May nakita ka na ba nga sa imong hunahuna maayong himoong kapikas? Unsaon nimo pagkahibalo nga siya ang angay para nimo?

 Hinungdanon nga susihon nimo pag-ayo ang iyang tinuod nga kinaiya. Sa tinuod lang, dili tanang guwapa kasaligan ug dili tanang guwapo maayog moral. Maoy imong gipangita ang usa nga imong ikasabot nga mobagay sa imong personalidad ug parehas nimog tumong.​—Genesis 2:18; Mateo 19:​4-6.

 Susiha ang pagkatawo sa imong naibgan. Apan pagbantay! Kay basig ang tan-awon lang nimo mao ang gusto nimong makita. Busa ayaw pagdali. Ilha ang tinuod nga kinaiya sa imong naibgan.

 Wala kaayo hatagig pagtagad sa daghang managtrato ang pagkatawo sa ilang trato. Mohisgot dayon silag mga butang nga magkaparehas silang duha: “Parehas kamig gusto nga musika.” “Parehas kamig gikawilihan nga mga kalihokan.” “Magkasinabot kami sa tanang butang!” Pero kinahanglang ilhon nimo ang iyang tinuod nga kinaiya. Kinahanglang imong tan-awon ang “natago nga pagkatawo.” (1 Pedro 3:4; Efeso 3:16) Imbes hatagan ug importansiya ang mga butang nga kamo magkasinabot, mas maayong imong panid-an siya kon unsay iyang tinamdan kon kamo dili magkasinabot.

 Pananglitan, palandonga ang mosunod:

•   Unsa may iyang reaksiyon kon maglalis kamo​—ipamugos ba niya ang iyang gusto, nga tingali ‘mosinta sa kasuko’ o ‘mapasipalahog sinultihan,’ o sakit manulti? (Galacia 5:19, 20; Colosas 3:8) O makataronganon ba siya​—andam mopahiuyon aron wala nay samok, kon walay prinsipyong malapas?​—Santiago 3:17.

•   Ginakontrolar ba niya ang uban, o siya ba dominante o seloso? Moinsistir ba siya nga kinahanglang mahibalo siya sa tanan nimong lihok? “Nakadungog ako ug managtrato nga mag-away kay ang usa dili magpahibalo kon asa siya moadto,” matod pa ni Nicole. “Para nako, mahimo unya kana nga problema.”​—1 Corinto 13:4.

•   Unsay panglantaw sa uban kaniya? Maayong makig-estorya ka sa mga tawo nga dugay nang nakaila kaniya, sama sa mga hamtong diha sa kongregasyon. Nianang paagiha mahibalo ka kon maayo ba siyag reputasyon.​—Buhat 16:1, 2.