ယိၤဟၣ် ၂၀:၁-၃၁
၂၀ ဖဲမုၢ်ခီၣ်ထံးအနံၤဂီၤဂီၤ ဖဲတၢ်ခံးဒံး အဆၢကတီၢ်န့ၣ် နီၢ်မၤရံမၤကဒၤလ့ၣ် လဲၤလၢတၢ်သွၣ်ခိၣ်ဒီး+ ထံၣ်ဝဲလၢ လၢၢ်လၢအအိၣ်လၢ တၢ်သွၣ်ခိၣ် အခိၣ်ထိးန့ၣ် သုးကွံာ်အသးလံ.+
၂ အဃိ အဝဲလဲၤဃ့ၢ်လၢ စီၤၡံမိၣ်ပ့းတရူး ဒီးယ့ၣ်ၡူးအပျဲၢ်အဘီၣ်လၢ အဂၤတဂၤလၢ အအဲၣ်ဝဲအအိၣ်+ ဒီးတဲအဝဲသ့ၣ်လၢ “ပှၤက့ၤစိာ်ထီၣ်ကွံာ် ကစၢ်လၢ တၢ်သွၣ်ခိၣ်အပူၤလံ+ ဒီးအဝဲသ့ၣ် လဲၤပာ်ဝဲဖဲလဲၣ်န့ၣ် ပတသ့ၣ်ညါဘၣ်.”
၃ စီၤပ့းတရူး ဒီးယ့ၣ်ၡူးအပျဲၢ်အဘီၣ် အဂၤတဂၤ လဲၤဝဲလၢ တၢ်သွၣ်ခိၣ်လီၤ.
၄ အဝဲသ့ၣ် ခံဂၤန့ၣ် စးထီၣ်ဃ့ၢ်ဝဲ တပူၤဃီဘၣ်ဆၣ် အပျဲၢ်အဘီၣ် အဝဲတဂၤန့ၣ် ဃ့ၢ်ဝဲချ့န့ၢ်ဒံး စီၤပ့းတရူးအဃိ အလဲၤတုၤဆိလၢ တၢ်သွၣ်ခိၣ်လီၤ.
၅ အဝဲသကူးလီၤအသး ဒီးကွၢ်လီၤဝဲလၢ တၢ်သွၣ်ခိၣ်အကိပူၤ ဒီးထံၣ်တၢ်ကံးညာ်တဖၣ် အိၣ်ဝဲဖဲန့ၣ်+ ဘၣ်ဆၣ် အဝဲတလဲၤနုာ်လီၤဝဲဘၣ်.
၆ ဒီးစီၤၡံမိၣ်ပ့းတရူးစ့ၢ်ကီး ဟဲတုၤဝဲ ဒီးလဲၤနုာ်လီၤဝဲလၢ တၢ်သွၣ်ခိၣ်အပူၤလီၤ. အဝဲထံၣ်ဝဲ တၢ်ကံးညာ်တဖၣ် အိၣ်ဝဲဖဲန့ၣ်လီၤ.
၇ ဒီးတၢ်ကံးညာ်လၢ ပှၤဖၢၣ်ဃာ် ယ့ၣ်ၡူးအခိၣ်န့ၣ် အိၣ်ထူထီၣ်အသးလီၤလီၤဆီဆီ ဒီးအတအိၣ်တပူၤဃီဒီး တၢ်ကံးညာ် အဂၤတဖၣ်ဘၣ်.
၈ ဒီးအပျဲၢ်အဘီၣ်လၢ အလဲၤတုၤဆိလၢ တၢ်သွၣ်ခိၣ်တဂၤန့ၣ် လဲၤနုာ်လီၤဝဲစ့ၢ်ကီး ဒီးထံၣ်ဝဲဒီးနာ်ဝဲလီၤ.
