Begalate 6:1-18
6 A bobejañ, to’o nge môt éziñ a nyoñe mbia abo dulu a teke de yem, mia mi wôneya nsisim, jeñané na mi sôan avale môt éte a évôvoé ése. Ve ô tabe’e ntyel asu dôé womien, amu wo fe ô ne tebe meve’ele été.
2 Kelané ôsu a be’e mimbe’e mi bôte bevok, a zen éte mia ye jalé atiñe Krist.
3 Amu nge môt éziñ a simesane na a ne jôm éziñ, a too ke na a nji bo jôm éziñ, a duk émien.
4 Ve môt ase a fase’e mam émien a bo, éyoñe te nje ñhe a ye vak émien étam, sa ke na a vek émien a môte mfe.
5 Amu môt ase a yiane bo ntindane ya bo mame Zambe a yi na a bo.
6 Nde fe, nyu ba ye’ele* mejô me Zambe a kaba’an avale mbamba be biôme bese a nyu a ve nye ñye’elan ôte.*
7 Te mia du’uban: Zambe a nji bo nyu be ne kpwe’ele. Amu jôm ése môt a bé, nje fe a ye kôan;
8 amu nyu a bé a tôñe’e mame ya minsôn, a ye kôane bibole bi mame ya minsôn, ve nyu a bé a tôñe’e mame ya nsisim, a ye kôan ényiñe ya nnôm éto ja so nsisim.
9 Nde, te bia bili ate’e mfa’a ya bo jam é ne mvaé, amu mbamba éyoñ, bia ye kôane nge bia bo te tek.*
10 Ajô te nde, nté ôse bi bili fane* ya bo de, mbo’ané mbamba be mame be bôte bese, ve e dañedañe be bôte bia be be bi ne mbunan été.
11 Tama yenan avale beta bikanga me nga tili mia a wo wome mamien.
12 Bôte bese ba kômbô yené mvaé mfa’a ya minsôn,* be ne ba ba kômbô tindi mia na mi tyi’ibane metyel, ba bo de fo’o ve asu na be sa’ale étibila’a ja so élé mintaé* Krist.
13 Amu, to’o ba be ntoo ntyi’an atyele bebiene ba tôñe ki Metiñe me Moïse, ve ba yi na mi tyi’iban atyel, ndembene be ne bi amu ya bo éngelezek ajô denan.*
14 Ve ma me nji bo éngelezek, vengevenge ve a élé mintaé* Tate wongane Yésus Krist, a zene jé, si nyu é nga wôéban avale ma fe me nga wôéban avale si nyu ja simesan.
15 Ntyi’an atyele nge te ntyi’an atyele bi nji bo mfi, jame da dañe mfi é ne na, Zambe a bo na môt a bo mfefé môt.
16 Mfa’a ya bôte bese ba nyiñ avale da yian, be tôñe’e atiñe di, mvo’é a nkoon éngôngole bi bo’o be be, ôwé, e be Israël Zambe.
17 Éyoñe ji, môt éziñ a bo’o teke zu ndeñele ma, amu nyule jam, me be’e mendeme ma liti na me ne ôlo Yésus.
18 A bobejañ, beta mvame Tate wongane Yésus Krist a tabe’e be mia a nsisime mia liti. Amen.
Notes
^ Nge ke, “ye’ele teke tili.”
^ Nge ke, “avale ñye’elan éte teke tili.”
^ Nge ke, “sili mo si.”
^ Nge ke, “mbamba éyoñ.”
^ Nge ke, “e mise me bôt.”
^ Lañe’e Atinane bifia.
^ Nkobô Grec, “minsône mienan.”
^ Lañe’e Atinane bifia.
