လီၣ်ဖျါ ၁:၁-၂၀
၁ အဝဲအံၤမ့ၢ် ယ့ၣ်ၡူးခရံာ် အတၢ်လီၣ်ဖျါလၢ ကစၢ်ယွၤဟ့ၣ်လီၤအီၤ+ ဒ်သိး ကဒုးနဲၣ်အကုၢ်တဖၣ်လၢ+ တယံာ်တမီၢ် တၢ်လၢ အကဘၣ်မၤအသးလီၤ. ဒီးယ့ၣ်ၡူးဆှၢလီၤ အမူခိၣ်ကလူးဆူ အကုၢ်စီၤယိၤဟၣ်အအိၣ်+ ဒ်သိးကပာ်ဖျါထီၣ်န့ၢ်အီၤ တၢ်လၢအကမၤအသးတဖၣ်အံၤ ခီဖျိလၢ တၢ်ပနီၣ်တဖၣ်လီၤ.
၂ ဒီးစီၤယိၤဟၣ် အုၣ်အသး ဘၣ်ဃးဒီး ကစၢ်ယွၤအကလုၢ်ကထါ ဒီးယ့ၣ်ၡူးခရံာ် အတၢ်အုၣ်အသး လၢအမ့ၢ် တၢ်ခဲလၢာ်လၢ စီၤယိၤဟၣ်ထံၣ်ဘၣ်ဝဲ အဂ့ၢ်အကျိၤလီၤ.
၃ တၢ်ဆၢကတီၢ်လၢ အဘၣ်တၢ်ပာ်ပနီၣ်အီၤန့ၣ် ဘူးထီၣ်လံ. အဃိ ပှၤလၢအဖးဝဲ တၢ်ကတိၤတဖၣ်လၢ ဝံအတၢ်စံးပာ်အံၤအပူၤလၢ အကလုၢ်ဖးဒိၣ် ဒီးပှၤလၢအနၢ်ဟူ ဒီးမၤထွဲဝဲ ဝံအတၢ်စံးပာ်အံၤ အတၢ်ကွဲးအသးတဖၣ်န့ၣ်+ ကသးခုဝဲလီၤ.
၄ ယၤ, စီၤယိၤဟၣ် ယကွဲးလံာ်အံၤဆူ တၢ်အိၣ်ဖှိၣ်နွံဖျၢၣ်လၢ+ အအိၣ်လၢ အၤစံကီၢ်ရ့ၣ်အပူၤလီၤ.
မ်သုဒိးန့ၢ်ဘၣ် တၢ်သးကညီၤဒိၣ်ဒိၣ်မုၢ်မုၢ် ဒီးတၢ်ဃူတၢ်ဖိးလၢ “ပှၤလၢအအိၣ်ဝဲ, လၢအအိၣ်ပာ်စၢၤဝဲ, လၢအကဟဲဝဲတဂၤ” အအိၣ်+ ဒီးလၢသးနွံဖျၢၣ်လၢ+ အအိၣ်လၢ အလီၢ်ပစိာ်အမဲာ်ညါန့ၣ် အအိၣ်
၅ ဒီးလၢ ယ့ၣ်ၡူးခရံာ် အအိၣ်တက့ၢ်. ယ့ၣ်ၡူးမ့ၢ် “ပှၤအုၣ်အသးလၢ အသးတီတဂၤ,”+ “ပှၤလၢအဂဲၤဆၢထၢၣ်က့ၤလၢ တၢ်သံ အပှၤဝဲၢ်ကိ”+ ဒီး “ဟီၣ်ခိၣ်အစီၤပၤတဖၣ် အခိၣ်တဂၤ” လီၤ.+
အဝဲအဲၣ်ပှၤဒီး+ မၤထူၣ်ဖျဲးထီၣ်ကွံာ်ပှၤလၢ ပတၢ်ဒဲးဘး ခီဖျိလၢ အနီၢ်ကစၢ်အသွံၣ်လီၤ.+
၆ ဒီးအဝဲဒုးကဲထီၣ်ပှၤလၢ စီၤပၤတဖၣ်+ ဒီးအပၢ်ကစၢ်ယွၤ အပှၤလုၢ်တၢ်ဒိၣ်တဖၣ်လီၤ.*+ မ်တၢ်လၤကပီၤ ဒီးတၢ်ဂံၢ်တၢ်ဘါ အိၣ်ဒီးအီၤ လီၤထူလီၤယိာ်တက့ၢ်. အၤမ့ၣ်.