၉ နီၢ်ကီၢ်န့ၣ် တၢ်ကွဲးအသးလၢ အတဲဝဲလၢ ယ့ၣ်ၡူးကဘၣ်ဂဲၤဆၢထၢၣ်လၢ တၢ်သံန့ၣ် အဝဲသ့ၣ် တနၢ်ပၢၢ်ဝဲဒံးဘၣ်.+
၁၀ ဒီးအပျဲၢ်အဘီၣ်ခံဂၤအံၤ က့ၤဝဲလၢ အဝဲသ့ၣ်အဟံၣ်လီၤ.
၁၁ မ့မ့ၢ်နီၢ်မၤရံန့ၣ် ဆၢထၢၣ်ဝဲလၢ တၢ်သွၣ်ခိၣ်အချၢ ဒီးဟီၣ်ဝဲလီၤ. ဖဲအဟီၣ်ဝဲအခါ အသကူးလီၤအသးဒီး ကွၢ်လီၤဝဲလၢ တၢ်သွၣ်ခိၣ်အကိပူၤ
၁၂ ဒီးအထံၣ်ဝဲ မူခိၣ်ကလူးခံဂၤ+ ကူသိးဝဲ တၢ်ကူတၢ်သိးလၢ အလွဲၢ်ဝါ ဒီးဆ့ၣ်နီၤ ဖဲပှၤပာ်လီၤတ့ၢ် ယ့ၣ်ၡူးအစိၣ်အလီၢ် လၢအခိၣ်အလီၢ်တဂၤ ဒီးလၢအခီၣ်အလီၢ် တဂၤလီၤ.
၁၃ အဝဲသ့ၣ်တဲအီၤလၢ “ပိာ်မုၣ်ဧၢ, ဘၣ်မနုၤအဃိ နဟီၣ်လဲၣ်.” နီၢ်မၤရံ တဲအဝဲသ့ၣ်လၢ “ပှၤက့ၤစိာ်ကွံာ် ယကစၢ် ဒီးလဲၤပာ်ဝဲဖဲလဲၣ်န့ၣ် ယတသ့ၣ်ညါဘၣ်.”
၁၄ အဝဲတဲဝဲ ဒ်န့ၣ်ဝံၤဒီး အဃၣ်ဃီၤအသးဒီး ထံၣ်ဝဲယ့ၣ်ၡူး ဆၢထၢၣ်ဖဲန့ၣ် ဘၣ်ဆၣ် အဝဲတသ့ၣ်ညါဝဲလၢ အမ့ၢ်ယ့ၣ်ၡူးဘၣ်.+
၁၅ ယ့ၣ်ၡူး တဲအီၤလၢ “ပိာ်မုၣ်ဧၢ, နဟီၣ်ဘၣ်လဲၣ်. နဃုမတဂၤလဲၣ်.” နီၢ်မၤရံဆိကမိၣ်ဝဲလၢ အမ့ၢ်ပှၤခိးတၤသၣ်အလီၢ်အဃိ အဝဲတဲအီၤလၢ “ကစၢ်ဧၢ, နမ့ၢ်စိာ်ထီၣ်ကွံာ်အီၤန့ၣ် တဲဘၣ်ယၤလၢ နလဲၤပာ်လီၤအီၤဖဲလဲၣ် ဒီးယကလဲၤ ဟံးန့ၢ်က့ၤအီၤ.”
၁၆ ယ့ၣ်ၡူးတဲအီၤလၢ “နီၢ်မၤရံဧၢ” ဒီးနီၢ်မၤရံ ဃၣ်ဃီၤအသး ဒီးတဲအီၤလၢ ဧ့ၤဘြံၤကျိာ်လၢ “ရၤဘူနံၤ” (အခီပညီမ့ၢ်ဝဲ “သရၣ်”) လီၤ.
၁၇ ယ့ၣ်ၡူးတဲအီၤလၢ “ယတက့ၤထီၣ်ဘၣ်လၢ ယပၢ်အအိၣ်ဒံးဘၣ် အဃိ ဖီၣ်တံၢ်ဃာ်ယၤတဂ့ၤ. နဘၣ်လဲၤလၢ ယဒီပုၢ်ဝဲၢ်ခွါတဖၣ်အအိၣ်+ ဒီးတဲဘၣ် အဝဲသ့ၣ်လၢ ယကက့ၤထီၣ်လၢ ယပၢ်+ လၢအမ့ၢ် သုပၢ်အအိၣ် ဒီးလၢယကစၢ်ယွၤ+ လၢအမ့ၢ် သုကစၢ်ယွၤ အအိၣ်လီၤ.”
