ယိၤဟၣ် ၁၅:၁-၂၇
၁၅ “ယမ့ၢ် စပံးမုၢ်နီၢ်ကီၢ် ဒီးယပၢ်မ့ၢ် ပှၤကွၢ်ထွဲစပံးကျီးလီၤ.
၂ တၢ်အဒ့လၢယလိၤ လၢအတသၣ်ထီၣ်ဘၣ်န့ၣ် အဝဲကျီကွံာ်ဝဲခဲလၢာ် ဒီးကယဲၢ်တၢ်အဒ့ လၢအသၣ်ထီၣ်န့ၣ် အဝဲပဲာ်ဟိ ကဆှီထီၣ်ဝဲဒ်သိး အကသၣ်ထီၣ်အါန့ၢ်ဒံးလၢညါလီၤ.+
၃ ခီဖျိလၢ ယတၢ်ကတိၤလၢ ယတဲတ့ၢ်သုအဃိ သုကဆှီလံ.+
၄ ဆဲးအိၣ်ဒီးယၤ ဒီးယကဆဲးအိၣ်ဒီးသုလီၤ. တၢ်အဒ့တဒ့ မ့ၢ်တဆဲးအိၣ်လၢ စပံးမုၢ်အလိၤဘၣ်န့ၣ် အသၣ်ထီၣ်ဒၣ်အတၢ် တသ့ဘၣ်. ဒ်န့ၣ်အသိး သုဝဲစ့ၢ်ကီး သုမ့ၢ်တဆဲး အိၣ်ဒီးယၤဘၣ်န့ၣ် သုသၣ်ထီၣ် တသ့ဘၣ်.+
၅ ယမ့ၢ်စပံးမုၢ်ဒီး သုမ့ၢ်စပံး အဒ့တဖၣ်လီၤ. ယမ့ၢ်တပၣ်ဘၣ်န့ၣ် သုမၤတၢ် တသ့နီတမံၤဘၣ်. အဃိ ပှၤလၢ အဆဲးအိၣ်ဒီးယၤန့ၣ် ယဆဲးအိၣ်ဒီးအီၤ ဒီးအဝဲသၣ်ထီၣ်ဝဲ တၤသၣ်အါမးလီၤ.+
၆ ပှၤတဂၤဂၤမ့ၢ် တဆဲးအိၣ်ဒီးယၤဘၣ်န့ၣ် အဝဲကလီၤဂာ်ဒ် တၢ်အဒ့လၢပှၤတၢၤကွံာ်အီၤ ဒီးဃ့ထီကွံာ်ဝဲအသိးလီၤ. ဒီးပှၤကထၢဖှိၣ်က့ၤဝဲ တၢ်အဒ့တဖၣ်အံၤ ဒီးကွံာ်လီၤအီၤလၢ မ့ၣ်အူအပူၤ ဒီးအကအူအီၣ်ဝဲလီၤ.
၇ သုမ့ၢ်ဆဲးအိၣ်ဒီးယၤ ဒီးတၢ်လၢယတဲတဖၣ် မ့ၢ်ဆဲးအိၣ်လၢသုသးပူၤန့ၣ် သုမ့ၢ်ဃ့ တၢ်တမံၤဂ့ၤ တမံၤဂ့ၤလၢ သုလီကီန့ၣ် သုကန့ၢ်ဘၣ်အီၤလီၤ.+
၈ သုမ့ၢ်ပာ်ဖျါထီၣ်လၢ သုမ့ၢ် ယပျဲၢ်ယဘီၣ်တဖၣ် ဒီးဆဲးသၣ်ထီၣ် တၤသၣ်အါမးန့ၣ် ယပၢ်ကဘၣ် တၢ်မၤလၤကပီၤအီၤလီၤ.+
၉ ဒ်ပၢ်အဲၣ်ယၤအသိး ယအဲၣ်သုလီၤ.+ ဆဲးအိၣ်လၢ ယတၢ်အဲၣ်အပူၤတက့ၢ်.
