1 Pierre 3:1-22
3 Avale te fe, mia beyal, sila’ané miabebiene si éjôé beyôme benan, ndemben, nge bevo’o ya be be be ne te bo mejô me Zambe mewôk, be ne ngule ya buni a zene ya ntabane ya beyale bap to’o be nji kañete be,
2 amu bebiene be nga kôme yen a mis mbamba ntabane wônan a édok ésemé jenan.
3 Nyanga jenan é bo’o te bo nyu ya nseñ, mfenane bisil, njaéane minsanga mevale mevale mi too a gôlôt a abeñe biyé,
4 ve é bo’ok avale bôte mi ne nlem été, avale nyanga éte é ne te ndaman, nsisim ô ne évôvoé a mvo’é, ñwô wo dañe mfi mise me Zambe.
5 Amu, avale te nde mimfufube mi binga ya melu mvus, mi mbe mi too ndi a Zambe mi mbe mi bo’o nyanga, mi sili’i mibiene si éjôé beyôme bap,
6 aval ane Sara a mbe a bo’o Abraham mewôk, a loone nye na tate. Mia fe mi ntoo bengo bé, vengevenge ve mia ke ôsu a bo mame me ne mvaé, a bo te kañese na woñ ô bi mia.
7 Avale da fe, mia beyôm, kelané ôsu a nyiñ a benyo beyal avale ñyemane ya été ô ne.* Mi va’a be duma aval ane ésua ja ji’a bôlé, ayoñe binga, mbôle be ne benyoñe ngabe ya beta mveane ya ényiñ a mia, meye’elane menane me za sa’abe zen.
8 Ma su’ulane jô na, mia bese biané ôsimesane wua,* mi wô’ane mintaé, mi nye’esan ane bobenyañe ya abume da, mi mvama’ane bôt a bo éjote nyul.
9 Te bulané abé a abé, nge ata a ata, ve mi yalane bôt a bibotan, amu a ne a zen éte nje mi nga loobane de, ndembene mia ye bi bibotan.
10 Amu “môt ase a nye’e ényiñ a nyu a kômbô nyiñe melu me ne mvaé, a yiane ba’ale ôyeme wé mfa’a ya abé a biyaé bié mfa’a ya nkobô ô ne medu’an.
11 A jôké’é abé a bo mvaé; a jeñe’e mvo’é a tôñesane je.
12 Amu mise me Yéhôva* me ne be bôte be ne zôsô, a melo mé ma vô’ôlô meye’elane me nja’ane map, ve Yéhôva* a ne te fombô bôte ba bo mbia be mam.”
13 Nya ajôô, za a ye bo mia abé, nge mia bo ayôñe mfa’a ya bo mvaé?
14 Ve nge mia tôbane njuk amu zôsô, mi ne mevak. Ve te kooné woñe jôme ba ko woñ,* a mi bo te nyeñeban.
15 Ve tela’ané Krist étyi ane Tate e minleme mienan été, mi too nkômesane kom ése, ya kamane ndi nleme jenane be môt ase a sili mia amu ya ndi nleme mi bili, ve mi bo’o ñhe de a évôvoé nlem a beta ésemé.
16 Ba’alané mbamba mone môte ya nlem, ndembene jam ése be ne jô mia é too abé, ba ba kobô mia abé, ba ye wôk ôson amu mbamba ntabane wônan, aval ane beyé’é be Krist.
17 Amu é ne mvaé abui na, mi tôbane minjuk amu mia bo mvaé, nge nne nkômbane Zambe ô ne nalé, a lôte na a bo amu mi nga bo mbia jam.
18 E nya ajôô, Krist a nga wu éyoñe jia ya biyoñe bise asu minsem, môt a ne zôsô asu bikotekote bi bôt, ndemben a ne kee mia be Zambe. A nga wôébane minsôn été, ve a nga beta wômô mfa’a ya nsisim.
19 Avale te nde a nga ke kañete minsisime mi mbe mimbôk,
20 mmie mite, melu ya mvus, mi nga bo melo éyoñ ôjibi Zambe ô mbe ô yange’e* melu me Noé, nté arche a mbe a lôñeba’an, vôme tyôtyoé bôt, nalé ate a ne na, bôte* muam, be nga nyiiban e ndône mendim.
21 Nduan, ñwô fe wo wô’an a jam éte, wo nyii fe mia éyoñe ji (ô nji vaa mvite ya minsôn, ve ô ne nsilane ya sili Zambe mbamba mone môte ya nlem), a zene ya ñwômane miñwuane Yésus Krist.
22 Nyuli ate a ne mbo nnôme Zambe, amu a nga ke yôp, a beéngele a bijôé a mengule bi ne éjôé jé si.
Notes
^ Nge ke, “lita’ané be na be ne mfi; yemané tebe été jap.”
^ Nge ke, “mfasane wua.”
^ Lañe’e Atinane bifia.
^ Lañe’e Atinane bifia.
^ Be ne fe jô na, “te kooné beangôndô be mame bap woñ.”
^ Nge ke, “Zambe a mbe a yange’e a ôjibi ôse.”
^ Éfia Grec, psukhê. Lañe’e Atinane bifia, “Ényiñ.”