၁၈ နီၢ်မၤရံမၤကဒၤလ့ၣ် က့ၤတဲဘၣ် တၢ်ကစီၣ်လၢ ယ့ၣ်ၡူးအပျဲၢ်အဘီၣ်တဖၣ် အအိၣ်လၢ “ယထံၣ်ဘၣ် ကစၢ်လံ.” ဒီးအတဲဘၣ် အဝဲသ့ၣ် တၢ်လၢ ယ့ၣ်ၡူးတဲအီၤတဖၣ်လီၤ.+
၁၉ တၢ်တနံၤန့ၣ် မ့ၢ်ဝဲ မုၢ်ခီၣ်ထံးအနံၤ ဒီးယ့ၣ်ၡူးအပျဲၢ်အဘီၣ်တဖၣ် အိၣ်ဖှိၣ်ဝဲဖဲမုၢ်ဟါလီၤ ဒီးမ့ၢ်လၢအဝဲသ့ၣ် ပျံၤပှၤယူဒၤဖိ* အဃိ အဝဲသ့ၣ် ကးပံးဃာ်တြဲၤတဖၣ်လီၤ. ဒီးယ့ၣ်ၡူး ဟဲဆၢထၢၣ် လၢအဝဲသ့ၣ်အကျါ ဒီးတဲဘၣ်အဝဲသ့ၣ်လၢ “မ်တၢ်ဃူတၢ်ဖိး အိၣ်ဒီးသုတက့ၢ်.”+
၂၀ အဝဲတဲဝဲ ဒ်န့ၣ်ဝံၤ အဝဲဒုးနဲၣ် အဝဲသ့ၣ်လၢ အစုဒီးအကပၤလီၤ.+ ဒီးအပျဲၢ်အဘီၣ်တဖၣ်အံၤ ထံၣ်ဘၣ်ကစၢ်အဃိ အဝဲသ့ၣ်သးခုဝဲလီၤ.+
၂၁ ယ့ၣ်ၡူး တဲဘၣ်ကဒီး အဝဲသ့ၣ်လၢ “မ်တၢ်ဃူတၢ်ဖိး အိၣ်ဒီးသုတက့ၢ်.+ ဒ်ပၢ်ဆှၢလီၤယၤအသိး+ ယၤစ့ၢ်ကီး ယဆှၢလီၤသုလီၤ.”+
၂၂ ယ့ၣ်ၡူး တဲဝဲဒ်န့ၣ်ဝံၤ ယ့ၣ်ၡူးအူအဝဲသ့ၣ်ဒီးကလံၤ ဒီးတဲအဝဲသ့ၣ်လၢ “ဒိးန့ၢ်ဘၣ် သးစီဆှံတက့ၢ်.+
၂၃ သုမ့ၢ်ပျၢ်ကွံာ်ပှၤတဂၤဂၤ အတၢ်ကမၣ်န့ၣ် အခီပညီမ့ၢ်ဝဲ ကစၢ်ယွၤ ပျၢ်ပာ်စၢၤ အတၢ်ကမၣ်လံ. ဒီးသုမ့ၢ်တပျၢ်ကွံာ် ပှၤတဂၤဂၤ အတၢ်ကမၣ်ဘၣ်န့ၣ် အခီပညီမ့ၢ်ဝဲလၢ ကစၢ်ယွၤတပျၢ် အတၢ်ကမၣ်ဘၣ်.”
၂၄ ဖဲယ့ၣ်ၡူး ဟဲဝဲအခါ စီၤသိၤမါ+ လၢပှၤကိးအီၤလၢ ပှၤသဃံာ်ဒီး လၢအမ့ၢ် ပှၤတဆံခံဂၤအကျါတဂၤန့ၣ် တအိၣ်လၢ အဝဲသ့ၣ်အကျါဘၣ်.
