လီၣ်ဖျါ ၁၂:၁-၁၇
၁၂ တၢ်ပနီၣ်ဖးဒိၣ် အိၣ်ဖျါထီၣ်လၢမူခိၣ်လီၤ. ပိာ်မုၣ်အိၣ်ဝဲတဂၤလၢ+ အဆ့ကၤ ကပီၤဝဲဒ်သိးဒီးမုၢ် ဒီးလၢအခီၣ်အဖီလာ်န့ၣ် လါအိၣ်ဝဲလီၤ. ဒီးခိၣ်သလုးလၢ အဘၣ်တၢ်တ့အီၤလၢ ဆၣ် ၁၂ ဖျၢၣ်န့ၣ် အိၣ်ဝဲလၢအခိၣ်လိၤ
၂ ဒီးအဒၢဝဲလီၤ. အဝဲကိးပသူထီၣ်လၢ အဟုးဆါ ဒီးအဘၣ်နးဘၣ်ဖှီၣ်လၢ အကအိၣ်ဖျဲၣ်ထီၣ် အဖိအဃိလီၤ.
၃ ဒီးတၢ်ပနီၣ် အဂၤတမံၤ အိၣ်ဖျါထီၣ်လၢမူခိၣ်လီၤ. ကွၢ်မီၤ, ပယိၤဖးဒိၣ်တဘိလၢ အလွဲၢ်ဂီၤဒ်မ့ၣ်အူအသိး+ အိၣ်ဝဲဒီး အခိၣ်သၣ်ဃံနွံဖျၢၣ် ဒီးအနၢၤအဘိတဆံ ဒီးလၢအခိၣ်သၣ်ဃံ တဖျၢၣ်စုာ်စုာ်အလိၤန့ၣ် အိၣ်ဒီးခိၣ်သလုး တဖျၢၣ်စုာ်စုာ်လီၤ.
၄ ဒီးအခံမဲၢ်တွံၢ်ဝဲ ဆၣ်လၢမူခိၣ်သၢပူတပူ+ ဒီးကွံာ်လီၤဆၣ်တဖၣ်န့ၣ်လၢ ဟီၣ်ခိၣ်ချၢလီၤ.+ ဒီးပယိၤအိၣ်ဆၢထၢၣ်လၢ ပိာ်မုၣ်လၢ+ အဘူးကအိၣ်ဖျဲၣ်ထီၣ် အဖိတဂၤန့ၣ် အမဲာ်ညါ ဒ်သိး အကယူၢ်လီၤကွံာ်ဝဲအဖိ ဖဲအအိၣ်ဖျဲၣ်ထီၣ် အခါလီၤ.
၅ ဒီးပိာ်မုၣ်န့ၣ် အိၣ်ဖျဲၣ်ထီၣ်ဝဲ အဖိခွါတဂၤ+ လၢအကပၢဘၣ် ပှၤကလုာ်ခဲလၢာ်လၢ နီၣ်ထိးဘိထးလီၤ.+ ဒီးအဖိခွါန့ၣ် ဘၣ်တၢ်ဟံးန့ၢ်အီၤ ဒီးက့ၤစိာ်အီၤလၢ ကစၢ်ယွၤ ဒီးအလီၢ်ပစိာ်အအိၣ်လီၤ.
၆ ဒီးပိာ်မုၣ်န့ၣ် လဲၤဃ့ၢ်ဝဲလၢ ပှၢ်မုၢ်ကနၢ ဖဲတၢ်လီၢ်လၢ ကစၢ်ယွၤ ကတဲာ်ကတီၤပာ်န့ၢ်အီၤ အလီၢ်လီၤ. ဒီးအဝဲသ့ၣ် ကဒုးအီၣ်ဒုးအီအီၤဖဲန့ၣ် အသီ ၁,၂၆၀ လီၤ.+
၇ ဒီးတၢ်ဒုးတၢ်ယၤအိၣ်ထီၣ်လၢ မူခိၣ်လီၤ. မံၤက့လး*+ ဒီးအမူခိၣ်ကလူးတဖၣ်န့ၣ် ဒုးတၢ်ဒီးပယိၤလီၤ. ဒီးပယိၤ ဒီးအမူခိၣ်ကလူးတဖၣ်န့ၣ် ဒုးအဝဲသ့ၣ်
၈ ဘၣ်ဆၣ် တမၤနၢၤတၢ်ဘၣ်. ဒီးလၢမူခိၣ်န့ၣ် တၢ်လီၢ်တၢ်ကျဲလၢ အဝဲသ့ၣ်အဂီၢ် တအိၣ်လၢၤဘၣ်.
၉ အဃိ ပယိၤဖးဒိၣ်+ လၢအမ့ၢ် ဂုၢ်လၢအခီၣ်ထံးတဘိ+ လၢအဘၣ်တၢ်ကိးအီၤလၢ မုၣ်ကီၤလံၢ်+ ဒီးစၤတၣ်+ လၢအဆှၢကမၣ် ပှၤဟီၣ်ခိၣ်ဖိခဲလၢာ်န့ၣ် ဘၣ်တၢ်ကွံာ်လီၤအီၤလီၤ.+ အဝဲဘၣ်တၢ်ကွံာ်လီၤအီၤလၢ ဟီၣ်ခိၣ်ချၢ+ ဒီးအမူခိၣ်ကလူးတဖၣ် ဘၣ်တၢ်ကွံာ်လီၤ အဝဲသ့ၣ်ဃုာ်ဒီးအီၤလီၤ.
