ယိၤဟၣ် ၃:၁-၃၆
၃ ပှၤဖၤရံၤၡဲတဂၤ လၢအမံၤမ့ၢ် စီၤနံၤကဒ့မူးန့ၣ်+ မ့ၢ်ဝဲပှၤယူဒၤဖိအခိၣ် တဂၤလီၤ.
၂ အဝဲလဲၤလၢ ယ့ၣ်ၡူးအအိၣ် လၢမုၢ်နၤခီ+ ဒီးတဲအီၤလၢ “သရၣ်ဧၢ,+ ပှၤလၢ ကစၢ်ယွၤ တအိၣ်ဒီးအီၤဘၣ်န့ၣ် မၤတၢ်ပနီၣ်လီၤလး လၢနမၤသ့ၣ်တဖၣ်အံၤ တသ့နီတဂၤဘၣ်.+ အဃိ ပသ့ၣ်ညါလၢ နမ့ၢ်သရၣ်လၢ ကစၢ်ယွၤဆှၢလီၤဝဲလီၤ.”+
၃ ယ့ၣ်ၡူး တဲဆၢက့ၤအီၤလၢ “ယကတဲဘၣ်နၤ တီတီလၢ ပှၤမ့ၢ်တအိၣ်ဖျဲၣ်ထီၣ်ကဒီး လၢအသီတဘျီဘၣ်န့ၣ်+ အလဲၤနုာ်လီၤလၢ ကစၢ်ယွၤ အဘီမုၢ်အပူၤတသ့ဘၣ်.”+
၄ စီၤနံၤကဒ့မူး တဲအီၤလၢ “ပှၤလၢ အသးပှၢ်တဂၤ အိၣ်ဖျဲၣ်ထီၣ်ကဒီး ကသ့ဒ်လဲၣ်. အဝဲက့ၤနုာ်လီၤလၢ အမိၢ်ဒၢလီၢ်အပူၤ ခံဘျီတဘျီ ဒီးအိၣ်ဖျဲၣ်ထီၣ်ကဒီး ကသ့ဧါ.”
၅ ယ့ၣ်ၡူး တဲဆၢဝဲလၢ “ယကတဲဘၣ်နၤ တီတီလၢ ပှၤမ့ၢ် တအိၣ်ဖျဲၣ်ထီၣ်လၢ ထံဒီး+ သးစီဆှံဘၣ်န့ၣ်+ အဝဲနုာ်လီၤလၢ ကစၢ်ယွၤ အဘီမုၢ်အပူၤ တသ့ဘၣ်.
၆ တၢ်လၢ ပှၤဟီၣ်ခိၣ်ဖိ အိၣ်ဖျဲၣ်ထီၣ်ဝဲန့ၣ် မ့ၢ်ဒၣ် ပှၤဟီၣ်ခိၣ်ဖိလီၤ. ဒီးပှၤလၢ အအိၣ်ဖျဲၣ်ထီၣ်လၢ သးစီဆှံန့ၣ် မ့ၢ်ယွၤအဖိတဖၣ်လီၤ.
၇ တဘၣ်ကမၢကမၣ်လၢ ယတဲလၢ သုကဘၣ် အိၣ်ဖျဲၣ်ထီၣ်ကဒီး လၢအသီတဘျီအဃိတဂ့ၤ.
၈ ကလံၤန့ၣ် အူဝဲဖဲတၢ်လီၢ်လၢ အအဲၣ်ဒိးအူဝဲလီၤ. ဒီးနနၢ်ဟူ အသီၣ် ဘၣ်ဆၣ် အဟဲဖဲလဲၣ်ဒီး ကလဲၤဖဲလဲၣ်န့ၣ် နတသ့ၣ်ညါဘၣ်. ပှၤကိးဂၤဒဲးလၢ အအိၣ်ဖျဲၣ်ထီၣ်လၢ သးစီဆှံန့ၣ် ကမၤအသးဒ်န့ၣ်လီၤ.”+
၉ စီၤနံၤကဒ့မူး တဲဆၢက့ၤအီၤလၢ “တၢ်သ့ၣ်တဖၣ်အံၤ ကဲထီၣ်အသး ကသ့ဒ်လဲၣ်.”
