Wa ka kuxtal jeʼex u yaʼalik le Biblia yéetel wa ka biskaba yéetel Dioseʼ, u maas seguroileʼ táan a tuklik a wokjaʼ. Pero ¿listoech wa utiaʼal a wokjaʼ? ¿Baʼax jeʼel u yáantkech a wil wa listoecheʼ? a

Teʼ xookaʼ yaan a kanik:

•  ¿Unaj wa a kanik yaʼab baʼaloʼob?

•  ¿Baʼax kʼaʼabéet a beetik desde bejlaʼeʼ?

•  Baʼax ku yaʼalik uláakʼ paalaloʼob

 Utiaʼal a wokjaʼeʼ maʼ jach kʼaʼabéet a kanik yaʼab baʼaloʼob de memoriaiʼ, jeʼex a beetik le kéen a preparartaba utiaʼal junpʼéel exameneʼ. Pero le baʼax unaj a beetkoʼ letiʼe a convencerkaba de ke jach jaaj baʼax ku yaʼalik le Bibliaoʼ (Romanos 12:1). Por ejemploeʼ:

•   ¿Ka creertik wa yaan Dios yéetel chéen letiʼ unaj a adorartik?

   Le Bibliaoʼ ku yaʼalik: «Le máax ku natsʼkuba tu yiknal Dioseʼ kʼaʼabéet u creertik jach tu jaajil yaan Dios. Kʼaʼabéet xan u creertik jach tu jaajil ku tsʼáaik baʼaloʼob maʼalobtak tiʼ le máaxoʼob ku tsʼáaik u yóol u kaxtoʼob utiaʼal u adorartoʼoboʼ» (Hebreos 11:6).

   Tukle: «¿Baʼaxten kin creertik yaan Dios?» (Hebreos 3:4). «¿Baʼaxten chéen letiʼ unaj in adorartik?» (Apocalipsis 4:11).

   ¿Kʼaʼabéettech wa áantaj? Xok lelaʼ: «¿Bix yanchajik tuláakal baʼal? Yáax jaats: ¿Baʼaxten kin creertik yaan Dios?».

•   ¿Ka creertik wa tiʼ Dios u taal le baʼax ku yaʼalik le Bibliaoʼ?

   Le Bibliaoʼ ku yaʼalik: «Tuláakal Tsʼíibeʼ tiʼ Dios u taal tumen letiʼ tsʼáa tu tuukul le máakoʼob utiaʼal ka u tsʼíibtoʼoboʼ. Le oʼolal le baʼax ku yaʼalikoʼ maʼalob utiaʼal kaʼansaj, utiaʼal u yaʼalaʼal u nuʼuk tiʼ máak, utiaʼal u tojkíintaʼal u kuxtal máak bey xan utiaʼal u yúuchul tsolnuʼuk jeʼex unajeʼ» (2 Timoteo 3:16).

   Tukle: «¿Baʼaxten kin creertik le Bibliaoʼ maʼ chéen junpʼéel libro tsʼíibtaʼab tumen máakoʼobiʼ?» (Isaías 46:10; 1 Tesalonicenses 2:13).

   ¿Kʼaʼabéettech wa áantaj? Xok lelaʼ: «¿Jeʼel wa u yáantken le Bibliaoʼ? Yáax jaats: Ilawil baʼax jeʼel a kanik teʼ Bibliaoʼ».

•   ¿Ka creertik wa Jéeoba nuʼuktik u kaajal utiaʼal u béeychajal baʼax u tukultmaj?

   Le Bibliaoʼ ku yaʼalik: «[Dios] unaj u alabartaʼal tu yoʼolal le múuchʼuliloʼ bey xan tu yoʼolal Cristo Jesús utiaʼal kʼiinoʼob minaʼan u xuul» (Efesios 3:21).

   Tukle: «Le baʼaxoʼob ku kaʼansaʼal teʼ muchʼtáambaloʼoboʼ, ¿kin wilik wa jach tu jaajil tiʼ Dios u taal wa kin wilik chéen bey u kaʼansaj wíinikeʼ?» (Mateo 24:45). «Wa yaan kʼiin in papáʼob maʼ tu páajtal u binoʼob muchʼtáambal pero ku tsʼáaikoʼobten permisoeʼ, ¿baʼax kin beetik? ¿Kin pʼáatal wa tin najil wa kin bin muchʼtáambal?» (Hebreos 10:24, 25).