၇ ကွၢ်မီၤ, အဝဲကဟဲဒီးတၢ်အၢၣ်တဖၣ်+ ဒီးပှၤခဲလၢာ် ကထံၣ်အီၤ ဒီးပှၤလၢအဆဲးအီၤ ကထံၣ်အီၤ စ့ၢ်ကီးလီၤ. ပှၤကလုာ်ဒူၣ်ခဲလၢာ်လၢ အအိၣ်လၢ ဟီၣ်ခိၣ်ချၢန့ၣ် ကဒဲလီၤအသးနါပှၢ် လၢတၢ်သူၣ်အုးသးအုးအပူၤ လၢအဃိလီၤ.+ မ့ၢ်လံ, အၤမ့ၣ်.
၈ ယဟိဝၤယွၤ* တဲဝဲလၢ “ယမ့ၢ် ကဒီးဧ,*+ ယမ့ၢ်ပှၤလၢအအိၣ်ဝဲ, လၢအအိၣ်ပာ်စၢၤဝဲ, လၢအကဟဲဝဲတဂၤ ဒီးသ့တၢ်လၢာ်ကစၢ်လီၤ.”+
၉ ယၤ, စီၤယိၤဟၣ်အံၤ မ့ၢ်ဝဲ သုဒီပုၢ်ဝဲၢ်ခွါလၢ အတူၢ်ဃုာ်တၢ်ဒီးသုလၢ တၢ်နးတၢ်ဖှီၣ်အပူၤ,+ လၢတၢ်တူၢ်န့ၢ်ခီၣ်ကဲအပူၤ+ ဒီးလၢအကန့ၢ်ဃုာ် ဘီမုၢ်ဒီးသု+ ဒ်ယ့ၣ်ၡူးအပျဲၢ်အသိးလီၤ.+ မ့ၢ်လၢယတဲတၢ် ဘၣ်ဃးဒီး ကစၢ်ယွၤအဂ့ၢ် ဒီးအုၣ်ယသးလၢ ယ့ၣ်ၡူးအဂ့ၢ်အဃိ ယအိၣ်ဘၣ်လၢ ကီးတဖျၢၣ်လၢ ပှၤကိးအီၤလၢ ပးမူးလီၤ.
၁၀ ခီဖျိ သးစီဆှံအဃိ တၢ်ဆှၢယၤဆူ ကစၢ်အမုၢ်နံၤအတီၢ်ပူၤ ဒီးယနၢ်ဟူ တၢ်ကလုၢ်ဖးဒိၣ်လၢ ယလီၢ်ခံလၢ အသီၣ်လီၤဂာ် ဒ်ကွဲၤသီၣ်ဝဲအသိး
၁၁ ဒီးတဲဝဲလၢ “တၢ်လၢနထံၣ်အီၤန့ၣ် ကွဲးလီၤအီၤလၢ လံာ်ထူအပူၤ ဒီးဆှၢအီၤဆူ တၢ်အိၣ်ဖှိၣ်နွံဖျၢၣ်လၢ အအိၣ်လၢ ဝ့ၢ်အ့းဖ့းစူး,+ ဝ့ၢ်စမူရနၤ,+ ဝ့ၢ်ပ့ၢ်ကမူး,+ ဝ့ၢ်သူၤအတံရၤ,+ ဝ့ၢ်စၢ်ဒံ,+ ဝ့ၢ်ဖံၤလဒ့းလဖံ+ ဒီးဝ့ၢ်လီၤဒံၤကံ န့ၣ်တက့ၢ်.”+
၁၂ ဒီးဒ်သိးယကထံၣ်လၢ မ့ၢ်မတဂၤ တဲတၢ်ဒီးယၤလဲၣ်အဂီၢ် ယဃၣ်ဃီၤယသးလီၤ. ဒီးဖဲယဃၣ်ဃီၤယသးအခါ ယထံၣ်ဘၣ် မ့ၣ်အူဒၢထူနွံဖျၢၣ်လီၤ.+
၁၃ ဒီးလၢမ့ၣ်အူဒၢတဖၣ်အကျါန့ၣ် ပှၤအိၣ်ဝဲတဂၤ လၢအလီၤဂာ်ဒီး ပှၤကညီဖိခွါလီၤ.+ အဝဲကၤဝဲဆ့ဖးထီတဘ့ၣ်လၢ အတုၤလီၤလၢ အခီၣ်လၣ် ဒီးစၢထီၣ်ဝဲ ယီၢ်တကိးထူလၢ အသးနါပှၢ်လီၤ.