၁၀ ယ့ၣ်ၡူး တဲဆၢက့ၤဝဲလၢ “နမ့ၢ် ပှၤအံၣ်စရ့လးဖိအသရၣ် ဘၣ်ဆၣ် နတသ့ၣ်ညါ တၢ်ဂ့ၢ်သ့ၣ်တဖၣ်အံၤဧီၤ.”
၁၁ ယကတဲနၤတီတီလၢ တၢ်လၢပသ့ၣ်ညါန့ၣ် ပတဲအီၤ ဒီးတၢ်လၢ ပထံၣ်န့ၣ် ပအုၣ်ပသးလီၤ. ဘၣ်ဆၣ် သုဝဲသ့ၣ်အံၤ သုတတူၢ်လိာ် ပတၢ်အုၣ်သးဘၣ်.
၁၂ ယမ့ၢ်တဲသု တၢ်လၢအဘၣ်ဃးဒီး ဟီၣ်ခိၣ်သနာ်က့ သုတနာ်ဘၣ်. အဃိ ယမ့ၢ်တဲသု တၢ်လၢ အဘၣ်ဃးဒီးမူခိၣ်န့ၣ် သုကနာ်အီၤဒ်လဲၣ်.
၁၃ ပှၤတလဲၤထီၣ်လၢ မူခိၣ်နီတဂၤဒံးဘၣ်.+ ဒီးပှၤလၢအဟဲလီၤလၢမူခိၣ်န့ၣ်+ အိၣ်ဝဲထဲတဂၤ လၢအမ့ၢ် ပှၤကညီဖိခွါလီၤ.
၁၄ ဒီးဒ်စီၤမိၤၡ့ ဘျးထီၣ်ဝဲဂုၢ်လၢ ပှၢ်မုၢ်ကနၢအသိးန့ၣ်+ ပှၤကညီဖိခွါအံၤ ကဘၣ် တၢ်ဘျးထီၣ်အီၤ+
၁၅ ဒ်သိး ပှၤကိးဂၤဒဲးလၢ အစူၢ်က့ၤနာ်က့ၤအီၤန့ၣ် ကဒိးန့ၢ်ဘၣ် တၢ်မူအထူအယိာ်လီၤ.+
၁၆ “ကစၢ်ယွၤအဲၣ် ပှၤဟီၣ်ခိၣ်ဖိ* ဒိၣ်မးတုၤလၢ အဟ့ၣ်လီၤကွံာ်ဝဲ အဖိခွါနီၢ်နီၢ် ထဲတဂၤဧိၤ+ ဒ်သိး ပှၤလၢ အစူၢ်က့ၤနာ်က့ၤအီၤန့ၣ် အသုတတုၤလၢ တၢ်ဟးဂီၤတဂ့ၤ ဒီးကန့ၢ်ဘၣ် တၢ်မူအထူအယိာ် ကိးဂၤဒဲးအဂီၢ်လီၤ.+
၁၇ ကစၢ်ယွၤ တဆှၢလီၤအဖိခွါ လၢဟီၣ်ခိၣ် ဒ်သိးကစံၣ်ညီၣ် ပှၤဟီၣ်ခိၣ်ဖိ အဂီၢ်ဘၣ်. မ့ၢ်ဒ်သိး ပှၤဟီၣ်ခိၣ်ဖိ ကန့ၢ်တၢ်အုၣ်က့ၤခီၣ်က့ၤ ခီဖျိလၢအီၤ အဂီၢ်လီၤ.+
၁၈ ပှၤလၢ အစူၢ်က့ၤနာ်က့ၤအီၤန့ၣ် တဘၣ်တၢ်စံၣ်ညီၣ်ဘၣ်.+ မ့မ့ၢ် ပှၤလၢ အတစူၢ်က့ၤနာ်က့ၤတၢ်ဘၣ်န့ၣ် ဘၣ်တၢ်စံၣ်ညီၣ်အီၤလံ, မ့ၢ်လၢ အဝဲ တစူၢ်က့ၤနာ်က့ၤဝဲ ကစၢ်ယွၤ အဖိခွါနီၢ်နီၢ်ထဲတဂၤဧိၤ* ဘၣ်အဃိလီၤ.+
၁၉ တၢ်ကပီၤ ဟဲလီၤလၢဟီၣ်ခိၣ်+ ဘၣ်ဆၣ် လၢပှၤဟီၣ်ခိၣ်ဖိ ကအဲၣ်တၢ်ကပီၤအလီၢ်န့ၣ် အဲၣ်ဝဲတၢ်ခံး ခီဖျိလၢ အဝဲသ့ၣ် မၤဝဲ တၢ်အၢတၢ်သီအဃိလီၤ. လၢတၢ်န့ၣ်အဃိ အဝဲသ့ၣ် ကဘၣ်တၢ်စံၣ်ညီၣ်လီၤ.