၁၀ သုမ့ၢ်မၤထွဲ ယတၢ်မၤလိာ်တဖၣ်န့ၣ် သုကဆဲးအိၣ်လၢ ယတၢ်အဲၣ်အပူၤ ဒ်ယမၤထွဲ ပၢ်အတၢ်မၤလိာ်တဖၣ် ဒီးဆဲးအိၣ်လၢ အတၢ်အဲၣ်အပူၤအသိးလီၤ.
၁၁ “ယတဲဘၣ်သု တၢ်ဂ့ၢ်တဖၣ်အံၤ ဒ်သိးယတၢ်သးခု ကအိၣ်လၢသုပူၤ ဒီးဒ်သိး သုတၢ်သးခုကအိၣ် လၢလၢပှဲၤပှဲၤအဂီၢ်လီၤ.+
၁၂ ဒီးယမၤလိာ်သုလၢ အဲၣ်လိာ်သုသး တဂၤဒီးတဂၤ ဒ်ယအဲၣ်သု အသိးတက့ၢ်.+
၁၃ ပှၤလၢ အတၢ်အဲၣ်ဒိၣ်န့ၢ်ဒံး ပှၤတဂၤလၢ အဟ့ၣ်လီၤကွံာ် အသးသမူလၢ အသကိးတဖၣ်အဂီၢ်န့ၣ် တအိၣ်နီတဂၤဘၣ်.+
၁၄ သုမ့ၢ်မၤတၢ်လၢ ယမၤလိာ်သုန့ၣ် သုမ့ၢ် ယသကိးတဖၣ်လီၤ.+
၁၅ မ့ၢ်လၢကုၢ်န့ၣ် တသ့ၣ်ညါတၢ်လၢ အကစၢ်မၤဝဲဘၣ်အဃိ ယတကိးသုလၢ ကုၢ်တဖၣ်လၢၤဘၣ်. ယကိးသုလၢ သကိးတဖၣ် မ့ၢ်လၢ ယဒုးသ့ၣ်ညါသု တၢ်ခဲလၢာ်လၢ ယနၢ်ဟူဘၣ်လၢ ယပၢ်အအိၣ်အဃိလီၤ.
၁၆ သုတဃုထၢထီၣ်ယၤဘၣ်, ယဃုထၢထီၣ်သုလီၤ. ယဟ့ၣ်လီၤသုမူဒါလၢ သုကဆဲးသၣ်ထီၣ်တၤသၣ် ဒီးသုတၤသၣ်န့ၣ် ကဘၣ်အိၣ်ဂၢၢ်ဆိးကျၢၤဝဲ ဒ်သိးပၢ်ကဟ့ၣ်လီၤသု တၢ်လၢသုဃ့အီၤ တမံၤဂ့ၤတမံၤဂ့ၤ လၢယမံၤအပူၤလီၤ.+
၁၇ “ဒ်သိး သုကအဲၣ်လိာ်သုသး တဂၤဒီးတဂၤအဂီၢ် ယမၤလိာ်သုလၢ တၢ်ဂ့ၢ်တဖၣ်အံၤလီၤ.+
၁၈ ဟီၣ်ခိၣ်မ့ၢ်သးဟ့သုန့ၣ် သ့ၣ်နီၣ်ထီၣ်လၢ အသးဟ့ဆိယၤလၢ သုမဲာ်ညါတက့ၢ်.+
၁၉ သုမ့ၢ်ဘၣ်ဃးဒီး ဟီၣ်ခိၣ်န့ၣ် ဟီၣ်ခိၣ်ကအဲၣ်ဝဲတၢ်လၢ အဘၣ်ဃးဒီးအီၤလီၤ. ဘၣ်ဆၣ် သုတဘၣ်ဃးဒီး ဟီၣ်ခိၣ်ဘၣ်+ ဒီးမ့ၢ်လၢ ယဃုထၢထီၣ်ကွံာ်သုလၢ ဟီၣ်ခိၣ်အဃိ ဟီၣ်ခိၣ်ကသးဟ့သုလီၤ.+
၂၀ တိၢ်နီၣ်ဃာ် တၢ်ကတိၤလၢ ယကတဲသုအံၤတက့ၢ်. ကုၢ်န့ၣ်တဒိၣ်န့ၢ် အကစၢ်ဘၣ်. အဃိ အဝဲသ့ၣ် မ့ၢ်မၤအၢမၤနးယၤန့ၣ် အဝဲသ့ၣ် ကမၤအၢမၤနးသု စ့ၢ်ကီးလီၤ.+ ဒီးအဝဲသ့ၣ် မ့ၢ်ဒိကနၣ် ယကလုၢ်န့ၣ် အဝဲသ့ၣ် ကဒိကနၣ် သုကလုၢ်စ့ၢ်ကီးလီၤ.