၂၅ အဃိ အပျဲၢ်အဘီၣ် အဂၤတဖၣ် တဲဘၣ်အီၤလၢ “ပထံၣ်ဘၣ်ကစၢ်လံ.” ဘၣ်ဆၣ် စီၤသိၤမါတဲဘၣ် အဝဲသ့ၣ်လၢ “ယမ့ၢ်တထံၣ်ဘၣ် ထးဆဲးဖျိ အစုအလီၢ် ဒီးယမ့ၢ်တဘုးဘၣ် အကပၤလၢယစု ဒီးပလၢၢ်ဘၣ် ထးဆဲးဖျိအလီၢ်လၢ+ ယစုနၢဘၣ်န့ၣ် လ့ၤတက့ၤ ယတနာ်ဘၣ်.”
၂၆ ဃိးသီဝံၤအလီၢ်ခံ အပျဲၢ်အဘီၣ်တဖၣ် အိၣ်ကဒီးလၢဟံၣ်ပူၤဒီး စီၤသိၤမါ အိၣ်ဒီးအဝဲသ့ၣ်လီၤ. ဒီးတြဲၤတဖၣ် ကးပံးဃာ်အသး သနာ်က့ ယ့ၣ်ၡူးဟဲဆၢထၢၣ်လၢ အဝဲသ့ၣ်အခၢၣ်သး ဒီးတဲဝဲလၢ “မ်တၢ်ဃူတၢ်ဖိး အိၣ်ဒီးသုတက့ၢ်.”+
၂၇ ဒီးအဝဲတဲဘၣ် စီၤသိၤမါလၢ “ထိးကွၢ်ဒီး နစုနၢဖဲအံၤ ဒီးကွၢ်ယစု ဒီးယူာ်ဃီၤနစုဒီး ဟဲဘုးကွၢ် ယကပၤတက့ၢ်. တဘၣ်သးဒ့ဒီလၢၤတဂ့ၤ, နာ်တၢ်တက့ၢ်.”
၂၈ စီၤသိၤမါ တဲဆၢအီၤလၢ “ယကစၢ် ဒီးယယွၤလီၤ.”
၂၉ ယ့ၣ်ၡူးတဲအီၤလၢ “မ့ၢ်လၢ နထံၣ်ယၤအဃိ နနာ်တၢ်ဧါ. ပှၤလၢ အတထံၣ်ဘၣ် သနာ်က့ နာ်တၢ်တဖၣ်န့ၣ် ကသးခုဝဲလီၤ.”
၃၀ နီၢ်ကီၢ်န့ၣ် ယ့ၣ်ၡူးမၤစ့ၢ်ကီး တၢ်ပနီၣ်လီၤလးလၢ အဂၤတဖၣ်လၢ အပျဲၢ်အဘီၣ်တဖၣ် အမဲာ်ညါ ဒီဒူၣ်လီၤ. ဘၣ်ဆၣ် တၢ်တကွဲးလီၤအီၤလၢ လံာ်ထူအံၤ အပူၤဘၣ်.+
၃၁ သနာ်က့ တၢ်လၢအဘၣ်တၢ်ကွဲးလီၤအီၤတဖၣ်အံၤန့ၣ် မ့ၢ်ဒ်သိးသုကနာ်လၢ ယ့ၣ်ၡူးမ့ၢ်ခရံာ် ဒီးကစၢ်ယွၤ အဖိခွါလီၤ. ဒီးမ့ၢ်လၢ သုနာ်တၢ်အဃိ သုကန့ၢ်ဘၣ် တၢ်မူခီဖျိလၢ အမံၤအဃိလီၤ.+
တၢ်ဂ့ၢ်အဘျဲၣ်တဖၣ်
^ ကွၢ် တၢ်ဂ့ၢ်အဘျဲၣ်လၢ ယိၤဟၣ် ၇:၁၃.