၂၀ ပှၤလၢအမၤ တၢ်အၢတၢ်သီ တလီၢ်လီၢ်န့ၣ် သးဟ့တၢ်ကပီၤ ဒီးဒ်သိး အတၢ်မၤသုတအိၣ်ဖျါထီၣ်တဂ့ၤအဂီၢ် အတဟဲလၢ တၢ်ကပီၤအအိၣ်ဘၣ်.
၂၁ ဘၣ်ဆၣ် ပှၤလၢအမၤ တၢ်တီတၢ်လိၤန့ၣ် ဟဲဝဲလၢ တၢ်ကပီၤအအိၣ်+ ဒ်သိး တၢ်ကပာ်ဖျါထီၣ်လၢ အတၢ်မၤန့ၣ် မ့ၢ်တၢ်လၢအဘၣ် ကစၢ်ယွၤအသးအဂီၢ်လီၤ.”
၂၂ ဖဲန့ၣ်ဝံၤအလီၢ်ခံ ယ့ၣ်ၡူးဒီး အပျဲၢ်အဘီၣ်တဖၣ် လဲၤဝဲလၢ သဝီတဖၣ်လၢအအိၣ်လၢ ယူဒၤအဟီၣ်ကဝီၤလီၤ. ယ့ၣ်ၡူးအိၣ်ဒီး အဝဲသ့ၣ်တတီၤဖိ ဒီးဒိးဘျၢတၢ်လီၤ.*+
၂၃ ဘၣ်ဆၣ် စီၤယိၤဟၣ်စ့ၢ်ကီး ဒိးဘျၢတၢ်ဖဲ အဲၤနိၣ်လၢ အဘူးဒီးၡလ့ၣ်တၢ်လီၢ် မ့ၢ်လၢထံအိၣ်ဝဲဖဲန့ၣ် အါမးအဃိလီၤ.+ ဒီးပှၤဟဲဒိးဘျၢအသး လၢအအိၣ်လီၤ.+
၂၄ ဖဲန့ၣ်အဆၢကတီၢ် ပှၤတဖၢနုာ် စီၤယိၤဟၣ်လၢ ဃိာ်ပူၤဒံးဘၣ်.+
၂၅ ဒီးစီၤယိၤဟၣ်အပျဲၢ်အဘီၣ်တဖၣ် တဲအါလိာ်သးဒီး ပှၤယူဒၤဖိတဂၤ ဘၣ်ဃး တၢ်မၤကဆှီထီၣ်က့ၤအဂ့ၢ်လီၤ.
၂၆ အဃိ အဝဲသ့ၣ်လဲၤလၢ စီၤယိၤဟၣ်အအိၣ် ဒီးတဲအီၤလၢ “သရၣ်ဧၢ, ပှၤလၢ အအိၣ်ဒီးနၤလၢ ထံကျိယၢ်ဒ့ၣ် အဝၢ်ဘးခီ လၢနအုၣ်နသးလၢအဂ့ၢ်တဂၤန့ၣ်+ အဝဲဒိးဘျၢတၢ် ဒီးပှၤခဲလၢာ် လဲၤလၢအအိၣ်လီၤ.”
၂၇ စီၤယိၤဟၣ် တဲဆၢက့ၤဝဲလၢ “ကစၢ်ယွၤ မ့ၢ်တဟ့ၣ်လီၤပှၤတၢ်ဘၣ်န့ၣ် ပှၤတဂၤဂ့ၤ တဂၤဂ့ၤ ဒိးန့ၢ်ဘၣ်တၢ် တသ့နီတမံၤဘၣ်.
၂၈ ဖဲယတဲလၢ ‘ယတမ့ၢ်ခရံာ်ဘၣ်,+ ဘၣ်ဆၣ် တၢ်ဆှၢလီၤယၤလၢ ပှၤတဂၤန့ၣ် အမဲာ်ညါ’+ အခါ သုနီၢ်ကစၢ်ဒၣ်သုဝဲ မ့ၢ်ပှၤအုၣ်အသးလီၤ.