၂၁ ဘၣ်ဆၣ် လၢယမံၤအဃိန့ၣ် အဝဲသ့ၣ် ကမၤသုလၢ တၢ်သ့ၣ်တဖၣ်အံၤခဲလၢာ်, မ့ၢ်လၢအဝဲသ့ၣ် တသ့ၣ်ညါ ပှၤလၢ အဆှၢလီၤယၤတဂၤဘၣ် အဃိလီၤ.+
၂၂ ယမ့ၢ်တဟဲလီၤ တဲဘၣ်အဝဲသ့ၣ်ဘၣ်န့ၣ် အဝဲသ့ၣ် အတၢ်ဒဲးဘးတအိၣ်ဘၣ်.+ ဘၣ်ဆၣ် ခဲအံၤအဝဲသ့ၣ် တဲပူၤဖျဲးအသးလၢ အတၢ်ဒဲးဘးအဂီၢ် တသ့လၢၤဘၣ်.+
၂၃ ပှၤလၢ အသးဟ့ယၤန့ၣ် သးဟ့ယပၢ်စ့ၢ်ကီးလီၤ.+
၂၄ တၢ်မၤလၢ ပှၤတမၤနီတဂၤဒံးဘၣ်န့ၣ် ယမ့ၢ်တမၤဘၣ်လၢ အဝဲသ့ၣ် အကျါဘၣ်ဒီး အဝဲသ့ၣ် အတၢ်ဒဲးဘး တအိၣ်ဘၣ်.+ ဘၣ်ဆၣ် ခဲအံၤအဝဲသ့ၣ် ထံၣ်ယၤဒီး သးဟ့ယၤဒီးယပၢ်လီၤ.
၂၅ ဘၣ်ဆၣ် တၢ်ကဲထီၣ်အသး ဒ်အံၤန့ၣ် မ့ၢ်ဒ်သိးတၢ်ကွဲးအသးလၢ အဝဲသ့ၣ် အတၢ်သိၣ်တၢ်သီအပူၤ လၢအမ့ၢ် ‘တၢ်ဂ့ၢ်တအိၣ် နီတမံၤဘၣ် သနာ်က့ အဝဲသ့ၣ်သးဟ့ယၤ’+ န့ၣ် ကလၢထီၣ်ပှဲၤထီၣ် အဂီၢ်လီၤ.
၂၆ ယကဆှၢလီၤန့ၢ်သု ပှၤမၤစၢၤတၢ်လၢ အဟဲလၢပၢ်အအိၣ် လၢအမ့ၢ်ဝဲသးစီဆှံလၢ အပာ်ဖျါထီၣ် တၢ်မ့ၢ်တၢ်တီလီၤ.+ အအိၣ်ဟဲလၢပၢ်အအိၣ် ဒီးဖဲအဟဲတုၤဝဲအခါန့ၣ် အကအုၣ်အသးလၢ ယဂ့ၢ်ယကျိၤလီၤ.+
၂၇ ဒီးသုဝဲစ့ၢ်ကီး မ့ၢ်လၢသုအိၣ်ဒီးယၤ စးထီၣ်လၢအခီၣ်ထံး လံၤလံၤအဃိ သုကဘၣ် အုၣ်သုသးလီၤ.+
