Halos tanang pamilya dunay mga balaod, sama pananglitan sa balaod sa curfew, paggamit ug gadyet, ug pamatasan.

 Komosta kon nakalapas kag balaod sa pamilya? Wala na kay mahimo sa nahitabo, pero duna kay mahimo aron dili mograbe ang situwasyon. Ipakita niining artikuloha kon unsay puwede nimong himoon.

•  Kon unsay dili himoon

•  Mas maayong himoon

•  Ang giingon sa ubang batan-on

•   Kon wala mahibalo ang imong ginikanan nga nakalapas kag balaod, basig makahunahuna ka nga itago ang imong sayop.

•   Kon nahibalo sila nga nakalapas kag balaod, basig makahunahuna ka sa paghimog mga pasumangil o sa pagbasol sa uban.

 Walay usa niana ang maayong himoon. Ngano? Tungod kay kon itago nimo ang nahitabo o mohimo kag mga pasumangil, makita sa imong ginikanan nga dili ka pa hamtong.

 “Dili gyod maayong mamakak. Ngadtongadto, mahibaloan sa imong ginikanan ang nahitabo. Kon dili dayon ka motug-an, mas bug-at na hinuon ang silot.”​—Diana.

•   Angkona ang imong sayop. Ang Bibliya nag-ingon: “Siya nga nagatabon sa iyang mga sala dili molampos.” (Proverbio 28:13) Nahibalo ang imong ginikanan nga dili ka perpekto. Pero gusto nila nga motug-an ka sa tinuod.

   “Mas dali kang pasayloon sa imong ginikanan kon motug-an ka sa tinuod. Unya, mas mosalig sila nimo.”​—Olivia.

•   Pangayog pasaylo. Ang Bibliya nag-ingon: “Magpaubos sa usag usa.” (1 Pedro 5:5) Nagkinahanglag pagpaubos ang pagpangayog pasaylo ug dili paghimog mga pasumangil.

   “Ang mga tawo nga pirmeng mohimog mga pasumangil dili na makonsensiya kon makahimo silag sayop.”​—Heather.

•   Dawata ang disiplina. Ang Bibliya nag-ingon: “Pamati sa disiplina.” (Proverbio 8:33) Ayaw pagreklamo, ug dawata ang silot nga ipahamtang sa imong ginikanan.

   “Kon magsige kag reklamo bahin sa silot, mosamot ang imong situwasyon. Sunda ang mga restriksiyon, ug ayaw pagsigeg hunahuna sa dili nimo mahimo tungod sa maong mga restriksiyon.”​—Jason.

•   Paningkamot aron mahibalik ang pagsalig sa imong ginikanan. Ang Bibliya nag-ingon: ‘Hukasa ang daang personalidad ug talikdi ang kanhi ninyong binuhatan.’ (Efeso 4:22) Padayon sa paghimog maayong mga desisyon aron saligan ka pag-usab sa imong ginikanan.

   “Kon kanunay kang mohimog maayong mga desisyon ug ipakita nimo sa imong ginikanan nga dili na nimo usbon ang imong nahimong sayop, sa ngadtongadto mahibalik ang ilang pagsalig nimo.”​—Karen.

 TIP: Paghimog labaw pa kay sa ilang gipabuhat nimo. Pananglitan, sa sunod higayon nga mogawas ka, pahibaloa ang imong ginikanan kon nagbiyahe ka na paingon sa inyo​—bisan pag dili ka molapas sa curfew. Makatabang ni nga masabtan nila nga gusto nimong saligan ka nila pag-usab.