Ang panaad sa pagpabiling virgin maoy usa ka sinulat o berbal nga panumpa nga dili makigsekso hangtod maminyo.

 Kini nga panaad nahimong popular sa mga katuigan sa 1990 dihang ang Southern Baptist Convention sa United States nagmugnag usa ka programa nga “True Love Waits” [Ang Tinuod nga Gugma Makahulat]. Kini nga programa nagpasiugda sa moral nga sukdanan sa Bibliya uban ang positibong impluwensiya sa isigkabatan-on nga ang tumong mao ang pagdasig sa mga batan-on sa dili pagpakigsekso hangtod maminyo.

 Wala madugay, dihay susama niini nga programa nga gisugdan diin ang mga nanambong nga miapil sa maong panaad gihatagan ug silver nga singsing agig simbolo (ug magpahinumdom kanila) sa ilang panaad nga dili una makigsekso sa dili pa maminyo.

 Ang tubag nagdepende kon kinsay imong pangutan-on.

•   Sumala sa tigpanukiduki nga si Christine C. Kim ug Robert Rector, “nakita sa mga pagtuon nga ang panaad sa mga batan-on nga magpabiling virgin igo lang nga nagpadelatar sa mga buhat sa pagpakigsekso sa mga tin-edyer o nagpamenos sa mga higayon sa paghimo niana.”

•   Sumala sa panukiduki nga gipatik sa Guttmacher Institute, gipakita sa pagtuon nga ang “mga tin-edyer nga nanaad nga magpabiling virgin lagmit makigsekso gihapon sama niadtong wala manaad.”

 Nganong nagkalahi ang mga resulta?

•   Sa ubang pagtuon, ang mga nanaad gitandi niadtong wala manaad kinsa dili managsama ug panglantaw bahin sa pagpakigsekso.

•   Sa laing pagtuon, ang mga nanaad gitandi niadtong wala manaad kinsa managsama ug panglantaw bahin sa pagpakigsekso.

 Unsay gipakita sa ikaduha nga pagtuon? Si Dr. Janet Rosenbaum, usa ka espesyalista bahin sa panglawas sa mga tin-edyer, nag-ingon nga paglabay ug lima ka tuig, “ang mga nanumpa ug wala manumpa parehas ra nga nakigsekso.”

 Ang mga programa sa panaad nga magpabiling virgin maayo ug tumong. Pero ang nakaapan kay kini wala magtudlo ug mga prinsipyo nga makatabang kanila sa pagtuman sa ilang panaad. Daghan niadtong nanaad “dili seryoso sa ilang panumpa,” nag-ingon si Dr. Rosenbaum. “Ang paglikay sa pagpakigsekso nagdepende sa determinasyon sa indibiduwal, dili sa pag-apil sa usa ka programa.”

 Gitudlo sa Bibliya ang maong determinasyon, dili pinaagig sinulat o berbal nga pagpanumpa sa usa, kondili pinaagi sa pagtabang kaniya sa ‘pagbansay sa iyang gahom sa pagsabot aron sa pag-ila sa maayo ug sa daotan.’ (Hebreohanon 5:14) Gawas pa, ang pagpabiling virgin dili kay basta paglikay lang sa sakit ug pagmabdos; usa kini ka paagi sa pagpakitag pasidungog sa Tagmugna sa kaminyoon.​—Mateo 5:19; 19:4-6.

 Ang mga sukdanan nga gitudlo sa Bibliya maoy alang sa atong kaayohan. (Isaias 48:17) Gani, ang tanang tawo​—bisag pila pay ilang edad—​mahimong determinado sa pagsunod sa sugo sa Diyos sa ‘pagkalagiw gikan sa pakighilawas.’ (1 Corinto 6:18) Kon ugaling magminyo sila, ilang bug-os kalipayan kini nga buhat, nga walay angayng kabalak-an ug basolan nga sagad maoy bation niadtong makigsekso una pa maminyo.