Yéhôva * Zambe nnye a nga lat alu’u ôsu. Kalate Zambe a jô bia na Yéhôva a nga té minga ôsu “a zu nye be fam.” Ane Adam a nga bôlane mevak a yia nye jia a jô na: “[Nyi a] nto évese ya bivese biam, a nsône ya minsône miam.” (Metata’a 2:22, 23) Yéhôva a ngenan a yi na bôte be ne nlu’ane be nyiñe meva’a été.

Éyoñ ô ndôme luk, ô ne buni na mame mese mé wulu ve ntene nten. Nya ajô a ne na, ja’a ba nye’esan aya, nnôme ba ngale bé tôbane minjuk. (1 Becorinthien 7:28) Nsoé kalate wu, wé yene melep a miñye’elane mi aso Kalate Zambe été mi ne mfi mfa’a y’ényiñe ya nda bôt.—Besam 19:8-11.

JÔME KALATE ZAMBE A JÔ: Fam é ne nlô ya nda bôt.—Beéphésien 5:23.

Nge wo ô ne nnôm, yeme na, Yéhôva a yi na ô voñôlô minga wôé. (1 Pierre 3:7) A nga té minga na a bo mvolô wôé, a yi fe na ô nye’e nye a semé nye. (Metata’a 2:18) Nye’ane wo nye’e nye wo yiane bo nya ngul aval ja tindi wo na ô telé miñyiane mié ôsu.—Beéphésien 5:25-29.

Nge wo ô ne ngal, yeme na, Yéhôva a yi na ô semé nnôme wôé nya nsemane, a na ô volô bo nye ésaé Yéhôva a nga ve nye. (1 Becorinthien 11:3; Beéphésien 5:33) Su’u nye a nleme wôé ôse éyoñ a nyoñe mintyi’an. (Becolossien 3:18) Nge ô bo nalé, e mise mé a mise me Yéhôva wé yené adit a abeñ.—1 Pierre 3:1-6.

JÔM Ô NE BO:

• Sili’i môte mia nye mi ne nlu’an, jé ô ne bo asu na ô bo mbamba nnôm nge ke mbamba nga. Kôme’e vô’ôlô, a va’a mengule ya tyendé

• Te bo ôjeja’a. Dé sili mia éyoñe na, mia bebaé mi yeme jôme mi ne bo asu na môt ase ya be mia a ve nyô mbo’o nleme mvaé

JÔME KALATE ZAMBE A JÔ: Wo yiane tu’a yeme mame nyo nnôm nge nyo ngal a nye’e. (Bephilippien 2:3, 4) Yene môt ô nga lu’u ane môt a ne édima, te wo vuane na Yéhôva a yi na bebo bésaé bé be bo “évôvoé nlem mfa’a ya bôte bese.” (2 Timothée 2:24) “Bifia biziñ bi ne (...) bala’an ane nkpwaté mekôn, v’ôyeme mimfefe’e mi bôt wo soo mvo’é.” Nde ñhe, tuka’a tobe bifia biôé. (Minkana 12:18, Mfefé Nkôñelan) Nsisime Yéhôva wo ye volô wo na ô kobô a mbamba nlem, ô kobô fe a nye’an.—Begalate 5:22, 23; Becolossien 4:6.

JÔM Ô NE BO:

• Ye’elane Yéhôva na a bi wo nlem, a fe na ô yeme vô’ôlô ôsusua na mia môt ô nga luk mia kôm ajô éziñ

• Tate’e kôme fas jame wé jô a aval avé wé jô jamete

JÔME KALATE ZAMBE A JÔ: Éyoñe mi lu’aneya, mi nto ve “nsône wua.” (Matthieu 19:5) Ve yemane na, mi ne bôte bebaé, a na asimesane denan é ne selan. Nde ñhe, mia yiane yé’é na mi bi ôsimesane wua, a na mi wô’ôtane mam avale da. (Bephilippien 2:2) Éyoñe mia nyoñe mintyi’an, mia yiane bo tyiñe jia. Kalate Zambe a jô na: “Mam môt a bôndé ma yem a melep.” (Minkana 20:18, Mfefé Nkôñelan) Mi jô’é na, melebe m’aso Kalate Zambe me liti mia zen éyoñe mia nyoñe mintyi’an.—Minkana 8:32, 33.

JÔM Ô NE BO:

• Bo’o na môt wo nye’e a yem avale wo wô’ôtan, te kate nye vemintyi’an ô nyoñeya

• Ôsusua na wo nyoñe ntyi’an éziñ, tate laan a nyo nnôm nge ki a nyo nga