MGA BATAN-ON NANGUTANA
Angay ba Kong Moundang ug Eskuwela?
“Di ko ganahang moeskuwela!” Kon mao nay imong gibati, basin makahunahuna ka nga moundang. Kini nga artikulo maghatag nimog ideya kon unsay mas maayong himoon.
Kon nganong miundang ang uban
Sumala sa mga eksperto, kini ang kasagarang hinungdan:
Nalisdan sa klase. ‘Bisag unsaon nakog paningkamot, ubos gihapon ang akong mga grado.’
Kawalay-interes. ‘Morag dili man nako mapuslan ang akong nakat-onan.’
Problema sa pinansiyal. ‘Kinahanglan kong motrabaho aron makatabang sa pamilya.’
Hunahunaa ang resulta
Ang Bibliya nag-ingon: “Ang maalamon mamalandong sa matag lakang.” (Proverbio 14:15) Unsay gitudlo niini? Kon nagplano kang moundang ug eskuwela, hunahunaa una kon unsay resulta.
Pangutan-a ang kaugalingon:
‘Kon moundang kog eskuwela, makakita kaha kog maayong trabaho?’
“Imadyina nga nangita kag trabaho ug tingali pamilyado na. Madawat kaha ka sa trabaho kon ang kasagaran sa dawaton kadtong nakahuman ug bisan hayskul lang?”—Julia.
‘Dili kaha ko malisdan sa pag-atubang sa mga problema sa kinabuhi?’
“Ang pag-eskuwela magbansay nimo para sa umaabot. Ang mga tawo nga imong makauban, mga tentasyon, ug ang imong trabaho sa umaabot halos parehas ra sa imong naeksperyensiyahan sa eskuwelahan.”—Daniel.
‘Igo na ba ning akong mga nakat-onan para sa umaabot?’
“Abi ra nimog dili mapuslan ang gitudlo sa eskuwelahan, pero inigka-23 anyos nimo ug kinahanglan na nimong asikasohon ang pinansiyal nga mga butang, makaingon gyod ka, ‘Maayo na lang nga wala nako gitulgan ang math.’”—Anna.
Mas maayong himoon
Pangayog tabang. Ang Bibliya nag-ingon: “Naay kalamposan kon daghan ang magtatambag.” (Proverbio 11:14) Kon nagkaubos ang imong grado, duol sa imong ginikanan, titser, guidance counselor, o hamtong nga higala para mahatagan kag mga tip kon unsaon nga motaas ang imong grado.
“Pakig-estorya sa imong titser kon nalisdan ka sa klase. Usahay, maghunahuna ka nga ang imong titser ang problema, pero kasagaran matabangan ka kon moduol ka nila.”—Edward.
Hunahunaa ang mga kaayohan. Ang Bibliya nag-ingon: “Mas maayo pa ang kataposan sa usa ka butang kay sa sinugdanan niini.” (Ecclesiastes 7:8) Dihang mahuman na kag eskuwela, daghan na kag nakat-onan sa imong mga subject, unya nakaugmad pa gyod kag mga hiyas ug katakos nga makatabang nimo sa umaabot.
“Inigkahamtong nimo, dili na tingali ka magsulat ug mga essay o magtuon para sa eksam, pero makamao na kang mo-handle sa stress kay naanad na ka ana niadtong nag-eskuwela ka pa.”—Vera.
Kon moundang kag eskuwela, sama rag minaog ka sa sakayan nga wala pa makadunggo; makaingon gyod ka, ‘Maayo pag wa ko monaog!’
Konsideraha ang ubang paagi sa pag-eskuwela. Ang Bibliya nag-ingon: “Ang tanang madalidalion seguradong mopaingon sa kakabos.” (Proverbio 21:5) Ayaw dayon pagdesisyon nga moundang sa pag-eskuwela. Puwede gihapon kang makahuman ug eskuwela pinaagig online schooling o homeschool program.
“Sa eskuwelahan, makakat-on ka sa pagkugi, pagsulbad ug mga problema, ug pagpakigkooperar sa uban. Daghan kaayog kaayohan kon moeskuwela ka. Di gyod ka magmahay.”—Benjamin.
Ang punto: Kon makahuman kag eskuwela, mas maandam ka sa mga responsibilidad nga imong maatubang sa umaabot.
Basin Ganahan Pod Ka
MGA BATAN-ON NANGUTANA
Unsay Akong Himoon Kon Pirmeng Ubos ang Akong Grado?
Imbes mosurender, sayra ang unom ka paagi aron motaas ang imong grado.
MGA BATAN-ON NANGUTANA
Di Ka na ba Ganahang Moeskuyla?
Laayan ka ba sa imong titser? Dili ba importante para nimo ang mga subject nga imong gitun-an?
MGA BATAN-ON NANGUTANA
Unsay Akong Himoon Aron Magkasinabot Mi sa Akong Titser?
Kon lisod ikasabot ang imong titser, ayawg hunahunaa nga wala na kay mahimo. Sulayi ni nga mga sugyot.
MGA BATAN-ON NANGUTANA
Kon Unsay Himoon Aron Molampos sa Pag-eskuwela sa Balay
Daghang estudyante karon ang nag-eskuwela sa balay. Naay lima ka tip aron molampos ka sa pagtuon diha sa imong bag-ong “classroom.”
