Жохан 1:1—51
1 Әуел баста Сөз болған+, Сөз Құдаймен бірге болған+, Сөз Құдайға ұқсас болған+.
2 Бастапқыда ол Құдаймен бірге болған.
3 Құдай бәрін Сөз арқылы жаратқан+, онсыз ештеңе де жаратылмаған.
4 Өмір Сөз арқылы пайда болды, әрі бұл өмір адамдар үшін жарық болды+.
5 Жарық түнекте жарқырап тұр+, түнек оны жеңе алмайды.
6 Құдайдың өкілі ретінде жіберілген бір адам келді. Оның есімі Жақия еді+.
7 Ол әртүрлі адамдар өзі арқылы сену үшін, куәгер ретінде жарық туралы айтуға келді+.
8 Оның өзі жарық емес еді+, бірақ сол жарық туралы куәлік етуге келді.
9 Ал әртүрлі адамдарға сәулесін түсіретін шынайы жарық болса дүниеге келгелі жатыр еді+.
10 Ол, яғни Сөз, дүниеде болған+, әрі дүние сол арқылы жаратылған+, бірақ дүние оны таныған жоқ.
11 Ол өз халқына келді, алайда олар оны қабылдамады.
12 Ал өзін қабылдағандардың бәріне Құдайдың балалары болуға мүмкіндік берді+, өйткені олар оның есіміне сенді+.
13 Олар қан мен тәннен немесе адамның қалауымен емес, Құдайдан туылды+.
14 Сөз адам болып+, арамызда өмір сүрді. Біз оның салтанатын, жалғыз ұлдың+ әкесінен алған салтанатын, көрдік. Ол Құдайдың рақымына молынан кенелген әрі әрдайым шындықты айтқан.
15 (Жақия ол туралы куәлік етіп, дауыстап: “Менен кейін келе жатқан менің алдыма шықты, өйткені ол маған дейін бар болған” деген кісім осы”,— деді+.)
16 Ол мол рақымға кенелгендіктен, біз де оның рақымына молынан кенеле береміз.
17 Өйткені Заң Мұса арқылы берілсе+, ал рақым+ мен шындық Иса Мәсіх* арқылы ашылды+.
18 Құдайды ешкім ешқашан көрген емес+. Оны бізге Әкесінің қасындағы*+ оған ұқсас жалғыз Ұлы*+ танытты+.
19 Яһудилер Жақияға Иерусалимнен діни қызметкерлер мен леуіліктерді жіберіп: “Сен кімсің?”+— деп сұратқанда,
20 ол: “Мен Мәсіх емеспін”,— деп ашық мойындады.
21 Олар: “Сонда кімсің? Ілияссың ба+?”— деп сұрағанда, ол: “Жоқ, ол емеспін”,— деді. “Мүмкін, келетіні алдын ала айтылған пайғамбар шығарсың?”+— дегенде, Жақия: “Жоқ”,— деп жауап берді.
22 Сонда олар: “Бізді жібергендерге жауап беруіміз үшін кім екеніңді айтшы. Өзің жайлы не айтасың?”— деді.
23 Бұған Жақия: “Ишая пайғамбардың сөздеріне сай, “Ехобаның* жолын тегістеңдер!”+ деп, шөл далада* жар салып жатқан дауыс менмін”,— деді+.
24 Бұл кісілерді парызшылдар* жіберген еді.
25 Олар Жақиядан: “Егер Мәсіх те, Ілияс та, пайғамбар да болмасаң, онда неге шомылдыру рәсімін* жасап жүрсің?”— деп сұрады.
26 Жақия былай деп жауап берді: “Мен суға шомылдыру рәсімін жасаймын. Бірақ араларыңда сендер танымайтын біреу бар.
27 Ол менен кейін келе жатыр, мен оның сандалының бауын шешуге де татымаймын+”.
28 Бұл оқиға Жақия шомылдыру рәсімін жасап жүрген Иорданның арғы бетіндегі Бетанияда болған еді+.
29 Келесі күні Жақия өзіне қарай келе жатқан Исаны көріп былай деді: “Қараңдар, мынау — дүниені күнәдан арылтатын+ Құдайдың Тоқтысы+!
30 “Менен кейін келе жатқан менің алдыма шықты, өйткені ол маған дейін бар болған” дегенімде, сол туралы айтқан едім+.