   ¿Kʼaʼabéettech wa áantaj? Xok lelaʼ: «¿Baʼax utsil jeʼel u taasiktech a bin teʼ muchʼtáambaloʼob ku beetik u testigoʼob Jéeobaoʼ?».

 Maʼ kʼaʼabéet perfecto máak utiaʼal ka okjaʼanakiʼ. Kex beyoʼ unaj a weʼesik yéetel a kuxtal taak a beetik le baʼax tu yaʼalaj le salmistaaʼ: ‹Unaj a náachkuntkuba tiʼ baʼax kʼaas ka a beet baʼax uts› (Salmo 34:14). Tukult lelaʼ:

•   ¿Ka kuxtal wa jeʼex uts tu tʼaan Jéeobaoʼ?

   Le Bibliaoʼ ku yaʼalik: «Maʼ u xuʼulul u yantalteʼex junpʼéel maʼalob conciencia» (1 Pedro 3:16).

   Tukle: «¿Bix in weʼesik tsʼoʼok u yiijtal in tuukul utiaʼal in kʼaj óoltik baʼax maʼalob yéetel baʼax maʼ maʼalobiʼ?» (Hebreos 5:14). «¿Yaan wa kʼiin tin beetaj baʼax maʼalob kex tu yaʼalaʼalten tumen uláakʼ paalal ka in beet baʼax kʼaas? In amigoʼobeʼ, ¿ku yáantkenoʼob wa in beet baʼaloʼob maʼalobtak?» (Proverbios 13:20).

   ¿Kʼaʼabéettech wa áantaj? Xok lelaʼ: «¿Bix jeʼel in kaʼansik tubeel in concienciaeʼ?».

•   ¿A wojel wa yaan a kʼubik cuenta tiʼ Jéeoba yoʼolal baʼax ka beetik?

   Le Bibliaoʼ ku yaʼalik: «Cada juntúul tiʼ toʼoneʼ yaan u kʼubik cuenta tiʼ Dios yoʼolal baʼax u beetmaj» (Romanos 14:12).

   Tukle: «¿Bix kʼaj óolaʼanilen tumen u maasil?» (Hebreos 13:18). «Kéen in beet baʼax maʼ maʼalobeʼ, ¿kin taʼakik wa baʼax kin beetik wa kin culpartik u maasil?» (Proverbios 28:13).

   ¿Kʼaʼabéettech wa áantaj? Xok lelaʼ: «¿Unaj wa in waʼalik baʼax tin beetaj?».

•   ¿Táan wa a kanáantik bix a biskaba yéetel Jéeoba?

   Le Bibliaoʼ ku yaʼalik: «Natsʼabaʼex tu yiknal Dios, letiʼ túuneʼ bíin u natsʼuba ta wiknaleʼex» (Santiago 4:8).

   Tukle: «¿Baʼaxoʼob kin beetik utiaʼal in maas biskinba yéetel Jéeoba? ¿Suukaʼan wa in jóoʼsik tiempo utiaʼal in xokik le Bibliaoʼ?» (Salmo 1:1, 2). «¿Sáamsamal wa kin orar tiʼ Jéeoba?» (1 Tesalonicenses 5:17). «¿Bix le oraciónoʼob kin beetik tiʼ Jéeobaoʼ? In amigoʼobeʼ, ¿u yaabiltmoʼob wa Jéeoba?» (Salmo 15:1, 4).

   ¿Kʼaʼabéettech wa áantaj? Xok lelaʼ: «¿Jeʼel wa u yáantken le Bibliaoʼ? Kaʼa jaats: ¿Bix jeʼel u yutstal ta wich u xookil le Bibliaoʼ?» bey xan «¿Baʼaxten kʼaʼabéet k-orar?».

 BEET LELAʼ: Le xook 37 tiʼ le libro U núukil le preguntaʼob ku beetik le paalaloʼoboʼ (u kaʼapʼéel libroil), jach jeʼel u yáantkech a wil baʼax kʼaʼabéet a beetik utiaʼal a wokjaʼeʼ. Maases tuukulnen tiʼ le baʼaxoʼob ku yaʼalaʼal teʼ página 308 yéetel 309.