2 Timothée 2:1-26
2 Nde, wo, a mone wom, kele’e ôsu a nyoñe ngul e beta mvam, nnye ate a ne be Krist Yésus;
2 a mam ô nga wô’ô be ma mme fe abui bengaa é ne ngule ya yemete, ye’ele’e me bôte be ne tabe be ndi, ndembene be fe ba ye bo ngule ya ye’ele ba bevok.
3 Aval ane mbamba mone bezimbi Krist Yésus, tabe’e nkômesane ya jibi minjuk.
4 Teke môt éziñ a saé ane mone bezimbi a ne kañese ke nyiine* mame me makite ya ényiñe* nge a kômbô na môt a nga nyoñe nye bezimbi a yene nye mvaé.
5 Avale te fe môt a bo bivôé a ne nyoñe couronne ya bivôé bite, vengevenge ve a te bie bo a tôñe’e metiñe ya été.
6 Mbé mefup a saé a ngul ése a yiane taté bo môt ôsu a di bibuma ya afube dé.
7 Simesa’ane kom ése jame ma jô; Tate a ye ve wo ngule ya wô’ô* mame mese.
8 Simesa’ane na, Yésus Krist a nga wômô miñwuan, a na a mbe môte ya mvoñe bôte David, avale mbamba foé ma kañete a ye’ele,
9 amu nye, ma tôbane minjuk a ma fetebane mimbôk ane mbia môt. Ve mejô me Zambe me nji bo ntiñetan.
10 Ajô te nde ma ke ôsu a jibi mame mese asu ba be ne ntoban, ndembene be fe be ne bi nyiian a ngule ya Krist Yésus, a duma ya nnôm éto.
11 Njôane wu ô ne été: Teke vaa nge beté, nge bia wu nsamba, bia ye fe nyiñe nsamba;
12 nge bia ke ôsu a bo mbane ya jibi, bia ye fe jôé a nye ane bejôô; nge bia jô na bi nji yeme nye, nye fe a ye jô na a nji yeme bia;
13 to’o bi nji bo jame Zambe a jô, nnye a ye bo kom ése jam a jô, amu a vo’o ki bo bisô a émien.
14 Kele’e ôsu a ba’alane be mame ma, ô jô’ô be* mise me Zambe na be bo te wôman étome bifia, amu jam éte é nji volô jôm, a jam éte da viane bo bôte ba vô’ôlô abé.*
15 Jeñe’e a ngul ése na ô liti womiene be Zambe ane môt a yené mvaé, ane mbo ésaé a nji bi amu ya wôk ôson, nyi a ye’ele benya mejôô avale da yian.
16 Ve, te kañese bivôlôvôla minkañete bia ndamane jôm é ne étyi, amu bia ye kee bôte na be tu’a biasé Zambe,
17 mejô ba kuli menyu map ma ye mialan aval ane fôle ja di nyul. Hyménée ba Philète be ne nsamba ôte.
18 Bôte bete be yaleya fé mfa’a ya benya mejôô be jô’ô na, ñwômane miñwuan ô maneya boban, a ba jo’otane mbunane ya bôte béziñ.
19 Akusa bo nalé, mbôka’a Zambe ô yeme ne zeñ, ô bili sitame nyi, “Yéhôva* a yeme ba be ne émbé,” a, “Môt ase a be’e jôé Yéhôva* a jôké’é ékotekot.”
20 E beta nda été, wo ye ke koone bisua bi* too ve gôlôt a argent, wo ye fe koone bi bi ne a bilé a étek, bivok asu ngum avale mbelan, ve bi bivo’o ba belane bie môs ôse.
21 Nge môt éziñ a sa’ale bi bia su’ulane bi, a ye bo ékpwelé* ba belane je ngumba aval, mfuban a mfi asu masa wé, nkômesane mfa’a ya mbamba ésaé ase.
22 Ajô te, tube’e minkômbane ya éyoñe môt a ngenan ésoé, ve tôñesane zôsô, mbunan, nye’an, mvo’é a ba ba loone Tate a nlem ô ne mfuban.
23 Nde fe, ô bene’e minsôane bisô mi ne asuk a te fek, amu wo yeme na mia biaé môman.
24 Amu mbo ésaé Tate a nji yiane bo môta meluman, ve a yiane bo évôvoé* asu bôte bese, atyeñe ñye’ele, a yeme’e bi nlem éyoñe ba jeñe nye mejô,
25 ô lebe’e a évôvoé ése ba ba nye’e mintañete. Éko éziñe Zambe a ne ve be nkôñelane nleme* wo bo na, be bi nya ñyemane mame ya benya mejôô,
26 a na be beta bi fek, a vaa bebien ôlame Diable, nnye ate a nga bi be vevee na be bo nkômbane wé.
Notes
^ Nkobô Grec, “fubu.”
^ Be ne fe jô na, “mam a bo môs ane môs.”
^ Nge ke, “atyeñe meyen.”
^ Nkobô Grec, “kañete’e be avale da yian.”
^ Nge ke, “ndamane be.”
^ Lañe’e Atinane bifia.
^ Lañe’e Atinane bifia.
^ Nge ke, “mevie’e me.”
^ Nge ke, “viek.”
^ Nge ke, “mbamba môt.”
^ Nge ke, “ntyendan ôsimesan.”
