1 Becorinthien 7:1-40
7 Éyoñe ji, mfa’a ya mame mi nga tili, da dañe mvaé na fam é bo te nambe* minga;
2 ve amu mvite mame ya bisôk* é maneya yametan, fam ése é bi minga wé a minga ase a bi nnôme wé.
3 Nnôm a va’a ngale wé jôm a yiane ve nye a ngale fe a bo avale da be nnôme wé.
4 Ngal a nji bi ngule ya jôé nyule jé émien, ve nnôme wé nnye a jôé je; aval éte fe nnôm a nji bi ngule ya jôé nyule jé émien, ve ngale nnye a jôé je.
5 Te mia tyiane miabebien, vengevenge ve, nge mia te kui tyiñe tañe ngume nté éyoñ, ndembene mi ne bi éyoñe ya ye’elan a beta fulane nsamba, ndembene Satan a ne bo te ke ôsu a ve’ele mia amu mia kate jôé miabebien.
6 Ve ma jô jame di aval ane jame bôte be ne kui de tyiñ, sa ke na a ntoo atiñ.
7 Ve ma kômbô na bôte bese be bo ane me ne. Amu môt ase a bili mveane wé wo so be Zambe, nyina avale mveane di, nyu mbok avale mvean avok.
8 Éyoñe ji, ma jô bôte be nji bo nlu’an a minkuse na, da dañe mvaé mfa’a wop nge ba tabe ane me ne.
9 Ve, nge be nji bo ngule ya jôé bebien, môt ase a lu’uk, amu da dañe mvaé na be luk, a lôte na bisôk bi su’ulane lôte be ngul.
10 Mfa’a bôte be ne nlu’an, ma ve melebe ma, sa ke ma, ve Tate, na minga a nji yiane kandan a nnôme wé.
11 Ve nge a kandan a nnôme wé, a tabe’e ñhe nkoé, nge na a beta ke lat a nnôme wé; nnôme ki a nji yiane suu minga wé.
12 Ve mfa’a bôte bevok, ma jô na, ôwé, ma, sa ke Tate: Nge mojañ éziñ a bili minga a nji buni, a na a kañese tabe a nye, a bo’o te suu nye;
13 a nge minga a bili nnôm a ne te buni, a na a kañese tabe a nye, a bo’o te kôlô be nnôm.
14 Amu fam é ne te buni, ja telébane mfuban amu minga wé, a minga a ne te buni, a telébane mfuban amu mojañ; nge nalé momo, bone benane ba ye ñhe bo mvit, ve éyoñe ji be ne mfuban.
15 Ve nge nyu a ne te buni a tobe na a kôlô, jôké’é nye a ke; a mojañe nge kale jangan a nji beta bo ntiñetan aval éyoñ éte, ve Zambe a nga ve mia mvo’é.
16 Amu a ngal, wo yem aya, nge wo ye nyii nyo nnôm? Nge na, a nnôm, wo yem aya, nge wo ye nyii nyo ngal?
17 Ve fo’o ve avale Yéhôva* a nga ve môt ase ya be mia ngap, môt ase a wulu’u avale Zambe a nga loone nye. A atiñe di nde ma ve bikôane bekristene bise.
18 Ye môt éziñ a nga looban a too ntyi’an atyel? A bo’o te jeñe na a vaa ntyi’an atyele wé. Ye môt éziñ a nga loobane nté a mbe te ntyi’an atyel? A bo’o te jeñe na a nyoñe ntyi’an atyel.
19 Ntyi’an atyel ô nji bo jôm éziñ, a te ntyi’an atyel ô nji bo jôm éziñ; jôm é ne nya jômô é ne na, môt a tôñe metiñe me Zambe.
20 Été môt ase a mbe a tele éyoñ a nga looban, a kele’e ôsu a ba’ale je.
21 Ye ô nga looban ô too ôlo? Te tyelé nleme yôp amu jam éte; ve nge ô bili fane ya bo fili, bo’o de.
22 Amu, môt ase a nga loobane be Tate éyoñ a mbe ôlo a ne fili be Tate; avale te fe, môt éziñ a nga looban a too fili, a ne ôlo Krist.