၁၀ ယနၢ်ဟူ တၢ်ကလုၢ်ဖးဒိၣ်လၢ မူခိၣ်လၢအတဲဝဲလၢ
“ပှၤတဂၤလၢ အပာ်ဒ့ၣ်ပာ်ကမၣ် ပဒီပုၢ်ဝဲၢ်ခွါတဖၣ် ဒီးပာ်ဒ့ၣ်ပာ်ကမၣ် အဝဲသ့ၣ်လၢ ကစၢ်ယွၤအမဲာ်ညါ+ လၢမုၢ်ဆါ ဒီးလၢမုၢ်နၤန့ၣ် ဘၣ်တၢ်ကွံာ်လီၤအီၤလံ. အဃိ ခဲအံၤ ပကစၢ်ယွၤ အတၢ်အုၣ်က့ၤခီၣ်က့ၤ,+ အစိအကမီၤ, အဘီမုၢ်+ ဒီးအခရံာ် အတၢ်န့ၢ်စိန့ၢ်ကမီၤန့ၣ် စးထီၣ်အသးလံ.
၁၁ ဒီးအဝဲသ့ၣ် မၤနၢၤအီၤ+ ခီဖျိလၢ သိဖိအသွံၣ်+ ဒီးတၢ်ကစီၣ်လၢ အဝဲသ့ၣ် စံၣ်တဲၤတဲလီၤဝဲ အဃိလီၤ.+ ဒီးအဝဲသ့ၣ် မ့ၢ်ဘၣ်ကွၢ်ဆၢၣ်မဲာ်ဒီးတၢ်သံ သနာ်က့ ဟ့ၣ်လီၤကွံာ် အသးသမူဘူၣ်ဝဲလီၤ.+
၁၂ အဃိ မူခိၣ် ဒီးသုဝဲလၢ အအိၣ်ဝဲဆိးဝဲလၢအပူၤသ့ၣ်ဧၢ, သးခုတက့ၢ်. မ့မ့ၢ် ဟီၣ်ခိၣ်ဒီးပီၣ်လဲၣ်န့ၣ် ကဘၣ်ကီဘၣ်ခဲ,+ မ့ၢ်လၢ မုၣ်ကီၤလံၢ် ဟဲလီၤလၢသုအိၣ် အဃိလီၤ. ဒီးမ့ၢ်လၢ မုၣ်ကီၤလံၢ် သ့ၣ်ညါဝဲလၢ အတၢ်ဆၢကတီၢ်န့ၣ် အိၣ်တ့ၢ်ဒၣ်ထဲ တစိၢ်ဖိအဃိ+ အသးဒိၣ်ထီၣ်တၢ်ဒိၣ်မးလီၤ.”
၁၃ ဖဲပယိၤ သ့ၣ်ညါလီၤအသးလၢ အဘၣ်တၢ်ကွံာ်လီၤအီၤလၢ ဟီၣ်ခိၣ်ချၢအခါ+ အဝဲမၤအၢမၤနး ပိာ်မုၣ်လၢ+ အအိၣ်ဖျဲၣ်ထီၣ် အဖိခွါတဂၤန့ၣ်လီၤ.
၁၄ ဘၣ်ဆၣ် ပိာ်မုၣ်န့ၣ် ကစၢ်ယွၤဟ့ၣ်လီၤအီၤ လံာ်ကြီကြာ်ဖးဒိၣ်+ အဒံးဆ့ခံဘ့ၣ် ဒ်သိးအကယူၤဝဲဆူအတၢ်လီၢ် လၢပှၢ်မုၢ်ကနၢအပူၤလီၤ. ဒီးဖဲန့ၣ်န့ၣ် အဝဲကဘၣ် တၢ်ဒုးအီၣ်ဒုးအီအီၤလၢ အယံၤဒီးဂုၢ်လၢ+ သၢနံၣ်တဝာ်* အတီၢ်ပူၤလီၤ.+
၁၅ ဒီးဂုၢ်န့ၣ် ပြိထီၣ်ဝဲထံလၢအကိာ်ပူၤ ဒ်ထံကျိအသိး လၢပိာ်မုၣ်အလီၢ်ခံ ဒ်သိးပိာ်မုၣ်န့ၣ် ကလီၤအုးလၢ ထံကျိပူၤအဂီၢ်လီၤ.
၁၆ ဘၣ်ဆၣ် ဟီၣ်ခိၣ်န့ၣ် ဟဲမၤစၢၤဝဲပိာ်မုၣ်လီၤ. ဟီၣ်ခိၣ်န့ၣ် အိးထီၣ်အကိာ်ပူၤ ဒီးယူၢ်လီၤကွံာ်ဝဲ ထံကျိလၢ ပယိၤပြိထီၣ်ဝဲလၢ အကိာ်ပူၤလီၤ.
၁၇ အဃိ ပယိၤသးဒိၣ်ထီၣ်ပိာ်မုၣ် ဒီးလဲၤဝဲဒ်သိးအကဒုး ပိာ်မုၣ်အချံအသၣ်လၢ အအိၣ်တ့ၢ်ဒံးလၢ+ အဒိကနၣ် ကစၢ်ယွၤအတၢ်မၤလိာ်တဖၣ်လီၤ. အဝဲသ့ၣ်မ့ၢ်ပှၤလၢ အအိၣ်ဒီးတၢ်မၤလၢ ကအုၣ်အသးလၢ ယ့ၣ်ၡူးအဂ့ၢ်လီၤ.+
တၢ်ဂ့ၢ်အဘျဲၣ်တဖၣ်
^ အခီပညီမ့ၢ်ဝဲ “မတဂၤလီၤဂာ်ဒီး ကစၢ်ယွၤလဲၣ်.”
^ မ့ၢ်စ့ၢ်ကီး “တကတီၢ် ဒီးခံကတီၢ် ဒီးကတီၢ်တဝာ်.”