၂၉ ပှၤလၢအန့ၢ်ဘၣ် တလးမူးပိာ်မုၣ်န့ၣ် မ့ၢ်ဝဲတလးမူးပိာ်ခွါလီၤ.+ ဘၣ်ဆၣ် တလးမူးပိာ်ခွါ အသကိးန့ၣ် ဖဲအဂဲၤဆၢထၢၣ် ဒီးနၢ်ဟူတလးမူးပိာ်ခွါ အကလုၢ်အခါ အသးခုဝဲဒိၣ်မးလီၤ. အဃိ ယတၢ်သးခုန့ၣ် လၢထီၣ်ပှဲၤထီၣ်လံ.
၃၀ အဝဲကဘၣ် အါထီၣ်ရုၢ်ရုၢ် ဘၣ်ဆၣ် မ့မ့ၢ် ယၤန့ၣ် ကဘၣ် စှၤလီၤရုၢ်ရုၢ်လီၤ.”
၃၁ ပှၤလၢ အအိၣ်ဟဲလၢထးခီန့ၣ်+ အိၣ်လၢပှၤကိးဂၤဒဲး အဖီခိၣ်လီၤ. မ့မ့ၢ် ပှၤလၢ အအိၣ်ဟဲလၢဟီၣ်ခိၣ်န့ၣ် မ့ၢ်အဟဲလၢဟီၣ်ခိၣ် ဒီးတဲတၢ် ဘၣ်ဃးဒီးဟီၣ်ခိၣ်လီၤ. ပှၤလၢ အအိၣ်ဟဲလၢမူခိၣ်န့ၣ် အိၣ်လၢ ပှၤကိးဂၤဒဲး အဖီခိၣ်လီၤ.+
၃၂ အဝဲအုၣ်အသးဘၣ်ဃးဒီး တၢ်လၢအထံၣ်ဘၣ်ဝဲ ဒီးနၢ်ဟူဘၣ်ဝဲ+ ဘၣ်ဆၣ် ပှၤတတူၢ်လိာ် အတၢ်အုၣ်အသး နီတဂၤဘၣ်.+
၃၃ မ့မ့ၢ် ပှၤလၢအတူၢ်လိာ် အတၢ်အုၣ်အသးန့ၣ် နာ်ဝဲသပှၢ်တၢၢ်လၢ* ယွၤန့ၣ်အကလုၢ်တီဝဲလီၤ.+
၃၄ ပှၤလၢ ယွၤမၢလီၤဝဲတဂၤန့ၣ် တဲယွၤအကလုၢ်ကထါ+ မ့ၢ်လၢယွၤဟ့ၣ်လီၤအီၤ သးစီဆှံလၢလၢပှဲၤပှဲၤ အဃိလီၤ.
၃၅ ပၢ်န့ၣ်အဲၣ်ဖိခွါ+ ဒီးဟ့ၣ်လီၤဝဲ တၢ်ခဲလၢာ်လၢ အစုပူၤလီၤ.+
၃၆ ပှၤလၢ အစူၢ်က့ၤနာ်က့ၤဖိခွါန့ၣ် ကန့ၢ်ဘၣ် တၢ်မူအထူအယိာ်လီၤ.+ မ့မ့ၢ် ပှၤလၢအတဒိကနၣ် ဖိခွါအကလုၢ်ဘၣ်န့ၣ် တန့ၢ်ဘၣ် တၢ်မူဘၣ်+ ဒီးကစၢ်ယွၤ အတၢ်သးဒိၣ်ထီၣ် ကဆဲးအိၣ်လၢအလိၤလီၤ.+
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “ဟီၣ်ခိၣ်.”
^ အခီပညီလိၤလိၤ “အမံၤ.”
^ ဖျါလၢ ယ့ၣ်ၡူးတီခိၣ်ရိၤမဲတၢ်လၢ ပှၤကဒိးဘျၢပှၤဂၤလၢထံအဂီၢ်. ထိၣ်သတြီၤဒီး ယိၤဟၣ် ၄:၂.
^ မ့ၢ်စ့ၢ်ကီး “ပာ်ဂၢၢ်ပာ်ကျၢၤဝဲလၢ.”