23 Mi nga kuseban a tañ; te beta boané alo ya bôt.
24 A bobejañ, été môt ase a mbe a tele éyoñ a nga looban, a kele’e ôsu a ba’ale je e mise me Zambe.
25 Mfa’a ya bôte be ne bindun,* me nji bi atiñ éziñe me ne ve be é so’o be Tate, ve ma ve be fe’e jam ane nyu Tate a nga mvamane nye, a too fe nyu a ne mewôk.
26 Nde ma simesane na, da dañe mvaé na môt a ke ôsu a tabe ane a ne amu minju’u ya éyoñe ji.
27 Ye ô bili minga? Te jeñe na ô suu nye. Ye ô ne te minga? Te jeñe minga.
28 Ve to’o wo luk, wo ye ke bo nsem éziñ, a nge éndune ja luk, avale môt éte da bo ki nsem. Ve bôte ba luk, ba ye tôbane minju’u minsône miap été. Ve me nji kômbô na mi tôbane mame mete.
29 Nde fe a bobejañ, jame ma jô nde di na, éyoñ é li’iya é ntoo étun. Ataté éyoñe ji, ba be bili binga be bo ane nge be nji bi,
30 a ba ba yôn ane ba be nji yôn, a ba ba vak ane ba be nji vak, a ba ba kus ane ba be nji bi jôm,
31 a ba ba bu’ubane si nyu, ane ba be nji bu’ubane je ngumba ngumba; amu mame ma bobane si nyu ma ke ma tyendé.
32 E nya ajôô, ma yi na mi bo te tyelé minleme yôp. Môt a ne nkoé a tyelé nleme yôp, mfa’a ya mame me Tate, aval a ne bo na Tate a yene nye mvaé.
33 Ve môt a ne nlu’an, a tyelé nleme yôp mfa’a ya mame ya si nyu, aval a ne yené mvaé be minga wé,
34 a a saléya zañ. Nde fe, minga a ne nkoé a nyu a ne éndun a tyelé nleme yôp asu mame me Tate, ndemben a ne bo mfubane mfa’a ya nyule jé a mfa’a ya nsisime wé. Ve minga a ne nlu’an a tyelé nleme yôp mame ya si nyu, aval a ne yené mvaé mise me nnôme wé.
35 Ve, ma jô jame di asu mfi wônane miabebien, sa ke na me kamane mia jam éziñ,* ve na me tindi mia na, mi bo jam é ne mvaé a ke ôsu a bo Tate ésaé teke jôme ja ndeñele mia.
36 Ve nge môt éziñ a simesane na é nji bo mvo’é na a ke ôsu a tabe nkoé,* nge a lôteya ôkala ya ésoé, nde ñhe a ntoo ngule ya bo jam éte, jôka’ané nye a bo aval a yi; a nji bo nsem. Jôka’ané nye a luk.
37 Ve nge môt éziñ, a yeme ngule nleme wé été, a na a nji yene mfi ya bo de, ve a yeme jôé émien a na a nyoñeya ntyi’ane nleme wé été na a tabe teke luk,* a ye bo mvo’é.
38 Nde fe nyu a luk* a bo mvo’é, ve nyu a nji luk a dañe bo mvo’é.
39 Minga a tii a nnôme nté ôse a ngenan a vee. Ve nge nnôme wé a wu, a ntoo fili ya lu’u môt ase a kômbô, fo’o ve be Tate.
40 Ve mfa’a wom a dañe mevak nge a tabe ane a ne; a ma fe ma simesane fo’o na me bili nsisime Zambe.
Notes
^ Nalé a tinane na, e jô’ôbô a.
^ Éfia Grec pornéïa. Lañe’e Atinane bifia.
^ Lañe’e Atinane bifia.
^ Nge ke, “ba be ngenane teke lu’u môs éziñ.”
^ Nkobô Grec, “kolé ôlam.”
^ Nkobô Grec, “éndun.”
^ Nge ke, “ba’ale éndune jé.”
^ Nge ke, “ve éndune jé aluk.”