၁၄ တကးဒံးဘၣ် အခိၣ်ဆူၣ်န့ၣ် ဝါဝဲဒ်သိအဆူၣ် လၢအဝါ ဒီးဝါဝဲဒ် မူခိၣ်ဖီအသိးလီၤ. ဒီးအမဲာ်ချံန့ၣ်လီၤဂာ်ဒ် မ့ၣ်အူလၣ်အသိးလီၤ.+
၁၅ ဒီးအခီၣ်လၣ်န့ၣ် လီၤဂာ်ဒ် တိၢ်ဘီလၢအဂ့ၤလၢ+ အကပီၤထီၣ်ဝဲ ဖဲအဘၣ်တၢ်ပှံၢ်အီၤဒီး မ့ၣ်အူအခါ ဒီးအကလုၢ်န့ၣ် လီၤဂာ်ဒ် ထံအါအါဂီၢ်ဂီၢ် သီၣ်ဝဲအသိးလီၤ.
၁၆ ဒီးဆၣ်နွံဖျၢၣ် အိၣ်လၢအစုထွဲအပူၤ+ ဒီးနးဖးထီတဘ့ၣ်လၢ အကနၣ်အိၣ်ဝဲခံကပၤ+ ဒီးအကနၣ်အ့ၣ်ဂ့ၤဂ့ၤန့ၣ် ဟဲဖျိးထီၣ်လၢ အကိာ်ပူၤလီၤ. ဒီးအမဲာ်သၣ်န့ၣ် မၤအသးဒ်မုၢ် ဖဲအကပီၤထီၣ် အဆူၣ်ကတၢၢ် အခါလီၤ.+
၁၇ ဖဲယထံၣ်ဘၣ်အီၤအခါ ယလီၤဃံၢ် လၢအခီၣ်ထံး ဒ်ပှၤသံတဂၤအသိးလီၤ.
ဒီးအဝဲပာ်လီၤ အစုထွဲလၢယလိၤ ဒီးတဲဝဲလၢ “ပျံၤတၢ်တဂ့ၤ. ယမ့ၢ်တၢ်အဆိကတၢၢ်+ ဒီးတၢ်အလီၢ်ခံကတၢၢ်+
၁၈ ဒီးပှၤလၢ အမူဝဲတဂၤလီၤ.+ ယသံတ့ၢ်+ ဘၣ်ဆၣ် ကွၢ်မီၤ, ခဲအံၤယမူလံ ဒီးယကမူ လီၤထူလီၤယိာ်လီၤ.+ ဒီးယအိၣ်ဒီး တၢ်သံဒီးတၢ်သွၣ်ခိၣ်* အသီးခွဲးတဖၣ်လီၤ.+
၁၉ အဃိ ကွဲးလီၤတၢ်လၢ နထံၣ်တ့ၢ်အီၤတဖၣ် ဒီးတၢ်လၢအအိၣ်ဝဲတဖၣ် ဒီးတၢ်လၢအကမၤအသး လၢခံတဖၣ်န့ၣ်တက့ၢ်.
၂၀ မ့မ့ၢ် ဆၣ်နွံဖျၢၣ်လၢ နထံၣ်လၢ ယစုထွဲအပူၤ ဒီးမ့ၣ်အူဒၢထူနွံဖျၢၣ်န့ၣ် မ့ၢ်ဝဲ တၢ်ခူသူၣ်စီဆှံလီၤ. ဆၣ်နွံဖျၢၣ်န့ၣ် အခီပညီမ့ၢ်ဝဲ တၢ်အိၣ်ဖှိၣ်နွံဖျၢၣ်န့ၣ် အကလူးတဖၣ် ဒီးမ့ၣ်အူဒၢနွံဖျၢၣ်န့ၣ် အခီပညီမ့ၢ်ဝဲ တၢ်အိၣ်ဖှိၣ်နွံဖျၢၣ်လီၤ.+
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “ဘီမုၢ်, ပှၤလုၢ်တၢ်ဒိၣ်တဖၣ်.”
^ ကွၢ် တၢ်ဂ့ၢ်ဘၣ်ထွဲလိာ်သး က၅.
^ အခီပညီလိၤလိၤ “အဲလ်ဖၤ ဒီးအိမဲၤကၤ.” တၢ်ကတိၤခံဖျၢၣ်အံၤ လၢအမ့ၢ် “အဲလ်ဖၤ” ဒီး “အိမဲၤကၤ” န့ၣ်မ့ၢ်ဝဲ ကြံးအလံာ်ခီၣ်ထံး အလံာ်မဲာ်ဖျၢၣ် အဆိကတၢၢ်တဖျၢၣ် ဒီးအလီၢ်ခံကတၢၢ်တဖျၢၣ်.
^ လၢကြံးကျိာ် မ့ၢ်ဝဲ ဟ့ဒံ(စ်). ကွၢ် တၢ်ကတိၤအခီပညီ.