Unsay Akong Himoon Kon Magdiborsiyo ang Akong Ginikanan?

I-PLAY

Kon unsay imong mahimo

Isulti ang imong gikabalak-an. Pahibaloa ang imong ginikanan nga naguol ug naglibog gyod ka. Tingali sultihan ka nila sa nahitabo ug sa ingon mamenosan ang imong kabalaka.

Kon dili kana mahimo sa imong ginikanan, mahimo kang moduol ug makigsulti sa usa ka hamtong nga higala.—Proverbio 17:17.

Labaw sa tanan, mamati gayod kanimo ang imong langitnong Amahan, ang “Tigpatalinghog sa pag-ampo.” (Salmo 65:2) Ibubo kon unsay anaa sa imong kasingkasing, ‘kay siya may kahingawa kanimo.’—1 Pedro 5:7.

Kon unsay dili himoon

Ang imong nasamdang pagbati tungod sa pagdiborsiyo sa imong ginikanan nahisamag pagpaayo sa bali nga bukton—sakit kini, apan maulian ka ra

Ayaw paghambin ug kasuko. “Ang akong ginikanan naghunahuna lang sa ilang kaugalingon,” miingon si Daniel, kansang ginikanan nagbulag sa siyete anyos pa siya. “Wala gayod sila maghunahuna namo ug kon unsay epekto kanamo sa ilang gihimo.”

Unsay mahitabo kang Daniel kon magsige siyag kasuko?—Giya: Basaha ang Proverbio 29:22.

Nganong makatabang kang Daniel nga pasayloon ang iyang ginikanan sa ilang nahatag nga kasakit kaniya?—Giya: Basaha ang Efeso 4:31, 32.

Likayi ang mga lihok nga makadaot nimo. “Naguol ko pag-ayo human magdiborsiyo ang akong ginikanan,” nahinumdom si Denny. “Wala na ko magtinarong sa pag-eskuyla ug wala ko makapasar. Human niadto . . . nagbinuang ko sa klase ug pirme kong makakitag away.”

Sa imong hunahuna, unsay rason sa pagbinuang ni Denny sa klase o sa kanunay niyang pagkakitag away?

Sa unsang paagi ang prinsipyo sa Galacia 6:7 makatabang sa mga tawong sama kang Denny nga malikayan ang makadaot nga mga lihok?

Nagkinahanglan ug panahon ang pagpaalim sa nasamdang pagbati. Apan, sa dihang medyo hapsay na ang imong kinabuhi, mobalik na sa normal ang imong pagbati.