Mbôndé wongan a ne fek alôte bia. Ane ésaa a nye’e bone bé, a nyoñe bia ngap. A nji té bia na, bi wulu avale bia nye’e. (Ésaïe 29:16) Aval ane bone be bongô ba yi na bebiaé bap be liti be zen, aval te fe bia bese bia yi na, Zambe a liti bia zen. (Ésaïe 48:17, 18) Metiñe ya Kalate Zambe ma liti bia zene bia yiane wulu. Nalé, a ne das d’aso bia be Zambe.​—Lañe 2 Timothée 3:16.

Metiñe me Yéhôva ma ye’ele bia nya zene ya ényiñe ji, a ma liti bia aval avé bi ne bi bibotane nnôm éto melu m’azu. Mbôle Zambe nnye a nga té bia, é ne zôsô na, bi tôñe zene jé. Bi ayiane vak a ve nye akéva amu metiñe mé.​—Lañe Besam 19:7, 11; Nlitan 4:11.

Miñye’elane ya ényiñe mia so Kalate Zambe été, mia liti bia jé bia yiane bo éyoñe bi tele bité biziñ. Metiñe mevok ma dañe fombô avale mam éziñ. (Deutéronome 22:8) Bia yiane fase na, bi wôk nya ñye’elan a so e Kalate Zambe été, a jé a jô bia na bi bo e bité biziñ. (Minkana 2:​10-​12) Bi tame nyoñ éve’an, Kalate Zambe a ye’ele na ényiñ é ne das d’aso be ­Zambe. Ñye’elane te ô ne ngule ya liti bia zen.​—Lañe Mam Minlôman 17:28.

Yésus a nga ve bia metiñe mebaé ma dañe mfi. Atiñ ôsu d’aliti bia amu jé Zambe a nga té môt, na: a yeme nye, a nye’e nye, a kañe ve nye étam. Bia yiane belan atiñe te, éyoñ ése bia nyoñe mintyi’an. (Minkana 3:6) Bôte  b’atôñ atiñe te ényiñe jap, b’abo amvôé a Zambe, ba nyiñ e mvo’é été den, a b’aye bi ényiñe ya nnôm éto.​—Lañe Matthieu 22:36-38.

Atiñe baa d’aliti bia zene ya nyiñe mvo’é a bôte bevok. (1 Becorinthien 13:​4-7) E wulu aval atiñe baa d’ajô, a tinane na, bia yiane nyoñ éve’an avale Zambe a wulu a bôt.​—Lañe Matthieu 7:12; 22:39, 40.

Metiñe ya Kalate Zambe, ma ye’ele menda me bôt, avale me ne nyiñe nlatan a nye’an été. (Becolossien 3:​12-​14) Mejô me Zambe ma ba’ale fe menda me bôt, amu ma ye’ele be atiñe di: aluk d’ayiane libi.​—Lañe Metata’a 2:24.

Éyoñe bia ye wulu zene ya miñye’elane mi Kalate Zambe, bia ye tu’a toñe menda me bôte mangan minsôn a mvo’é ya nlem. Bitame nyoñ éve’an: bemasa ya menda bisaé, ba dañe nye’e b’anyoñe bôte be ne zôsô, a ba b’ajibi ésaé. (Minkana 10:​4, 26 ; Behébreu 13:18) Mejô me Zambe ma ye’ele bia na, môt ase a tyélé mfek nté nkôñe wé; afe na, amvôé bia be Zambe da dañe biôme bi mo.​—Lañe Matthieu 6:24, 25, 33; 1 Timothée 6:8-10.

Éyoñe bia nyiñ aval metiñe me Zambe m’ajô, nalé aye ­ba’ale menyôle mangan na me tabe mvo’é. (Minkana 14:30; 22:24, 25) Bitame nyoñ éve’an, mba’alane atiñe Zambe mfa’a ya abui nyuane meyok, wo ba’ale bia na bi bo teke kone, nge bi bibubua. (Minkana 23:20) Yéhôva a kañese na, bi nyu meyok ve mone abim. (Besam 104:15; 1 Becorinthien 6:​10) Metiñe me Zambe ma volô bia amu ma ye’ele bia na, bi ba’ale mimboane a asimesane dangan fe. (Besam 119:97-​100) Nge benya bekristene ba tôñe metiñe me Zambe, a nji bo ve amu mfi be bili été, a dañe dañe amu ba kômbô ve Zambe duma.​—Lañe Matthieu 5:14-16.