Unsay imong himoon sa mosunod nga mga kahimtang?

1.   Gikasab-an ka sa imong maestro kay nagpabadlong ka sa klase.

    Angay ka bang mangayog pasaylo sa imong maestro​—bisag naghunahuna ka nga sobra ra ang iyang reaksiyon?

2.   Nasayran sa imong amiga nga gilibak nimo siya.

    Angay ka bang mangayog pasaylo sa imong amiga​—bisag nagtuo ka nga tinuod ang imong giingon?

3.   Naglagot ka sa imong papa ug gitubagtubag nimo siya.

    Angay ka bang mangayog pasaylo sa imong papa​—bisag gibati nimo nga siyay hinungdan nga nasuko ka?

 Oo ang tubag nianang tanan. Pero, nganong angay kang mangayog pasaylo bisag gibati nimo nga naa kay maayong rason nga nahimo to nimo?

•  Nganong mangayog pasaylo?

•  Unsaon pagpangayog pasaylo?

•  Ang giingon sa ubang batan-on

•   Ang pagpangayog pasaylo magpakita nga hamtong ka. Kon angkonon nimo nga nasayop ka, imong gipakita nga giugmad nimo ang importanteng mga kinaiya nga makatabang nimo dihang mohamtong na ka.

   “Ang pagkamapainubsanon ug pailob makatabang nato sa pagpangayog pasaylo ug pagpaminaw sa isulti sa lain.”​—Rachel.

•   Ang pagpangayog pasaylo makatabang nga magkauliay ang maayong relasyon. Ang mga tawo nga mangayog pasaylo nagpakita nga mas importante kanila ang maayong relasyon kay sa pagpamatuod nga husto sila ug sayop ang lain.

   “Bisag naghunahuna ka nga wala kay sala, importante nga magkauliay. Simple ra nga butang ang pagpangayog pasaylo, pero makatabang ni nga magkauliay ang maayong relasyon.”​—Miriam.

•   Ang pagpangayog pasaylo makapagaan sa imong gibati. Bug-at kaayo ang bation dihang mapasakitan nato ang uban sa pulong o buhat. Pero, kon mangayo tag pasaylo, mogaan ang atong pamati. a

   “Dihay mga higayon nga nagtubagtubag ko kang Mama o Papa. Nakonsensiya ko, pero nalisdan ko sa pagpangayog pasaylo. Pero dihang nangayo kog pasaylo, migaan ang akong pamati kay nagkauliay mi.”​—Nia.

 Lisod ba ang pagpangayog pasaylo? Oo! Si Dena, usa ka dalaga nga kadaghan na nakapangayog pasaylo sa iyang mama, miingon: “Dili sayon ang pagpangayog pasaylo. Mora kog matuk-an ug di ko katingog!”

•   Kon posible, personal nga mangayog pasaylo. Kon magkaatubangay mo, makita niya nga tinud-anay ang imong pagpangayog pasaylo. Kon iagi nimog text ang pagpangayog pasaylo, basig dili siya motuo nimo. Bisan pag apilan nimog emoji nga guol ug nawong, morag dili gihapon sinsero ang imong pagpangayog pasaylo.

   Tip: Kon dili ka makapangayog pasaylo sa personal, basin puwede nimo siyang tawgan o padad-ag kard. Bisag hain niana ang imong pilion, hunahunaa pag-ayo ang imong isulti.

   Prinsipyo sa Bibliya: “Ang kasingkasing sa matarong mamalandong sa dili pa motubag.”​—Proverbio 15:28.

•   Pangayo dayog pasaylo. Kon maghulat kag dugay, mosamot ang problema ug dili na ka komportableng makig-estorya sa tawong imong napasakitan.

   Tip: Paghimog tumong​—pananglitan, ‘Mangayo kog pasaylo karon.’ Hunahunaa kon kanus-a ka mangayog pasaylo ug buhata kana.

   Prinsipyo sa Bibliya: “Pakighusay dayon.”​—Mateo 5:25.

•   Kinasingkasing nga mangayog pasaylo. Ang pag-ingon ug “Sorry nga mao nay imong gibati” dili tinud-anay nga pagpangayog pasaylo! “Ang tawo nga imong napasakitan sagad morespeto nimo kon makita niya nga giangkon nimo nga nasayop ka,” miingon ang dalaga nga si Janelle.

   Tip: Ayaw ubanig mga kondisyon ang pagpangayog pasaylo​—pananglitan, kanang moingon ka, “Sige mangayo kog pasaylo, pero kinahanglan pod kang mangayog pasaylo.”

   Prinsipyo sa Bibliya: “Buhaton nato ang tanan aron malinawon ang atong relasyon sa uban.”​—Roma 14:19.