•  Nganong badyeton imong oras?

•  Ang imong mahimo

•  Ang giingon sa ubang batan-on

•   Ang oras morag kuwarta. Kon imo ning usikan, wala na ni dihang manginahanglan ka. Sa laing bahin, kon imong badyeton imong oras, naa pay mabilin aron makalingawlingaw ka!

   Prinsipyo sa Bibliya: “Ang tapolan nagatinguha, apan ang iyang kalag walay bisan unsa. Hinunoa, ang kalag sa mga kugihan patambokon.”​—Proverbio 13:4.

   Ang punto: Kon badyeton nimo imong oras, mas daghan kag mahimo, imbes gamay kag mahimo.

•   Kon maayo kang mobadyet sa imong oras, mapuslan nâ nga abilidad inigdako nimo. Diha magdepende kon magdugay ba ka o matangtang sa trabaho. Aws, kon naa kay negosyo, ganahan ba kag empleyado nga sigeg ka-late?

   Prinsipyo sa Bibliya: “Ang tawo nga kasaligan sa labing gamay kasaligan usab sa dako.”​—Lucas 16:10.

   Ang punto: Ang imong paagi sa pagbadyet sa oras magpaila kon unsang klaseha ka sa tawo.

 Pero sa tinuod lang, dili sayon ang pagbadyet. Konsideraha ning mga problemaha.

 Problema #1: Amigo ug amiga

 “Kon hagaron ko sa akong mga amiga, mouban gyod ko bisag daghan gyod unta kog trabaho. Maghunahuna ko, ‘Ah, dalidalion lang nako nig human unya inig-uli.’ Dili nâ pirmeng matuman, ug dili hinuon maayo ang resulta.”​—Cynthia.

 Problema #2: Kabaldahan

 “Ang pagtan-awg TV morag vacuum cleaner. Suyopon ka sa mga salida ug pelikula niini ug lisod kaayong molikay.”​—Ivy.

 “Mahurot akong oras sigeg gamit sa tablet. Ma-guilty ko kay maundang ra ko kon ma-lowbat na ni.”​—Marie.

 Problema #3: Pag-unya-unya

 “Dili dayon nako himoon ang akong homework ug uban pang buhatonon. Mahurot akong oras sa walay pulos nga mga buluhaton hangtod magdalidali kog himo sa akong homework​—dili gyod nâ maayong pagbadyet sa oras.”​—Beth.

1.   Ilista ang imong buhatonon. Pananglitan, imong trabahoon sa balay ug asaynment. Isulat kon unsa ka dugay nimong mahuman ang kada trabaho sa usa ka semana.

    Prinsipyo sa Bibliya: “[Tinoa] ang mas hinungdanong mga butang.”​—Filipos 1:10.

2.   Ilista ang gusto nimong buhaton sa bakante nimong mga oras. Puwedeng apil ani ang social networking ug pagtan-awg TV. Isulat pod kon pila ka oras nimo nang buhaton sa usa ka semana.

    Prinsipyo sa Bibliya: “Magpadayon sa paglakaw sa kaalam ... , nga magpalit sa nahiangay nga panahon.”​—Colosas 4:5.

3.   Paghimog plano. Tan-awag balik ang imong listahan. Sakto ra ba ang oras sa kada trabahoonon? Kinahanglan ba nimong kuhaan ang oras sa paglingawlingaw?

    Tip: Paghimong listahan sa buhatonon kada adlaw, nga i-check ang kada trabaho inigkahuman.

    Prinsipyo sa Bibliya: “Ang mga plano sa kugihan mosangpot gayod sa kaayohan.”​—Proverbio 21:5.

4.   Sunda ang imong giplano. Tinuod, basig kinahanglan kang mobalibad sa tapoktapok aron buhaton ang importanteng trabaho. Pero pagkahuman, makita nimo nga daghan pa diay kag bakanteng oras​—ug mas malipay ka ana.

    Prinsipyo sa Bibliya: “Pagkugi kamo.”​—Roma 12:11, Maayong Balita Biblia.

5.   Balosi imong pagkugi​—pero dili diha dayon. “Usahay makahuman kog duha ka trabaho sa listahan,” miingon ang dalagang si Tara, “dayon, makahunahuna ko, ‘OK, makatan-aw pa kog TV mga 15 minutos, ug mobalik ra kog trabaho.’ Aws, ang 15 minutos mahimong 30, ug ang 30 minutos mahimong usa ka oras, unya duha ka oras na diay ko sa TV!”

    Unsay solusyon? Isipa ang paglingawlingaw ingong balos tungod sa nahumang trabaho​—dili ingong bahin sa adlaw-adlawng buluhaton.

    Prinsipyo sa Bibliya: “Wala nay laing mas maayo alang sa tawo . . . nga makapahimulos ug maayo sa iyang kahago.”​—Ecclesiastes 2:24.