Becolossien 3:1-25
3 Ve, nge mi nga wômô miñwuan a Krist, kelané ôsu a jeñe mame ya yôp, vôme Krist a too mbo nnôme Zambe.
2 Kelané ôsu a fase mame ya yôp, sa ke ma ya si.
3 Amu mi nga wu, a binyiñe bienane bi nga ke mo me Krist a ngule Zambe.
4 Éyoñe Krist, ényiñe jangan, a ye yené ne ngeññ, éyoñe te nje mia fe mia ye yené a nye étôtok été.
5 Nde, mi wôé bibu’a bi nyule bienane ya minsône mfa’a ya mvite mame ya bisôk,* nyé mboone mam, e kate jôé miabebien a lat a mame ya bisôk, mbia minkômban a minyamete, mmie mi ne nkañane bezambe befe.
6 Amu avale mam éte nde da soo ayaa Zambe.
7 Nne mia fe mi mbe mi nyiñi’i* nalé, fatan ényiñe mi mbe mi nyiñi’i ôsusua.*
8 Ve éyoñe ji, mia yiane jô’é mame ma mese: ayaa, mbia ñwô’an ôlun, mbia be mam, meta, nyé nkobô é ne kui mia menyu.
9 Môt a bo’o teke laane nyu mbo’o minsos. Mi vaa nnôma môt* a mbia mimboone mié mise,
10 mi jaé mfefé môt, ñwô wo bo mfefé môs ane môs ane Nyu a nga té wô a zene ya nya ñyemane,
11 vôme mone grec a nji beta bo, nge mone juif, nge môt a ne ntyi’an atyel, nge môt a nji bo ntyi’an atyel,* nge ndimi mam,* nge ôlo, nge môt a bili éto fili; ve Krist a ne mame mese a e be bese.
12 Amu nalé, aval ane bôte Zambe a nga top, ba be ne étyi a ba a nye’e, mi jaé minleme ya yeme tebe été môte mbok, mbamba nlem, éjôte nyul,* évôvoé nlem, a ôjibi.
13 Kelané ôsu a jibi bôte bevok, wua a jibi’i nyu mbok, mi yeme fe jamé a nlem ôse, to’o môt éziñ a bili amu ya wô’ô nyu mbok ôlun. Avale Yéhôva* a nga jamé mia a nlem ôse, mia fe mia yiane jamé bôte bevok a nlem ôse.
14 Nge ô vaa mame mete mese, jaéané nye’an, amu ñwô wo late bôte nya nlatane.
15 Nde fe, mi kañese’e na mvo’é Krist é jôé minleme* mienan, amu mi nga loobane mvo’é éte a nyule jia. Mi yeme fe ve akiba.
16 Mi jô’é mejô me Krist me bo ésaé ngumba ngumba minleme mienan été a fek ése. Kelané ôsu a ye’ele a veane ngule nyul* a zene ya besam, mi ve Zambe duma, a bia ya ékaña’a ba yia a mvean akiba,* mi yia Yéhôva* bia minleme mienan été.
17 To’o mia kobô, to’o mia bo jam éziñ, mi bo’o mame mese e jôé Tate Yésus, mi va’a Zambe nnye a ne Ésa akiba a zene ya be nye.
18 A beyal, môt ase ya be mia a sili’i émien si éjôé be nnôm, aval é ne mvaé be Tate.
19 A beyôm, môt ase ya be mia a kele’e ôsu a nye’e ngal, a te bo nye njet.*
20 A bon, bo’ané bebiaé benane mewô’ô mfa’a ya mame mese, amu nalé a ne mvaé mise me Tate.
21 A beésa, te mia soñe* bone benan, be za tyili* minleme miap été.
22 Alo, bo’ané bemasa benane mewô’ô mimfa’a mise, sa ke ve éyoñe be lôô mia, fo’o ve ane mia kômbô ve môta biname nleme mvaé; ve mewô’ô menane ma yiane so mia nlem été amu mia ko Yéhôva* woñ.
23 Jam ése mia bo, bo’ané de a nleme wônan ôse,* ane asu Yéhôva,* sa ke asu bôt,
24 amu mia yeme na ma’ane menane ma ye so be Yéhôva.* Saané ane alo asu Masa, Krist.
25 Ôwé, môt ase a bo mbia be mam a ye bi ma’ane ya mbia be mam a te bo, amu Zambe a ye tyi’i bôte bese mejô, teke bo ôbangam.*
Notes
^ Éfia Grec, pornéïa. Lañe’e Atinane bifia.
^ Nge ke, “wulu’u.”
^ Nge ke, “éyoñe mi mbe mi wulu’u aval éte ôsusua.”
^ Nge ke, “minnôme mefulu.”
^ Nge ke, “nsôso.”
^ Nkobô Grec, “Scythe.” Melu mvus, be mbe be bela’an éfia éte asu bôte be mbe be biasé’é amu mboone mame wop.
^ Nge ke, “e sili émiene si.”
^ Lañe’e Atinane bifia.
^ Nge ke, “é wulu’u minlem.”
^ Nge ke, “a veane mebendé.”
^ Lañe’e Atinane bifia.
^ Nge ke, “bi bi ne zame melo.”
^ Nge ke, “te mia bo ayôle minleme be be.”
^ Nge ke, “te mia sô’ôlô; te mia bete bômô.”
^ Nge ke, “bili atek.”
^ Lañe’e Atinane bifia.
^ Éfia Grec, psukhê. Lañe’e Atinane bifia, “Ényiñ.”
^ Lañe’e Atinane bifia.
^ Lañe’e Atinane bifia.
^ Nge ke, “avale da.”
