•  Nganong mangilabot ang ginikanan?

•  Kon unsay imong himoon

•  Ang giingon sa ubang batan-on

 Ingon sa imong mama ug papa, concern lang sila nimo. Pero para nimo, mora kag nawad-an ug privacy. Pananglitan:

•   “Kuhaon ni Papa ang akong cellphone, pangayoon akong password, ug basahon ang tanang message,” miingon ang usa ka tin-edyer nga si Erin. “Kon dili ko mosugot, magtuo sab siya nga naa koy gisekreto.”

•   Si Denise, nga kapig 20 anyos, nahinumdom dihang gisusi gyod sa iyang mama ang billing statement sa iyang cellphone. “Iyang tan-awon ang mga number, ug pangutan-on ko kon kang kinsa to ug kon unsay among giestoryahan.”

•   Si Kayla, usa ka tin-edyer, miingon nga gibasa sa iyang mama ang iyang diary. “Daghan ra ba kaayo kog gipahungaw didto​—ang uban adto bahin pa gyod niya! Wa na gyod ko mag-diary sukad adto.”

 Ang punto: Responsibilidad sa imong ginikanan ang paghunahuna sa imong kaayohan, ug dili ikaw ang magbuot kon unsaon nila kana pagtuman. Estrikto ra ba kaayo sila usahay? Tingali. Pero duna kay mahimo aron dili ka mobating nawad-an sa imong privacy.

 Isulti ang tinuod. Ang Bibliya nagtambag nato nga ‘magmatinud-anon sa tanang butang.’ (Hebreohanon 13:18) Buhata kana sa imong mga ginikanan. Kon matinud-anon ka, hatagan ka nilag dugang privacy.

 Hunahunaa: Sukad sa una, gipakita ba nimo nga kasaligan ka? Sige ba kag kalimot sa imong curfew? Ginasekreto ba nimo sa ila kon kinsay imong mga higala o kon unsay imong ginahimo?

  “Nagpahiuyon ko kang Mama ug Papa. Dihang komostahon ko nila, ako silang ginasultihan sa tinuod. Ginatug-anan nako sila sa gusto nilang mahibaw-an. Tungod adto, misalig sila nako ug gihatagan na kog privacy.”​—Delia.

 Pailob lang. Ang Bibliya nag-ingon: “Padayong pamatud-i kon unsa kamo sa inyong kaugalingon.” (2 Corinto 13:5) Dili dihadiha nga mapamatud-an nimong kasaligan ka. Nagkinahanglan nig panahon, pero dili gyod masayang ang imong paningkamot.

 Hunahunaa: Miagi pod ug pagkabatan-on ang imong mama ug papa. Tungod ana, ngano kahang gusto nilang maseguro ang imong kaayohan?

 “Tingali mahinumdoman sa mga ginikanan ang ilang mga sipyat sa una, ug dili nila gusto nga mahimo sab na sa ilang mga anak.”​—Daniel.

 Sabta ang imong ginikanan. Sabta ang pagbati o hunahuna sa imong mama ug papa. Ang Bibliya nag-ingon nga ang maayong inahan “nagabantay sa mga panghitabo sa iyang panimalay” ug ang responsableng amahan nagadisiplina sa iyang mga anak sumala sa ‘kaisipan ni Jehova.’ (Proverbio 31:27; Efeso 6:4) Aron matuman sa imong mama ug papa ang maong responsibilidad, angay gyod silang mahibalo sa nagakahitabo sa imong kinabuhi.

 Hunahunaa: Ibutang ta nga ginikanan ka​—nga nakaagi na sa pagkabatan-on​—​hatagan ba nimog bug-os nga privacy ang imong anak, nga dili na gyod mangutana niya?

  “Kon batan-on ka, bation nimo nga morag ‘gikuhaan’ ka sa imong ginikanan ug privacy. Karon nga hingkod na ko, nasabtan na nako kon nganong kinahanglan to nilang himoon. Tungod diay to sa ilang pagpangga nako.”​—James.