Epektibong mga paagi aron moarang-arang ang imong gibati!

•  Unsay imong buhaton?

•  Kon kinahanglan kang magpadoktor

•  Pamaagi aron maulian

•  Makatabang nga mga teksto

 Tagda ang mosunod nga situwasyon:

 Wala nay kalipay si Jennifer. Bisag walay hinungdan, magsige siyag hilak. Di siya gustong makig-uban sa laing tawo ug halos dili na siya mokaon. Wala na siyay klarong tulog ug dili na siya makapokus. Naghunahuna si Jennifer: ‘Naunsa na man ko? Maulian pa kaha ko?’

 Maayo kaayo nga estudyante si Mark. Pero karon, dili na siya ganahang moeskuyla ug nigamay pag-ayo ang iyang grado. Dili na siya ganahang modula sa paborito niyang sports. Natingala ang iyang mga amigo. Nabalaka sab ang iyang ginikanan. Molabay ra ba ni​—o seryoso iyang problema?

 Maka-relate ba ka nila Jennifer ug Mark? Kon mao, unsay imong mahimo? Naa kay duha ka opsiyon:

1.   Solohon ang imong problema

2.   Pangayog tabang sa kasaligang tawo

 Opsiyon A ang mas sayon, labina kon dili ka ganahang makig-estorya. Pero mao kaha nay maayong buhaton? Ang Bibliya nag-ingon: “Ang duha mas maayo kay sa usa . . . kay kon ang usa kanila mapukan, ang usa makabangon sa iyang kauban. Apan unsaon na lamang sa usa nga mapukan kon walay lain nga magbangon kaniya?”​—Ecclesiastes 4:9, 10.

 Sa pag-ilustrar: Imadyina nga nasaag ka sa lugar nga komon ang krimen. Ngitngit ang palibot, ug naay daghang istambay. Unsay imong himoon? Puwede kang mangitag dalan pagawas nga ikaw-ikaw ra. Pero di ba mas maayo kon mangayo kag tabang sa kasaligang tawo?

 Ang depresyon pareho nianang lugar nga komon ang krimen. Tinuod, usahay maguol pod ka pero mawala ra dayon ang maong pagbati. Pero kon magsige na lang kag ka-depress, mas maayong mangayo kag tabang.

 PRINSIPYO SA BIBLIYA: “Ang nagalain sa iyang kaugalingon . . . mobatok sa tanang praktikal nga kaalam.”​—Proverbio 18:1.

 Mas maayo ang opsiyon B​—makig-estorya sa ginikanan o sa kasaligang tawo—​kay matabangan ka sa eksperyensiyadong mga tawo, nga nakaagi sa imong gibati.

 Basig moingon ka: ‘Pero dili man masabtan sa akong ginikanan ang akong gibati!’ Sure ba ka ana? Bisag dili mo parehog naeksperyensiyahan niadtong tin-edyer pa sila, gibati pod nila ang imong gibati. Ug basin nahibalo sila sa solusyon niana!

 PRINSIPYO SA BIBLIYA: “Dili ba ang kaalam anaa sa mga tigulang ug ang pagsabot anaa sa kataas sa mga adlaw?”​—Job 12:12.

 Ang punto: Kon isulti nimo sa imong ginikanan o sa kasaligang tawo ang imong gibati, mas makakuha kag epektibong tambag.

 Kon kada adlaw kang ma-depress, basin naa na kay depresyon sama sa clinical (o, major) depression nga kinahanglang ipadoktor.

 Sa mga batan-on, ang mga simtoma sa clinical depression halos pareho anang komon nga bation sa mga tin-edyer nga mag-usab-usab ang mood. Hinuon, sagad balikbalik ug mas grabe ang clinical depression. Kon sobra na ug pirme kang maguol, hangyoa ang imong ginikanan nga ipa-checkup ka.

 PRINSIPYO SA BIBLIYA: “Ang mga tawong himsog wala magkinahanglan ug mananambal, kondili ang mga masakiton.”​—Mateo 9:12.

 Kon nadayagnos nga naa kay major depression, ayawg kaulaw. Komon ang depresyon sa mga batan-on, ug matambalan ni! Dili ka ikaulaw sa imong tinuod nga mga amigo.

 Tip: Pailob lang. Dili awtomatikong maulian ang depresyon, ug madahom nimo nga usahay motokar gihapon ang kaguol. a

 Bisan tingalig kinahanglan kang magpadoktor, naa kay mahimo aron moarang-arang ang kaguol. Pananglitan, anam-anam kang maulian kon regular kang mag-ehersisyo, mokaon ug sustansiyadong pagkaon, ug matulog sa saktong oras. (Ecclesiastes 4:6; 1 Timoteo 4:8) Makatabang sab kon imong irekord sa notebook ang imong mga gibati ug mga paagi nga makapamenos sa kaguol. Isulat pod ang mga panahon sa kaguol ug kalipay.

 Kon naa kay clinical depression o kaha naa lang kay gikagul-an, hinumdomi: Makapaarang-arang sa imong situwasyon ang pagdawat ug tabang sa uban ug paghimog mga pamaagi aron maulian.

•  “Si Jehova haduol niadtong mga dugmok ug kasingkasing; ug siya magaluwas niadtong mga nahugno sa espiritu.”​—Salmo 34:18.

•  “Itugyan ang imong palas-anon kang Jehova, ug siya magasapnay kanimo. Dili gayod niya itugot nga matarog ang matarong.”​—Salmo 55:22.

•  “Ako, si Jehova nga imong Diyos, nagahawid sa imong tuong kamot, ang Usa nga nag-ingon kanimo, ‘Ayaw kahadlok. Ako magatabang kanimo.’”​—Isaias 41:13.

•  “Ayaw gayod kamo kabalaka bahin sa sunod nga adlaw.”​—Mateo 6:34.

•  “Ipahibalo ang inyong mga pangaliya sa Diyos; ug ang kalinaw sa Diyos nga labaw sa tanang panghunahuna magbantay sa inyong mga kasingkasing.”​—Filipos 4:6, 7.