကွံာ်ဝဲ ဒီးကစၢၢ်တဖၣ်န့ၣ် လီၤမၢ်ကွံာ်ဝဲလီၤ.+
၂၁ ဝံၤဒီး သူၣ်ဖးဒိၣ်တဖၣ်န့ၣ် လီၤတဲာ်လၢမူခိၣ် လၢပှၤဟီၣ်ခိၣ်ဖိအလိၤလီၤ.+ သူၣ်ဖးဒိၣ် တဖျၢၣ်စုာ်စုာ်န့ၣ် အဃၢအိၣ်ဝဲ တတၤလၣ်လီၤ.* ခီဖျိလၢ တၢ်နးတၢ်ဖှီၣ်လၢသူၣ်တဖၣ်အံၤ+ နးဝဲဒိၣ်မးအဃိ ပှၤဟီၣ်ခိၣ်ဖိတဖၣ်န့ၣ် ကတိၤထီဒါ ကစၢ်ယွၤလီၤ.
တၢ်ဂ့ၢ်အဘျဲၣ်တဖၣ်
^ ကွၢ် တၢ်ဂ့ၢ်ဘၣ်ထွဲလိာ်သး က၅.
^ အခီပညီလိၤလိၤ “အဘီမုၢ်.”
^ အခီပညီလိၤလိၤ မ့ၢ်ဝဲ ‘မကံးဒိၤ အကစၢၢ်.’
^ မ့ၢ်စ့ၢ်ကီး “တၢ်ကတိၤလၢ အတကဆှီဘၣ်တဖၣ်.”
^ ကြံး ၁ တၤလၣ်န့ၣ် အဃၢအိၣ်ဝဲ ၂၀.၄ ကံလိ. ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
