Bephilippien 2:1-30
2 Éyoñ ése mi bili fane ya ve môte ngule nyule Krist été, éyoñ ése mi bili fane ya volô môte nleme nye’an été, éyoñ ése mi bili fane ya bo nleme wua mfa’a ya nsisim,* éyoñ ése nleme wo bo mia mintaé asu môte mbok, a na mia yeme tebe été môte mbok,
2 bo’ané na ava’a dam é jaé ne lut. Mia bo de éyoñe mi bili ôsimesane wua, nye’ane wua, éyoñ élate jenan é ne ngumba a éyoñe mi bili aval asimesane da.
3 Te mia bo jam éziñ amu mia kômbô wumulu miabebien, nge ke amu mia kômbô bete miabebiene yôp, ve a nje’ebane nlem ôse, kañesa’ané na bôte bevo’o ba dañe mia.
4 Te mia dañe fase ve mame me ne mfi asu denan étam, mi fase’e fe mame me ne mfi asu bôte bevok.
5 Kelané ôsu a bi aval ôsimesan ôte be mia, avale Yésus fe a mbe a bili,
6 amu, akusa bo a mbe ane Zambe, a nji simesane môs éziñe na a nyoñ éto Zambe, na ba nye be bo nkôñe wua.
7 Teké’é, ve a nga sili émiene si a zu bo ôlo, a bialé ane môta binam.
8 Nde fe, éyoñ a nga bo môta binam,* a nga sili émiene si a bo mewôk akekui awu, yaa, awu élé mintaé* yôp.
9 Amu nalé, Zambe a nga bete nye yôp, a ve nye beta éto a éyôlé ja dañe biyôlé bise
10 asu na, e jôé Yésus, meboñe mese me kutebane si; ma ya yôp, ma ya si a ma me ne si été.*
11 Nde fe, ôyem ôse wo yiane ve Zambe Ésa wongane duma a kañese na Yésus Krist a ne Tate.
12 Nde a bobejañe ma nye’e, avale mi nga bo mewôk éyoñe me mbe valé a mia, éyoñe ji nje ñhe mia yiane dañe ke ôsu a bo mewôk, amu me nji bo valé, kelané ôsu a saé asu nyiiane wônane miabebien a woñ a ésemé.*
13 Amu Zambe a ne anjeñe ya ngule jenan,* nde fe a ve mia nkômban a ngule ya bo jam éziñ, éyoñ émien a tyi’i na a bo nalé.
14 Kelané ôsu a bo mame mese teke kobô menyiñ, nge sañetan,
15 ndembene mi ne bo teke jame ya ve mia mekua, teke bijô, bone be Zambe be nji be’e ayeme ya mbia jam éziñ, ba nyiñ ézezañe mbia be bôte ya éyoñe ji, mbe bete be nji bo mame me ne zôsô. Mia faé zañe jap ane éfufube si nyu été.
16 Mi tuka’a bi mejô ya ényiñ a mo mebaé. Nde ñhe ma ye bi beamu ya vak môse Krist, me yeme’e na me nji ke mbile zezé, nge wu ésaé zezé.
17 Ve, to’o ba sôé ma ane woone ba sôé metuna’a, mfa’a ya ésaé é ne étyi,* ésaé éte nje mbunane wônan ô nga ve mia, me ne mevak, ma va’a fe a mia bese.
18 Mia fe mia yiane bo mevak a vak a ma.
19 Ve éyoñe ji, me too ndi be Tate Yésus na me mbeme lôme mia Timothée, ndembene me ne bi ngule nyul éyoñe ma ye wô’ô mefoé ma so be mia.
20 Amu me nji bi môte mfe a ne ane nye, nyu a wô’ô mia mintaé.
21 Amu bôte bese bevo’o ba jeñe ve mfi wop bebien, sa ke wu Yésus Krist.
22 Ve miabebiene mia yeme mam a nga bo ma liti nalé, amu aval ane mon a saé ba ésa, a nga saé ane ôlo nsamba a ma na nkañetane mbamba foé ô ke ôsu.
23 Jôme te nje a ne susu’a môte ma kômbô lôme mia, nté ma yange yen avale mame ma ye wulu asu dam.
24 Me too ndi be Tate na, ana’ana mamiene ma ye zu wôé.
25 Ve éyoñe ji, ma yene mfi ya lôme mia Épaphrodite, mojañe bia nye bia saé, nnye a ne fe mone bezimbi Krist; nnye ate mi nga lôme na a zu ba’ale ma a toñe ma.
26 Amu a nga kômbô yene mia bese, a nlem ô tyele nye yôp amu mi nga wô’ô na a nga fame ôkon.
27 É ne fo’o été na a nga kon a ye’e wu, ve Zambe a nga wô’ô nye éngôngol, sa ke ve nye étam, a nga wô’ô fe ma éngôngole na me bo teke tôbane minju’u fifiti.
28 Jôme te nje ma lôme mia nye avôl avôl, ndemben éyoñe mia ye yene nye, mia ye beta bo mevak a ma fe ma ye ke beta dañe tyelé nleme yôp.
29 Nde mi nyoñe nye, avale mi wô’ô zu mia nyoñe beyé’é be Tate a meva’a mese. Kelané ôsu a nyane kane bôt éte.
30 Amu a nga ye wu* a butan ésaé a bo Krist,* a nga fam awu na a zu volô bo ma ésaé mi nji be ngule ya bo amu mi nji be ma bebé.
Notes
^ Nkobô Grec, “fulane mame mfa’a ya nsisim.”
^ Nkobô Grec, “kui na a bo éfunane bôt.”
^ Lañe’e Atinane bifia.
^ Nalé a tinane na, mimbime mia ye wômô miñwuan.
^ Nkobô Grec, “mfô’ôban.”
^ Nge ke, “Zambe a ve mia ngul.”
^ Nge ke, “ésaé ya volô bôt.”
^ Éfia Grec, psukhê. Lañe’e Atinane bifia, “Ényiñ.”
^ Be ne fe jô na, “ésaé a nga bo asu Tate.”
