Jacques 3:1-18
3 A bobenyañe bam, abui beye’ele é nji yiane bo be mia, mia yeme na bia ye bi mekua ma dañedañ.*
2 Amu bia bese bia kop* abui biyoñ. Nge môt éziñ a ngenane teke kolé ôbak a bifia, a ne zôsôa môt, a a ne ngule ya jôé nyule jé ése.
3 Nge bia futi nkole ba wulu wô bikabela menyu map asu na bi bo bia mewôk, bia jôé fe nyule jap ése.
4 Tame fe yenané bifunga: Akusa bo bi ne bitua menen a na beta bivuñulu mbie bia tindi bie, a ne mone gouvernail, nnye a tindi bie vôme môt a bili volant a yi na bi ke.
5 Avale te fe, ôyem, ô ne mon ébu’a ya nyul, ve wo bo beta be mam. Tama yenan avale mone nkaba’a nduan a ne di’i ngumba afan!
6 Ôyem ô ne fe ane nduan. Ôyem, ébu’a ya nyule jangan, ô ne njalan a ékotekote zañ abui bibu’a ya nyul, amu wo ndamane nyul ése a wo wua ngumba ényiñe* môte nduan été, a nduan éte ja so e Géhenne.*
7 Amu mevale betite mese ya afan a anon, betite ba vutan a abum a ba ba ya’é, a betite ya mañ, me nga toébane ngbwak, a môta binam a nga toé bie ngbwak.
8 Teke môt a ne toé ôyeme ngbwak.* Ô ne éngana’a a wo bo mbia be mam, ô ne njalan a nsule wo wôé.
9 A ñwô bia ve wô Yéhôva* duma, Ésa wongan, ve a ñwô bia yo’é bôte be nga téban “éve’ela Zambe.”
10 Bibotan a biyo’é bia so anyu da da.
A bobejañ, é nji bo mvo’é na mame me bobane nalé.
11 Ye ôtôñe wo kui nsôlô’ô, wo ve bivôvoé* mendim a mendime me ne ayôle mbile wua?
12 A bobenyañe bam, ye élé figuier é ne wume bibuma bi olive? Nge na, ye ndi’i woon ô ne wume bibuma bi figue? Ye ôtôñe wo kui nsôlôk ô bili mendime me ne nku ô ne ve mendime me ne évôvoé?
13 Ye môt éziñe ya be mia a bili fek a ñyeman? Môt ate a yiane bi mbamba ntaban a liti na a bo mame mese a évôvoé nleme ja so e fek.
14 Ve nge mi bili ayôl éviele a zuña’a* e minleme mienan été, te boané mebun a jô mame me ne minsos a lat a benya mejôô.
15 Sa ke fe’e ja so yôbe le; a ne nyi ja so si, nje éte ja so be betit a be mbia nsisim.
16 Amu vôm ase éviele ba mesengane* bi ne, vôm ate fe jo’ojo’o a mbia be mame bese ba ye bo.
17 Ve fe’e ja so yôp ja taté bo mfuban, mvo’é, ja kañese ôsimesane bôte bevok, tyi’ibi ya bo mewôk, njalan a mvam a mbamba bibuma, é nji bo ôbangam a te bo medu’an.
18 Nalé fe, ébuma ya zôsô ja béban e mvo’é été asu* ba ba bo na mvo’é é bo e zañe jap.
Notes
^ Nge ke, “ntyi’ane mejô ô ne ényan.”
^ Nge ke, “kolé ôbak.”
^ Nkobô Grec, “nka ya abialé (atata’a).”
^ Lañe’e Atinane bifia.
^ Nge ke, “jôé ôyem.”
^ Lañe’e Atinane bifia.
^ Nkobô Grec, “mvaé.”
^ Nge ke, “mesengan.”
^ Nge ke, “zuña’a.”
^ Be ne fe jô na, “a zene ya.”