31 Өзім де оны білмейтінмін. Бірақ Исраил халқы оның кім екенін білсін деп, шомылдыру рәсімін жасап жүрмін+”.
32 Жақия тағы былай куәлік етті: “Мен көктен көгершін іспетті киелі рухтың түсіп, оның үстіне қонғанын көрдім+.
33 Мен оны білмейтін едім. Бірақ суға шомылдыру рәсімін орындауға жіберген Құдай маған: —Киелі рухтың көктен түсіп, кімге қонғанын көрсең+, міне, сол киелі рухпен шомылдырады+,— деген еді.
34 Мен осыны көріп, оның Құдай Ұлы екеніне куәлік еттім+”.
35 Келесі күні Жақия екі шәкіртімен тағы сол жерде тұрғанда,
36 қастарынан өтіп бара жатқан Исаны көріп: “Қараңдар, мынау — Құдайдың Тоқтысы+!”— деді.
37 Мұны естігенде, екі шәкірт Исаның соңынан ерді.
38 Иса бұрылып, олардың өзіне еріп келе жатқанын көріп: “Сендер не іздеп жүрсіңдер?”— дегенде, олар: “Равви (бұл сөз “Ұстаз” деп аударылады), қайда тұрып жатырсыз?”— деп сұрады.
39 Сонда ол: “Жүріңдер, өздерің көріңдер”,— деді. Олар барып, оның тұратын жерін көрді де, сол күні онымен бірге қалды. Бұл шамамен оныншы сағат* болатын.
40 Жақиядан Иса туралы естіп, оған ерген екі шәкірттің бірі Шимон Петірдің бауыры Әндір еді+.
41 Ол алдымен бауыры Шимонды тауып алып, оған: “Біз Мәсіхті+ таптық”,— деді. (Мәсіх “майланған” дегенді білдіреді.)
42 Сөйтіп, оны Исаға ертіп келді. Иса оған қарап: “Сен Жохан ұлы Шимонсың+. Бұдан былай Кефа деп аталасың”,— деді. (Кефа грекше “Петір”*+.)
43 Ертесіне Иса Ғалилеяға бармақшы болды. Ол Філіпті+ тауып алып: “Менің ізбасарым бол!”— деді.
44 Філіп те Әндір мен Петір тұратын Бетсайда қаласынан еді.
45 Філіп Натанайылды+ тауып алып: “Біз Мұса Заңында және пайғамбарлар жазбаларында айтылған адамды таптық. Ол — Жүсіп ұлы+ назареттік Иса”,— деп айтты.
46 Бірақ Натанайыл: “Сол Назареттен не жақсылық шығар дейсің?”— дегенде, Філіп: “Жүр, өзің көр”,— деді.
47 Иса өзіне қарай келе жатқан Натанайылды көріп: “Мынау — шынымен қулық-сұмдығы жоқ исраилдік”,— деді+.
48 Натанайыл: “Сіз мені қайдан білесіз?”— деп сұрағанда, Исаның жауабы мынау болды: “Філіп шақырмай тұрып, сені інжір ағашының астынан көрдім”.
49 Сонда ол: “Ұстаз*, сіз Құдай Ұлысыз, Исраилдің Патшасысыз”+,— деді.
50 Иса оған: “Сені інжір ағашының астынан көрдім дегендіктен, маған сендің бе? Әлі бұдан да зор нәрселерді көресің”,— деп жауап берді.
51 Сосын: “Сендерге нағыз шындықты айтамын, көктің ашылғанын және Құдай періштелерінің Адам Ұлына* түсіп, қайтадан көкке көтеріліп жатқанын көресіңдер”+,— деді.
Сілтемелер
^ Түсіндірмедегі “Мәсіх” сөзін қараңыз.
^ Сөзбе-сөз “Әкесінің төсіндегі”. Бұл ерекше ықыласқа ие болуды білдіреді.
^ Немесе “Құдайдың өзі тікелей жаратқан ұлы”.
^ Түсіндірмені қараңыз.
^ Бұл — Құдайдың есімі. Түсіндірмені қараңыз.
^ Түсіндірмені қараңыз.
^ Түсіндірмені қараңыз.
^ Шамамен түстен кейінгі 16:00. Түсіндірмені қараңыз.
^ “Кефа” да, “Петір” де “тас” дегенді білдіреді.
^ Сөзбе-сөз “Равви”.
^ Түсіндірмені қараңыз.