MGA BATAN-ON NANGUTANA

Unsaon Nako Pagkontrol sa Akong Emosyon?

I-PLAY

“Naay adlaw nga malipayon kaayo ko, naa poy adlaw nga mokalit ra kog kaguol. Ang mga butang nga wala ra nako kabalak-i gahapon kalit lang nakapahasol nako karon.”—Carissa.

Ang imo bang emosyon mag-usab-usab? a Kon mao, kini nga artikulo makatabang nimo!

Kon nganong mahitabo ni

Ang pag-usab-usab sa emosyon komon nga mahitabo ilabina sa yugto sa pagkaulitawo o pagkadalaga. Maong ayaw katingala kon usahay di gyod nimo masabtan ang imong mga emosyon.

Kon naglibog ka nganong moody ka usahay, hinumdomi nga kini maoy kasagarang resulta sa kausaban sa imong hormones. Tungod sab ni sa pagka-insecure ug pagkabalaka, mga pagbating normal nga motungha samtang nagkahingkod ka. Pero abi nimo, masabtan nimo imong emosyon ug makakat-on ka sa pagkontrol niini.

Realidad: Importanteng makamao kang mokontrol sa imong emosyon samtang bata pa ka, kay kana makatabang nimo sa pag-atubang sa lainlaing kahimtang sa umaabot.

Ang negatibong pagbati morag mga lubak sa karsada. Puwede nimong malikayan ang dagkong mga lubak aron hanoy ra ang imong pagbiyahe

Tulo ka butang nga imong mahimo

Pakig-estorya. Ang Bibliya nag-ingon: “Ang tinuod nga higala mahigugma sa tanang panahon, ug maoy usa ka igsoon nga natawo alang sa panahon sa kasakit.”—Proverbio 17:17.

“Naa koy amiga nga suod sa among pamilya. Mora na nako siyag ante. Maminaw gyod siya nako, ug ganahan kong makig-estorya niya. Kon sakto ang akong opinyon, apresyahon ko niya, ug kon masayop ko, tambagan ko niya.”—Yolanda.

Tip: Imbes makig-estorya ka sa mga parehas lang nimog edad—nga posibleng naglisod pod ug kontrol sa ilang emosyon—pakig-estorya sa imong mama ug papa o sa kasaligan ug hamtong nga mga higala.

Pagsulat. Sumala sa Bibliya, dihang si Job naguol pag-ayo, siya miingon: “Ipahungaw ko ang akong kabalaka bahin sa akong kaugalingon. Ako mosulti sa kapait sa akong kalag!” (Job 10:1) Gawas sa pagpakig-estorya, mapahungaw nimo ang imong gibati pinaagi sa pagsulat bahin niana.

“Magdaladala kog gamay nga notebook bisag asa ko moadto. Kon may makapaguol nako, ako ning isulat. Nakatabang gyod ni nga moarang-arang ang akong gibati.”—Iliana.

Tip: Paghimog diary ug isulat ang imong mga gibati, kon nganong mibati ka ana, ug kon unsay puwede nimong himoon aron makontrol nimo kana. Ang worksheet niini nga artikulo makatabang nimo sa paghimo niana.

Pag-ampo. Ang Bibliya nag-ingon: “Itugyan ang imong palas-anon kang Jehova, ug siya magasapnay kanimo. Dili gayod niya itugot nga matarog ang matarong.”—Salmo 55:22.

“Kanunay kong mag-ampo kang Jehova dihang maguol kaayo ko. Dihang masulti na nako niya ang tanan nakong gibati, mogaan akong paminaw.”—Jasmine.

Tip: Bisag naa kay gikabalak-an, paghunahunag tulo ka butang sa imong kinabuhi nga nakapalipay kaayo nimo. Dihang moampo ka, pangayog tabang kang Jehova—pero ayawg kalimot sa pagpasalamat sa tanang maayong butang nga imong nadawat gikan kaniya.

a Kini nga artikulo naghisgot sa pag-usab-usab sa emosyon nga komon sa mga batan-on karon. Kon duna kay bipolar disorder o laing klase sa depresyon, tan-awa ang artikulo nga “Unsay Akong Buhaton kon Ma-depress Ko?”