Sekreto #1: Kon mohatag ka, posibleng mabaslan ka!
Ang mga tawo makamatikod nga mahinatagon ka. Tungod niini, sila tingali magmahinatagon pod kanimo. Ang Bibliya nag-ingon:
“Batasana ang paghatag, ug pagahatagan kamo sa mga tawo. . . . Sa sukod nga inyong ginasukod, sila magasukod nganha kaninyo ingong balos.”—Lucas 6:38.
“Ang imong pagtratar sa uban mao usab ang pagtratar sa uban kanimo.”—Lucas 6:38, Contemporary English Version.
Sekreto #2: Kon motabang ka sa uban, gitabangan nimo ang imong kaugalingon!
Kon mohimo kag maayo sa uban, ang pagtamod nimo sa imong kaugalingon molig-on, ug tungod sa imong gihimo ikaw malipay. Ang Bibliya nag-ingon:
“Adunay labaw nga kalipay sa paghatag kay sa pagdawat.”—Buhat 20:35.
“Sa dihang maghikay ka ug usa ka kombira, dapita ang mga tawong kabos, mga baldado, mga bakol, mga buta; ug magmalipayon ka, tungod kay wala silay ikabalos kanimo.”—Lucas 14:13, 14.
Mga batan-ong mahunahunaon
Daghang batan-on mahunahunaon sa uban! Aniay pipila ka pananglitan.
“Sa panahon nga gusto lang kong maglingkod-lingkod ug magtan-awg TV, maghunahuna ko kang Mama ug Papa nga nagtrabaho ug kon unsa sila ka kapoy dihang mouli. Busa manghugas kog plato, manilhig, ug manghinlo sa balay. Magpabukal kog kape kay ganahan man silag kape. Pag-abot ni Mama, siya moingon, ‘Oy, kahinlo sa balay! Ug humot pa gyod ang kape. Salamat kaayo, Day!’ Mogaan gyod ang akong pamati kon makatabang ko bisag gamay kang Mama ug Papa.”—Casey.
“Kanunay gyod akong paluyohan sa akong ginikanan, gihatagan ko nila sa tanan nakong panginahanglan. Busa sa nagkaproblema sila sa ilang sakyanan sa miaging tuig, gihatagan nako silag kuwarta sa pagpaayo niini, bisag dako-dakong kantidad kadto nga nakuha gikan sa akong tinigom. Wala sila modawat sa kuwarta pero ako silang gipugos pagdawat. Ang akong ginikanan angay hatagan ug labaw pa niana. Ug nindot ang imong pamati kon ikaw mahinatagon.”—Holly.
Nahibalo ka ba? Daghang batan-ong mga Saksi ni Jehova ang nakasinatig kalipay tungod sa ilang pagtabang sa uban pinaagig pagtudlog Bibliya. Ang uban gani kanila namalhin sa ubang nasod diin dako ang panginahanglan ug mga magtutudlo sa Bibliya.
“Taga-United States ko ug mibalhin sa Mexico sa pagtabang sa pagtudlog Bibliya. Usahay lisod manghatag ug kuwarta o butang kay wala koy ikahatag. Apan akong nakita nga kon mohatag ko sa akong panahon ug kusog diha sa pagpanudlo bahin sa Bibliya, kini mas hatagag importansiya kay sa paghatag ug materyal nga mga butang.”—Evan.
Unsaon nako pagtabang sa uban?
Gusto ka bang makasinatig kalipay tungod sa pagtabang sa uban? Aniay pipila ka sugyot.
Pagtabang sa imong pamilya:
Manilhig, manghugas ug plato, o manghinlog kuwarto—bisag dili sugoon
Magluto
Magsulat ug kard agig pasalamat sa imong ginikanan
Tabangan ang imong igsoon sa iyang homwork
Pagtabang sa uban:
Magpadalag kard sa higalang nagsakit
Manghinlo sa nataran sa tigulang nga silingan
Duawon ang higalang dili makagahom paglakaw
Maghatag ug regalo sa higalang naglisod o dunay problema
Sugyot: Paghunahunag ubang paagi sa pagtabang. Dayon paningkamot nga makatabang kag usa ka tawo niining semanaha. Tan-awa, dili ba malipay ka!
“Kon motabang ka sa uban, malipay ka. Mobati ka nga duna kay nahimo, ug imong makita nga ang uban mapasalamaton niana. Tingali malipayon pa gani ka samtang nagtabang—bisag sa sinugdan wala ka magtuo nga makalipay diay ang pagtabang. Ang imong gihimo, para nimo, dili pagsakripisyo tungod kay daghan kag nadawat nga kaayohan.”—Alana.
Ang uban moingon nga kuwarta ang sukdanan sa kalipay ug kalamposan. Pero makahatag ba gyod kana ug tinuod nga kalipay? Unsay gipakita sa mga ebidensiya?
