Begalate 5:1-26
5 Amu avale fili éte nde Krist a nga toé bia. Ajô te, teba’ané ne bip, a te beta nyiñelané miabebien éto ôlo si.
2 Tama yenan! Ma, Paul, ma kate mia na nge mia tyi’iban atyel, Krist a ye ke bo mfi éziñ asu denan.
3 Ma beta bo’olô na, môt ase a tyi’iban atyel a ne ntindane ya tôñe Metiñe me Moïse mese.
4 Mi kandaneya a Krist, mia mia jeñe na mi bi mekabe na mi ne zôsô a zene ya Metiñe me Moïse; mi ntoo ôyap a beta mvame wé.
5 Amu mfa’a wongan, a zene ya nsisim, bia yange a nlem ôse ndi nleme ya zôsô ja so mbunan.
6 Amu e Yésus Krist été, sa ke ntyi’an atyele nge te ntyi’an atyele ñwô ô ne mfi, ve mbunane wo bo ésaé nye’an été ñwô ô ne mfi.
7 Mi mbe mi mate’e nya mvo’é. Za a nga kamane mia na mi ke ôsu a tôñe benya mejôô?
8 Ñye’elane ya bôte ba kamane mia na mi ke ôsu a tôñe benya mejôô, ô nji so be Nyu a nga loone mia.
9 Mone mvusu a bo na amama’a ése é vus.
10 Me too ndi na, mia mia wulu ba’aba’a a Tate mia ye ke simesan aval afe; ve nyu ase a soo jo’ojo’o zañe jenan, ja’a a ne za, a ye bi fonose ja yiane nye.
11 Mfa’a wom a bobejañ, nge me ngenane me kele’e ôsu a kañete ajô ya ntyi’an atyel, amu jé me ngenane me tôba’an étibila’a? Nge nalé, ékolé ôba’a ya élé mintaé* é vaabaneya fo’o.
12 Ma yi na, bôte ba jeñe na be ndumekane mia minlô be tube bebiene miak.*
13 A bobejañ, mi nga looban asu fili; ve jame da, te belané fili éte ane atyebe ya jalé minkômbane ya minsôn, ve a zene ya nye’an, môt ase a saane nyu mbok ane ôlo.
14 Amu Metiñe me Moïse mese ma jaléban* atiñe da, nde é ne na: “Wo yiane nye’e môte mbok ane wo nye’e womien.”
15 Nge mia ke ôsu a lôban a nyabane mia mia, mi tabe’e ñhe ntyele na mi mane wôéane mia mia.
16 Ve ma jô na, kelané ôsu a wulu a nsisim a mia ye bo te bo nkômban éziñe ya minsôn.
17 Amu minsône mia wosane nsisim a minkômbane mié, a nsisime wo wosane minsôn. Ba wosane be be aval é ne na, mi bo teke bo mame mia kômbô bo.
18 Nde fe, nge mia wulu a nsisim, mi nji bo atiñe si.
19 Mimboone ya minsône mia kôme yené ne ngeññ a mi ne na: mvite mame ya bisôk,* nyé mboone mam, mvite mame teke wô’ô nyé nge ôson,*
20 e kañe bengulemelan; fulu ya bo mame ya ngbwel,* ziñ, môman, éviele, mbia ñwô’an ôlun, metyama’ane, minkandane mengam,
21 minyamete, nso’one meyok, mbia mebôk* a mame mese ma funane malé. Me nga taté ve mia abendé ajô ya mame ma, ma beta ve mia abendé na ba bese ba bo avale mam éte ba ye ke nyoñe ngap Éjôé Zambe.
22 Ve, mefulu ya ébuma ya nsisime me ne nye’an, mevak, mvo’é, ôjibi,* mbamba nlem, mbamba be mam, mbunan,
23 évôvoé, njôane nlem. Teke atiñ éziñe da wosan avale mam éte.
24 Nde fe, bôte be ne ba be Krist Yésus be nga tyelé élé minsôn a ngule miñyiane nsamba a minkômbane ya été.
25 Nge bia nyiñ a nsisim, nkelané fe ôsu a wulu avale da wô’an a nsisim.
26 Mbo’ané te bo éngelezek, a vaa nsisime mesengane minleme miangan été; te bia bo éviele.
Notes
^ Lañe’e Atinane bifia.
^ Nge ke, “e vaa mimbañe mi abin; e bo mmimiak.” Nalé a nga bo na, be bo te tôñ atiñe bebiene ba kamane de.
^ Be ne fe jô na, “me ne ñwôlekan.”
^ Éfia Grec, pornéïa. Lañe’e Atinane bifia.
^ Éfia Grec, asélgéïa. Lañe’e Atinane bifia.
^ Nge ke, “évu; môt a belane banga.”
^ Nge ke, “mebô’ô bôte ba bo mam éboboé.”
^ Nge ke, “ôte’ete’e ya yaa.”
