Matthieu 19:1-30
19 Éyoñe Yésus a maneya jô mame mete, nde a nga kôlô Galilée a tyi’ilane Jourdain a ke minné mi si ya Judée.
2 Nde fe beta minsamba mi bôte mi nga tôñe nye, vôm ate nye a nga mane saé bôte bese be mbe be konôk.
3 Ane bepharisien be nga so be bili nsôñane ya ve’ele nye, nde be nga sili nye na: “Ye atiñe da kañese na fam é tyam aluk a minga wé amu mone jam ase?”
4 Nde a nga yalane be na: “Ye mi nji lañe na, nyu a nga té be atata’a a nga té be fam a minga.
5 A nga jô na, ‘Amu nalé fame ja ye lik ésa ba nyia a ke lat a minga wé, a bebaane ba ye bo nsône wua’?
6 Nde be nji beta bo bebaé, ve be ntoo nsône wua. Ajô te, jôme Zambe a maneya lat, môt a bo’o te kandé je.”
7 Be nga sili nye na: “Amu jé Moïse a nga jô na nge môt a kômbô suu minga wé, a ve nye kalate ntyaman aluk?”
8 A nga jô be na: “Moïse a nga jô mia na môt a ne tyam aluk a minga wé amu ayete minleme denan, ve ôsusua é nji be nalé.
9 Ma jô mia na, môt ase a tyam aluk a minga wé, te yen a za bo’o mvite mame ya bisôk,* a beta ke lu’u minga mfe, môt ate a boya mejian.”
10 Beyé’é bé be nga jô nye na: “Nge nne fame ja yiane nyiñ a minga wé nalé, yeme’e fo’o na, é ne mvo’é na, môt a tabe nalé teke luk.”
11 A nga jô be na, sa ke bôte bese mbe ñhe ba kañese tabe nalé, ve ba Zambe a ve ngule na be tabe nalé.
12 Bôte béziñe ba bo teke luk amu be ne éyel aso abialé, bevo’o ki ba bo teke luk amu be nga tube be miak, ba bevo’o ba bo teke luk amu Éjôé ya yôp. Môt a kañese tabe nalé a tabe’e nalé.”
13 Nde bôte be nga zuu nye bone be bongô na, a beté be mo nlô a ye’elan asu dap, ve beyé’é bé be nga komekane be.
14 Ve Yésus a nga jô na: “Jôka’ané bone be bongô, te jeñané na mi kamane be na be zu be ma; amu Éjôé ya yôp é ne asu avale bôte dap.”
15 Ane a nga beté be mo a kôlô vôm ate.
16 A nga bo na, môt éziñ a nga zu koone nye, a sili nye na: “A Ñye’ele, mbamba mimboone mivé ma yiane bo, mfa’a ya na me bi ényiñe ya nnôm éto?”
17 Nde a nga yalane nye na: “Amu jé wo sili ma nsili wo fombô mbamba mimboon? Môte wuwua nnye a ne mbamba môt; nge wo kômbô bi ényiñ, kele’e ôsu a tôñe metiñ.”
18 Nde a nga sili nye na: “Metiñe mevé?” Yésus a nga jô nye na: “Ô nji yiane wôé môt, ô nji yiane bo mejian, ô nji yiane wup, ô nji yiane bôte môt ajô,
19 semé’é éso ba nyua, a wo yiane nye’e môte mbok ane wo nye’e womien.”
20 Ane ndôman éte é nga yalane nye na: “Me nga tôñe metiñe mete mese, jé éfe é ngenan é jemba’ane ma?”
21 Ane Yésus a nga jô nye na: “Nge wo kômbô bo ne seleñ,* kele’e kuane biôme biôé a ve minzôzoé, a wo ye bi akume yôp été, a za’a bo ñyé’é wom.”
22 Éyoñe ndôman é nga wô’ô mejô mete, é nga ke éyôé éyôé, amu é mbe é bili abui akum.
23 Ane Yésus a nga jô beyé’é bé na: “Ma kate fo’o mia na, da ye bo ayaé asu nkukume môte na ô nyiin Éjôé ya yôp.
24 Ma ba’alane mia na, é ne dañe bo tyi’ibi na chameau a tulan abé ndôndo a lôte na nkukume môt ô nyiin Éjôé Zambe.”
25 Éyoñe beyé’é be nga wô’ô mejô mete, be mbe fe’e ne vema, be sili’i na: “Za fo’o a ne bi bi ényiñ?”
26 Yésus a nga kôme be fombô mis été, a jô be na: “Mfa’a bôt, jam éte é vo’o boban, ve mfa’a Zambe, mame mese me ne boban.”
27 Ane Pierre a nga yalane nye a jô na: “Tame yen, bi maneya li’i biôme bise a tôñe wo, bi bia ye bi jé?”
28 Yésus a nga jô be na: “Ma kate fo’o mia na, éyoñe biôme bise bia ye beta bo mimfefé, éyoñe Mona môt a ye tabe étôtok éto njôane jé yôp, mia mi nga tôñe ma, mia ye tabe bito bi njôan 12 yôp, mi tyi’i menda me bôt 12 ya Israël mejô.
29 A môt ase a nga li’i menda, nge bobenyañ, nge bekal, nge ésa, nge nyia, nge bon, nge mesi amu jôé dam, a ye nyoñe biôme bite bise biyoñe 100, a ye fe bi ényiñe ya nnôm éto.
30 “Ve bôt abui be tele ôsu ba ye su’ulane tebe mvus, a bôte be ne mvuse ba ye su’ulane tebe ôsu.
